Japta 11

Moa Pipol i Joenem Jos

Epril–Jun 1830

Afta long sam wik, i bin gat 27 memba blong Jos. Oli no bin laef long sem taon. Josef Smit i bin askem olgeta blong kam long wan konfrens, we hem i wan spesel miting blong evri Sent. Ol memba blong Jos blong Jisas Kraes oli bin singaotem olgeta Ol Sent.

Ol Sent oli bin gat sakramen long konfrens. Sam long ol man oli bin odenem olgeta long prishud. Tabu Spirit i bin blesem Ol Sent, mo oli bin glad tumas.

Sam long ol pipol we oli bin atendem konfrens oli no memba blong Jos. Oli bin lanem abaot gospel mo oli bin wantem joenem Jos, mekem se oli bin baptaes. Afta long konfrens, Josef Smit i bin go long nara taon. Sam pipol longwe, oli bin wantem baptaes. Josef i bin talem long olgeta blong baptaes long wan wota kolosap.

Ol pipol oli bin bildim wan smol dam insaed long wota blong mekem wota i dip inaf blong oli save mekem baptaes. Long naet, sam pipol oli bin spolem gud dam ia.

Oli bin bildim dam ia bakegen, mo Oliva Kowdri i bin stat blong baptaesem ol pipol. I no longtaem afta, ol rabis man oli bin kam. Ol rabis man oli ol grup blong ol pipol we oli minim blong mekem samting nogud. Oli bin talem rabis samting mo traem blong mekem Ol Sent oli harem nogud, be Lod i lukaotem gud olgeta mo oli bin stap sef.

Ol rabis man oli bin gohed blong traem blong mekem sam trabol long Jos. Oli bin talem ol giaman toktok abaot Josef Smit mo mekem se oli bin arestem hem. Long hadtaem ia, oli faenem sam pipol blong oli save givim ol giaman testemoni agensem Profet. Be plante nara pipol oli bin talem trutok abaot Josef, blong pruvum se ol toktok blong ol enemi oli giaman.

Josef i bin kamaot, be i no longtaem ol pipol kolosap long eria ia oli bin arestem hem bakegen. Taem hem i bin stap long kalabus, ol pipol oli bin spet long hem mo oli no bin givim kakae long hem. Hem i pas bakegen long kot, mo oli no bin faenem eni samting i rong long Josef mekem se oli bin lego hem i fri.