“Japta 16: Josef Smit mo Sidney Rigdon i Lanem abaot Saeon: 1830,” Ol Doktrin mo Kavenan Stori (2002), 61–63
“Japta 16,” Ol Doktrin mo Kavenan Stori, 61–63
Japta 16
Josef Smit mo Sidney Rigdon i Lanem abaot Saeon
1830
Taem Oliva Kowdri mo ol fren blong hem oli bin stap long misin, oli bin stop kolosap long Ketlan, Ohaeo. Oli bin mitim wan man we nem blong hem Sidney Rigdon, hem i bin wan lida blong nara jos.
Ol misinari oli bin givim wan kopi blong Buk blong Momon long Sidney Rigdon mo oli bin tijim hem abaot gospel. Sidney i bin ridim Buk blong Momon mo hem i bin prea from. Papa long Heven i bin talem long hem se gospel ia i tru, mo Sidney i bin baptaes.
Sidney Rigdon i bin talem long ol memba blong jos blong hem blong oli lisin long ol misinari, mo plante long olgeta oli bin lisin. I no longtaem afta 1000 pipol oli bin baptaes long Ketlan.
Sidney Rigdon i bin wantem blong mitim Josef Smit, mekem se hem i bin go long Niu Yok. Afta Sidney i bin kamtru, Josef Smit i bin kasem wan revelesen blong hem. Long revelesen ia, Jisas i bin talem se Sidney Rigdon bae i save mekem ol bigfala samting. Hem bae i save tijim gospel long plante pipol. Hem bae i baptaesem olgeta mo givim presen we i Tabu Spirit long olgeta.
Jisas i bin talem tu long Josef mo Sidney se longtaem bifo oli bin jenisim sam long ol pat blong Baebol. Ol nara impoten pat oli bin tekemaot. Jisas i bin talem se bae Hem i save talemaot long Josef Smit wanem pat blong Baebol bae hem i stretem. Sidney bae hem i raetem daon ol koreksen taem Josef i stap talemaot.
Wan stori we i no komplit long Baebol i abaot Inok, we i bin wan bigfala profet. Ol pipol blong hem oli ol pipol we oli stret mo gud we Lod i bin singaotem olgeta Saeon. Ol pipol blong Inok oli bin bildim wan siti tu we oli singaotem Saeon. Long Saeon, ol pipol oli bin lavem wanwan long olgeta mo oli bin lukaotem gud wanwan long olgeta. I no bin gat wan i pua o i no hapi.
Evriwan long Saeon oli bin obei long ol komanmen blong Papa long Heven. Ol pipol oli bin stret mo gud tumas, i mekem se Lod i bin stap wetem olgeta. Afta Hem i bin tekem ol pipol blong Saeon i go long heven blong stap wetem Hem.
Jisas i bin talem long Josef Smit se Ol Sent oli sud bildim wan nara siti we nem blong hem Saeon. Siti ia bae i naes. I nogat rabis pipol bae i laef long ples ia. Olgeta we oli laef long siti ia bae oli mas lavem wanwan long olgeta mo stap hapi. Jisas i bin talem se bae Hem i kam blong laef wetem olgeta.
Doctrine and Covenants 45:64–71; luk tu long Moses 7:62–64