“Japta 38: Pearl of Great Price,” Ol Doktrin mo Kavenan Stori (2002), 145–50
“Japta 38,” Ol Doktrin mo Kavenan Stori, 145–50
Japta 38
Pearl of Great Price
Pearl of Great Price i wan buk blong skripja we ol profet oli raetem. I gat faef pat blong Pearl of Great Price. Oli buk blong Moses, buk blong Abraham, Joseph Smith—Matthew, Joseph Smith—History, mo Ol Toktok blong Bilif.
Buk blong Moses
Fas pat blong Pearl of Great Price i wan revelesen we oli givim long Josef Smit. Oli givim nem blong hem se buk blong Moses. Moses i wan profet we i bin laef bifo.
Buk blong Moses i stap talem wanem we God i bin talem long Moses long hil we i hae. Moses i bin luk God mo toktok wetem Hem. God i bin talem se Hem i gat wan spesel wok blong Moses blong i mekem.
God i bin soem long Moses wol ia mo evri samting we bae i hapen insaed long hem. Moses i bin luk tu evri pikinini blong God we bae oli laef long wol.
God i livim Moses, mo Setan i bin kam mo talem long Moses blong i wosipim hem. Moses i no bin wosipim Setan, hem i bin talem long hem blong gowe. Taem Setan i no wantem gowe, Moses i bin askem God blong i helpem hem. Hem i bin kasem paoa long God, Moses hem i talem bakegen long Setan blong gowe. Setan, kwik taem nomo i go, hem i bin kros tumas from se Moses i no wantem wosipim hem.
Moses i bin fulap long Tabu Spirit. Hem i bin prea, mo God i bin kam mo toktok wetem hem bakegen. God i bin talem long Moses se i gat plante wol—plante bitim yumi save kaontem. Hem i talem se Jisas i bin krietem ol wol ia mo bae Hem i save krietem sam moa from se i nogat en long ol wok blong God.
Moses i bin lanem se wok blong God i blong helpem ol pikinini blong Hem blong oli save gobak blong laef wetem Hem long laef we i no save finis. Buk blong Moses i bin talem tu abaot kriesen blong wol, Adam mo Iv mo famle blong tufala, Profet Inok mo siti blong Saeon, mo ol nara profet we oli bin laef bifo.
Buk blong Abraham
Seken pat blong Pearl of Great Price hem i buk blong Abraham. Long Julae 1835, wan man nem blong hem Mista Chandler i bin kam long Ketlan. Hem i bin soem long Ol Sent sam momi blong Ijip. Long bifo, ol pipol long Ijip oli yusum kaliko ia blong kavremap ol bodi blong ol pipol we oli ded. Ol bodi ia oli singaotem ol momi.
Sam rol blong olfala pepa oli stap wetem ol momi. Sam defren raeting oli bin stap long pepa ia, mo Mista Chandler i bin stap lukaotem blong wan man i save ridim. Hem i bin harem se Josef Smit i save transletem raeting.
Josef i luk raeting ia. Lod i bin talemaot long hem wanem mining blong sam long ol toktok ia, mo hem i talem long Mista Chandler. Sam long Ol Sent oli bin tekem ol rol blong pepa ia long Mista Chandler.
Josef Smit i stat blong stadi long ol raeting ia, mo God i bin talemaot translesen long hem. Oliva Kowdri mo Wiliam Phelps i raetem wanem we Josef i bin stap transletem. Ol raeting ia oli kam long bigfala profet Abraham, we hem i bin laef long Ijip bifo.
Jisas i bin toktok wetem Abraham mo talem long hem abaot laef blong yumi bifo yumi kam long wol. Jisas i bin talem se yumi laef olsem ol spirit pikinini wetem Papa long Heven bifo yumi bon. Buk blong Abraham i talem tu abaot kriesen blong wol, san, mun, mo ol sta, mo tu ol kriesen blong ol gri lif mo tri, ol animol, mo pipol.
Ebraham i bin wantem blong kasem ol blesing blong stap hapi mo gat pis. From se Ebraham i bin fetful, Jisas i bin mekem kavenan wetem hem. Wan kavenan i wan tabu promes wetem God mo ol pikinini blong Hem.
Long Kavenan ia, God i bin promes long Ebraham se bae hem i gat prishud mo wan bigfala famle. God i bin promesem Ebraham tu se ol fiuja memba blong famle blong hem, bae Hem i givim gospel mo prishud long olgeta sapos oli fetful. Famle blong Ebraham bae oli tekem gospel i go long evri pipol long wol.
Joseph Smith—Matthew mo Joseph Smith—History
Joseph Smith—Matthew i gat insaed ol koreksen we i bin kam long God we Profet i bin mekem blong pat blong buk blong Matiu insaed long Baebol. Joseph Smith—History i gat insaed ol raeting blong Profet abaot Fas Visen, ol gol plet, Buk blong Momon, mo restoresen blong prishud.
Ol Toktok blong Bilif
Las pat blong Pearl of Great Price hem i Ol Toktok blong Bilif. Wan dei wan man we fren blong hem i stap raetem wan buk, i kam long Josef Smit. Man ia i wantem samting abaot Jos long buk ia, mekem se hem i bin askem Josef blong talem long hem olsem wanem Jos i stat.
Josef Smit i bin raetem abaot stat blong Jos. Wetem help blong God, hem i bin raetem tu ol 13 impoten bigfala toktok abaot wanem ol memba blong Jos i bilivim. Josef i bin singaotem ol bigfala toktok ia Ol Toktok blong Bilif.
Long namba 1 Maj 1842, oli bin printim Ol Toktok blong Bilif long niuspepa blong Jos. Ol Sent oli bin ridim Ol Toktok blong Bilif mo oli bin bilivim wanem we Josef i bin raetem.
Ol Toktok blong Bilif
JOSEF SMIT
1
MIFALA I BILIV long God, Papa we I No Save Finis, mo long Pikinini blong Hem, Jisas Kraes, mo long Tabu Spirit.
2
MIFALA I BILIV we ol man bae oli kasem panis from ol sin blong olgetawan nomo, be i no from wanem we Adam i bin foldaon long hem.
3
MIFALA I BILIV we tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel.
4
MIFALA I BILIV we ol fas prinsipol mo odinens blong Gospel i: nambawan, Fet long Lod Jisas Kraes; nambatu, Sakem Sin; nambatri, Kasem Baptaes andanit long wota blong kam klin long ol sin; nambafo, Putum han antap long hed blong kasem presen we i Tabu Spirit.
5
MIFALA I BILIV we God i mas singaotem wan man, tru long profesi, mo tru long ol man we oli gat raet blong putum han antap long hed blong hem, blong hem i prijim Gospel mo mekem ol odinens we i stap.
6
MIFALA I BILIV long semfala oganaesesen we i bin stap long Jos long Bifo, we i gat ol aposol, ol profet, ol pasta, ol tija, ol ivanjelis, mo narafala moa.
7
MIFALA I BILIV long presen blong toktok blong ol lanwis, presen blong profesi, presen blong revelesen, presen blong ol visen, presen blong hilim sik, presen blong fasin blong talem mining blong ol lanwis, mo ol narafala moa.
8
MIFALA I BILIV we Baebol i toktok blong God sapos oli transletem i stret gud; mifala i biliv tu we Buk blong Momon i toktok blong God.
9
MIFALA I BILIV long evri toktok we God i bin talemaot finis, evri toktok we Hem i stap talemaot naoia, mo mifala i biliv we bambae Hem i talemaot yet plante bigfala, mo impoten samting abaot Kingdom blong God.
10
MIFALA I BILIV we Isrel bambae i mas kambak tugeta mo Ol Tenfala Traeb bambae oli kambak bakegen; we Saeon (Niu Jerusalem) bae oli bildim long graon blong Amerika; se Kraes Hemwan bambae i rul wetem paoa long wol ia; mo wol ia bambae i kam niufala mo bambae i kasem glori blong hem olsem paradaes.
11
MIFALA I TALEMAOT we mifala i gat raet blong wosipim Hae God long wei we mifala i wantem, mo letem ol narafala man blong gat sem raet, letem olgeta blong wosip long fasin we oli wantem, long weaples we oli wantem, o wanem we oli wantem.
12
MIFALA I BILIV we mifala i mas stap biaen long ol king, ol presiden, ol lida, mo ol jaj, blong folem, givim ona, mo sapotem loa.
13
MIFALA I BILIV blong mas ones, talem tru trutok, stap klin, stap kaen, stap stret mo gud, mo mekem gudfala fasin long evri man; blong talem stret, mifala i stap talemaot se mifala i stap folem wanem we Pol i bin tijim—Mifala i biliv long evri samting, mifala i hop long evri samting, mifala i bin winim plante samting, mo mifala i hop blong winim evri samting. Sapos i gat samting we i klin, luk naes, o i gudfala mo i nambawan tru, mifala i lukaotem ol samting ia.