“Japta 12: Misin blong Samuel Smit: Jun 1830,” Ol Doktrin mo Kavenan Stori (2002), 48–50
“Japta 12,” Ol Doktrin mo Kavenan Stori, 48–50
Japta 12
Misin blong Samuel Smit
Jun 1830
Samuel Smit hem i smol brata blong Josef Smit. Jisas i bin wantem Samuel blong go long wan misin. Samuel Smit i fas misinari blong Jos.
Samuel i bin go mo tijim ol pipol abaot gospel mo talem long olgeta abaot Buk blong Momon. Long fas dei hem i bin travel 25 mael, be ol pipol oli bin tritim nogud hem mo oli no bin wantem lisin long hem.
Taem naet i kam, Samuel i bin stop long wan motel. Hem i bin askem long man we i lukaotem motel sapos hem i laekem blong pem wan Buk blong Momon. Man blong lukaotem motel i bin askem Samuel se wea nao hem i tekem buk ia. Samuel i bin talem se brata blong hem i bin transletem aot long ol gol plet.
Man blong lukaotem motel i bin kros. Hem i talem se Samuel i bin giaman mo i talem long hem blong kamaot long motel.
Samuel Smit hem i bin gat tingting i stap daon. Long naet ia, hem i bin slip andanit long wan apol tri.
Nekis moning Samuel i bin go long John Greene, hem i wan lida blong wan nara jos. Mista Greene i no intres long Buk blong Momon, be hem i bin agri blong askem ol pipol blong jos blong hem sapos oli laekem blong pem wan kopi. Taem Samuel i bin gobak afta long tri wik, hem i no bin salem evri buk. Be, waef blong Mista Greene i bin talem se hem i bin ridim buk ia.
Misin blong Samuel Smit i bin had. Taem hem i go hom, hem i no ting se hem i bin mekem gud.
Samuel i no bin save se long taem ia wok blong hem i bin lidim plante pipol i joenem Jos, wetem Mista mo Misis Greene.
Samuel i bin salem wan Buk blong Momon long wan man nem blong hem Phineas Young. Phineas i bin ridim buk ia mo hem i bin givim long brata blong hem, nem blong hem Brigham Young.
Brigham Young i bin ridim Buk blong Momom mo hem i bin bilivim se i tru. Phineas mo Brigham Young i bin talem long sam fren abaot Buk blong Momon, mo olgeta tu oli bin ridim mo oli bin bilif se i tru. I no longtaem afta, Phineas mo Brigham Young mo ol fren blong tufala oli bin joenem Jos.
Afta sam yia nomo, oli bin kolem Brigham Young i kam wan Aposol. Plante yia afta long hemia, hem i kam Presiden blong Jos. Hem wetem olgeta we oli bin konvet tru long wok blong Samuel Smit, oli bin kam ol bigfala lida long Jos.