“Japta 40: Visen insaed long Ketlan Tempol: Epril 1836,” Ol Doktrin mo Kavenan Stori (2002), 155–57
“Japta 40,” Ol Doktrin mo Kavenan Stori, 155–57
Japta 40
Visen insaed long Ketlan Tempol
Epril 1836
Wan wik afta long dedikesen blong Ketlan Tempol, Ol Sent oli bin holem narafala miting long ples ia. Ol Aposol oli bin blesem sakramen, mo Josef Smit mo tufala kaonsela blong hem oli bin pasem sakramen long Ol Sent.
Doctrine and Covenants 110, seksen heding
Afta Josef Smit mo Oliva Kowdri, tufala nomo i bin go long wan ples long tempol, we tufala i bin nildaon mo prea. Afta long prea blong tufala, tufala i bin kasem wan gudfala visen. Tufala i bin luk Lod Jisas Kraes. Ol ae blong Hem oli saen, olsem faea. Hea blong Hem i waet olsem sno, mo fes blong Hem i saen bitim san.
Doctrine and Covenants 110, seksen heding
Jisas i bin talem long Josef mo Oliva plante gudfala samting. Hem i bin talem long tufala blong stap hapi from se Hem i bin fogivim ol sin blong tufala. Hem i glad tumas long tempol mo Hem i bin talem se Ol Sent we oli bin bildim tempol oli sud hapi. Hem i bin akseptem tempol olsem tabu haos blong Hem. Jisas i bin talem se bae Hem i kam long tempol evritaem. Be sapos ol pipol oli no kipim tempol i tabu, Hem bae i no kam.
Afta Josef mo Oliva i bin luk Moses long tempol. Moses i wan profet we hem i bin laef bifo. Hem i bin kambak long wol blong putumbak spesel prishud paoa long Josef mo Oliva. Paoa ia i blong helpem ol pikinini blong Isrel long evri pat blong wol blong oli kam tugeta insaed long Jos. Paoa ia i givim raet tu long profet blong sendem ol misinari blong prijim gospel long evri ples long wol.
Nekiswan, Josef mo Oliva i bin luk Elaesa. Elaesa i bin putumbak long tufala spesel prishud paoa we oli bin givim long Ebraham. Ebraham tu hem i wan profet we hem i bin laef bifo. Wetem paoa ia, Ol Sent oli save gat ol sem spesel blesing we God i bin promesem long Ebraham.
Afta Josef mo Oliva i bin luk Elaeja, narafala profet we hem i bin laef bifo. Elaeja i bin putumbak long tufala spesel prishud paoa blong helpem ol famle we oli stret mo gud. Paoa ia i mekem i posibol blong ol famle oli sil tugeta blong oli save laef tugeta long laef we i no save finis.