Japta 13

Josef mo Emma

Julae 1830

Josef mo Emma Smit i bin laef long wan smol fam long Pensilvania. Tufala i bin lavem wanwan long tufala mo tufala i wok had blong helpem wanwan long tufala.

Josef mo Emma i bin kasem plante hadtaem. Tufala i bin gat wan bebi boe, be hem i bin ded. Tufala i bin harem nogud tumas.

Josef i bin wari abaot famle blong hem. Oli pua, mo hem i bin wantem blong lukaotem gud long olgeta. Hem i nid blong planem ol krop se bae famle blong hem bae oli gat kakae.

Josef i bin wari tu abaot Jos. Sam pipol oli bin gohed blong mekem sam trabol long Ol Sent, mo sam long ol Jos lida oli mas haed long olgeta.

Samtaem Josef i mas aot long haos blong helpem Ol Sent. Josef i bin sore blong livim hom, mo Emma i bin wari taem hem i gowe.

Josef i bin prea blong save wanem blong mekem. Jisas i bin talem long hem blong hem i no blong fraet long ol pipol we oli bin traem blong mekem hem i harem nogud. Jisas i bin talem se Josef i sud gat fasin blong gat longfala tingting long ol hadtaem blong hem. Hem i bin talem se bae Hem i helpem Josef evri taem.

Doctrine and Covenants 24:7, 16–17

Jisas i bin talem se Josef i sud planem ol krop mo afta bae hem i go blong helpem Ol Sent long ol nara eria. Jisas i bin talem tu se bae hem i no wari abaot kakae, ol klos, o mane. Ol Sent bae oli givim hem wanem hem i nidim.

Doctrine and Covenants 24:3, 18

Jisas i bin givim wan revelesen long Josef Smit blong Emma. Jisas i bin talem se Emma Smit i wan spesel woman. Hem i bin jusum hem blong mekem sam impoten wok.

Doctrine and Covenants 25:3

Jisas i bin talem se Emma i sud kamfotem Josef taem hem i fesem trabol. Hem i sud helpem hem blong hem i hapi mo hem i no wari.

Doctrine and Covenants 25:5

Jisas i bin talem se Emma i sud tijim Ol Sent mo helpem olgeta blong lanem ol skripja. Hem i bin talem se Tabu Spirit bae i helpem hem blong save wanem nao blong tijim.

Doctrine and Covenants 25:7–8

Jisas i bin talem tu se Emma i sud yusum taem blong hem blong stadi. Hem i sud lanem mo raetem plante samting.

Doctrine and Covenants 25:8

Jisas i bin askem Emma blong jusum ol singsing blong Ol Sent bae oli singsing long hem. Ol singsing ia bae oli printim olsem wan buk blong singsing.

Doctrine and Covenants 25:11

Papa long Heven i lavem blong harem ol singsing blong ol pipol we oli stret mo gud. Ol singsing blong olgeta oli ol prea long Hem, mo bae ansa blong ol prea ia oli kam wetem wan blesing.

Doctrine and Covenants 25:12

Jisas i bin talem long Emma blong putum tingting blong hem i kam daon mo gat lav long hasban blong hem. Jisas i bin talem long hem blong stap hapi from ol blesing we bae i kam long Josef.

Doctrine and Covenants 25:14

Jisas i bin talem long Emma blong hem i mas stap hapi mo glad. Jisas i bin talem long hem tu blong kipim ol promes blong hem. Sapos hem i save mekem, bae hem i kasem ol bigfala blesing mo bae hem i save gobak blong laef wetem Papa long heven.

Doctrine and Covenants 25:13, 15

Jisas i bin talem se ol samting we Hem i bin talem long Emma Smit oli blong evri pipol.

Doctrine and Covenants 25:16