Japta 28

Profet Josef I Go long Misuri Bakegen

Maj–Mei 1832

Josef Smit i bin kasem wan revelesen we long revelesen ia Jisas i bin talem long hem se Ol Sent oli olsem ol smol pikinini blong Hem. Oli stap lan yet. Jisas i bin talem se oli sud hapi mo talem tangkyu oltaem. Hem bae i lida blong olgeta.

Doctrine and Covenants 78:17–18

Jisas i bin talem se, Hem i bin wantem Ol Sent blong oli lukaotem gud olgeta we oli pua. Hem i bin wantem olgeta blong serem ol samting wetem wanwan long olgeta mo helpem wanwan long olgeta.

Doctrine and Covenants 78:3–6

I no long taem afta we Josef Smit i bin kasem revelesen ia, hem mo sam long ol fren blong hem oli bin go long Misuri bakegen. Ol Sent long Misuri oli bin hapi tumas blong luk hem.

Josef i bin askem Ol Sent blong oli kam long wan miting blong mekem se bae hem i save talem long olgeta abaot revelesen ia.

Long miting, Lod i bin givim long Josef wan narafala revelesen. Jisas i bin hapi se Ol Sent oli bin fogivim wanwan long olgeta. From se oli bin mekem hemia, Hem i talem se bae Hem i fogivim olgeta.

Doctrine and Covenants 82:1

Long revelesen ia Jisas i bin givim tu wan niu komanmen long Ol Sent. Hem i talem se Hem i bin givim long olgeta graon ia blong Saeon, mo oli mas serem graon ia wetem olgeta wanwan. Evriwan i sud gat wanem we hem i nidim. Lod i bin askem tu long Ol Sent blong oli kam andap wetem ol talen blong olgeta mo yusum olgeta blong helpem Jos.

Doctrine and Covenants 82:17–20

Afta long miting, Josef i bin visitim Ol Sent long plante taon. Hem i bin wan hapi taem blong hem. Hem i bin lavem Ol Sent.

Long nara revelesen we Josef i bin kasem taem hem i stap long Misuri, Lod i bin talem se ol hasban oli sud lukaotem gud ol waef blong olgeta. Ol papa mo mama oli sud lukaotem gud ol pikinini blong olgeta.

Doctrine and Covenants 83:2, 4

Lod i bin talem tu se Ol Sent oli sud lukaotem gud ol woman we oli nogat ol hasban. Ol Sent oli sud lukaotem gud ol pikinini we oli nogat ol papa o mama.

Doctrine and Covenants 83:6

Jisas i bin talem se Ol Sent oli sud givim kakae mo ol nara samting long bisop blong putum long wan stoahaos. Hem i bin talem se bisop i sud yusum wanem we i stap long stoahaos ia blong helpem olgeta we oli nogat samting.

Doctrine and Covenants 83:6

Afta Josef Smit i bin komplitim wok blong hem long Misuri, hem wetem Bisop Whitney, tufala i stat blong gobak long Ketlan. Tufala i bin go long wan trak, we ol hos oli pulum.

Wan dei i gat wan samting we i bin mekem ol hos oli fraet mo oli ron hariap.

Josef i bin jiamaot long trak, be hem i no bin kasem eni kil. Bisop Whitney i bin jiamaot long trak mo i brekem leg blong hem.

Josef Smit mo Bisop Whitney i bin stap long wan motel. Bisop Whitney i bin spel long fo wik. Josef i bin stap wetem hem taem leg blong hem i kam gud.

Taem tufala i stap long motel, wan man i bin putum poesen long kakae blong Josef. I mekem se hem i bin sik tumas.

Josef i bin askem Bisop Whitney blong givim wan blesing long hem. Bisop Whitney i bin yusum paoa blong prishud blong blesem Josef, mo hem i bin oraet.

Josef i bin talem tangkyu long God from Hem i bin hilim hem. Taem Josef mo Bisop Whitney i oraet inaf blong travel, tufala i bin go hom long ol famle blong tufala.