“Japta 23: Doctrine and Covenants: Ogis–Novemba 1831,” Ol Doktrin mo Kavenan Stori (2002), 90–92
“Japta 23,” Ol Doktrin mo Kavenan Stori, 90–92
Japta 23
Doctrine and Covenants
Ogis–Novemba 1831
Josef Smit mo sam long Ol Sent oli bin livim Misuri mo gobak long Ketlan, Ohaeo. I no longtaem afta, oli bin holem wan spesel konfrens. Stamba tingting i blong tokabaot printing blong ol revelesen we Lod i bin givim long Josef Smit.
Ol revelesen we Josef i bin kasem oli bin raetem daon, be plante memba blong Jos oli no bin gat ol kopi blong olgeta. Long konfrens, Ol Sent oli bin gat tingting ia blong pablisim ol revelesen ia long wan buk. Buk ia bae oli singaotem Buk blong Ol Komanmen. I no longtaem afta, oli singaotem Doctrine and Covenants.
Jisas i bin givim long Josef Smit tu (2) moa revelesen blong buk ia. Wan i blong stat, mo narawan i blong en. Ol revelesen ia oli bin helpem yumi blong andastanem olsem wanem buk ia mo gospel we i bin kambak, oli impoten tumas.
Doctrine and Covenants 67 mo 133, ol seksen heding
Doctrine and Covenants i talem long evriwan se tru Jos blong Jisas Kraes i stap long wol bakegen.
Doctrine and Covenants i tokbaot prishud. I talem tu long ol man olsem wanem blong yusum paoa ia.
Long Doctrine and Covenants i tokabaot Buk blong Momon. Taem eni man i ridim Buk blong Momon, bae oli save abaot gospel blong Jisas Kraes.
Doctrine and Covenants i bin tijim Ol Sent blong oli serem samting. Olgeta we oli serem samting bae oli fulap wetem Tabu Spirit.
Doctrine and Covenants i tijim ol komanmen blong God. Ol Sent we oli obei long ol komanmen ia bae oli save laef wetem Papa long Heven mo Jisas blong oltaem.
Jisas i bin talem se ol memba blong Jos oli sud ridim Doctrine and Covenants.
Afta long konfrens, Oliva Kowdri i bin tekem ol kopi blong ol revelesen ia i go long Misuri. Hem i bin givim olgeta long Wiliam Phelps, wan memba blong Jos we hem i gat wan printing pres. Oliva i bin askem Brata Phelps blong printim 3000 buk. Be bifo printing i finis, ol rabis man oli bin stopem pres mo spolem gud plante long ol pej ia.
Oli bin pablisim fulwan Doctrine and Covenants long 1835. Ol Sent oli bin talem tangkyu long Papa long Heven from ol revelesen insaed long Doctrine and Covenants.