“Japta 4: Martin Haris mo Ol Pej We Oli Bin Lus: 1827–1828,” Ol Doktrin mo Kavenan Stori (2002), 18–21
“Japta 4,” Ol Doktrin mo Kavenan Stori, 18–21
Japta 4
Martin Haris mo Ol Pej We Oli Bin Lus
1827–1828
Long Pensilvania, Josef i bin stat blong transletem raeting we i stap long ol gol plet. Hem i no save se raeting i minim wanem, be taem hem i yusum Yurim mo Tumim, God i bin helpem hem blong andastanem ol toktok ia.
Martin Haris i bin go long Pensilvania mo helpem Josef long translesen. Taem Josef i stap transletem ol toktok aot long ol gol plet, Martin i raetem long pepa. Josef mo Martin i bin transletem 116 pej blong Buk blong Momon.
Martin Haris i bin wantem tekem 116 pej blong go hom wetem, se bae ol famle blong hem bae oli luk. Josef i bin askem Lod sapos Martin i save tekem ol pej ia, be Lod i bin talem se no. Josef i bin askem bakegen, be Lod i bin talem bakegen se no.
Martin i stil wantem tekem ol pej ia i go long haos. Hem i fosem Josef blong askem Lod wan moa taem. Naoia Lod i talem se Martin i save tekem ol pej ia sapos hem i agri blong soem nomo long waef mo stret famle blong hem.
Martin i bin promes blong obei long Lod. Hem i bin go long haos wetem ol pej ia mo soem olgeta long famle blong hem. Be afta hem i bin brekem promes blong hem mo soem ol pej ia long sam narafala pipol.
Afta Martin i bin go blong tekem ol pej ia. Hem i bin lukaotem evri ples be hem i no faenem olgeta. Ol pej ia oli bin lus.
Afta sam wik, taem Martin Haris i no bin gobak wetem ol pej ia, Josef i bin wari. Hem i bin go long NiuYok blong faenem Martin, hem i bin talem long hem se ol pej ia oli lus. Josef mo Martin, tufala tugeta i bin filim nogud.
Josef i bin gobak long Pensilvania, mo hem i bin prea blong kasem fogivnes. Moronae i bin kamaot mo tekem ol gol plet.
Long wan revelesen, Lod i bin talem long Josef se bae hem i no save translet blong smol taem from se hem i no bin obei. Lod i bin kamfotem Josef, Hem i talem se wok blong Hem bae i go fored, mo Josef hem i man ia yet we Hem i bin jusum blong mekem wok ia sapos hem i sakem sin.
Jisas i bin talem long Josef se Setan i bin mekem ol rabis man blong tekem ol 116 pej ia. Ol man ia oli wantem se bae oli jenisim ol toktok, se bae ol nara pipol bae oli no bilivim Buk blong Momon. Jisas i bin talem se Setan wetem ol rabis man bae oli no save stopem Wok blong God.
Josef i bin sakem sin. I no longtaem afta Moronae i bin putumbak ol gol plet, mo Lod i bin fogivim Josef mo Hem i putumbak presen ia blong translet. Jisas i bin talem long Josef blong hem i no mas wari from ol pej we oli bin lus from se sem stori ia oli bin raetem long wan nara pat blong ol gol plet. Jisas i talem se Josef i sud transletem nara pat ia blong ol plet. Jisas i bin talem tu se plante pipol bae oli ridim Buk blong Momon mo lanem abaot gospel blong Hem.