Seksen 3
Revelesen we Lod i givim long Profet Josef Smit, long Hamoni, Pensilvania, long Julae 1828, long saed blong ol 116 pej blong buk we oli raetem long han mo oli transletem aot long fas pat blong Buk blong Momon, we oli bin singaotem buk blong Lihae. Fastaem Profet i no bin wantem, be hem i bin letem blong ol pej ia oli aot long hem i go long Martin Haris, we i bin wok blong hem blong smol taem olsem man we i raet long translesen blong Buk blong Momon. Revelesen ia i bin kam tru long Yurim mo Tumim. (Luk long seksen 10.)
1–4, Wei blong Lod i olsem wan raon we i no save finis; 5–15, Josef Smit i mas sakem sin o i lusum presen ia blong save tanem ol lanwis; 16–20, Buk blong Momon i kamaot blong sevem laen blong Lihae.
1 I no gat samting o man i save spolem ol wok, mo ol plan, mo ol stamba tingting blong God, mo tu, bae oli no save stopem ol samting ia blong hapen.
2 From God i no wokbaot long ol rod we oli kruked, mo hem i no stap tanem hem i go long raet o i go long lef, mo hem i no stap jenis long wanem hem i bin talemaot, taswe, ol rod blong hem oli stret gud, mo wei blong hem i olsem wan raon we i no save finis.
3 Tingbaot, tingbaot se i no wok blong God we oli spolem, be hem i wok blong man;
4 From nating we wan man i save kasem plante revelesen, mo i gat paoa blong mekem plante bigfala wok, sapos hem i stap tokflas abaot paoa blong hemwan, mo i tingting nating long ol woning blong God, mo i folem wanem we tingting blong hem mo rabis filing blong bodi blong hem i talem long hem, nao hem i mas foldaon mo kasem wanem we God, we i wan stret God, bae i givimbak long hem.
5 Luk, mi God mi bin trastem yu wetem olgeta samting ia, be ol komanmen we mi givim long yu oli strong ia; mo tingbaot tu ol promes we mi mekem long yu sapos yu no brekem olgeta komanmen ia.
6 Mo luk, hamas taem nao yu bin brekem ol komanmen mo ol loa blong God, mo yu bin letem yuwan blong gohed blong folem tingting blong ol man.
7 From, luk, yu no sapos blong fraet long man bitim we yu fraet long God. Nating we ol man oli tingting nating long ol komanmen blong God, mo oli no wantem save long ol toktok blong hem—
8 Yet, yu sapos blong stap fetful; sapos i bin olsem, bae God i save stretem han blong hem i kam long yu mo sapotem yu agensem ol spia blong faea blong enemi; mo bae hem i bin save stap wetem yu long evri taem blong trabol.
9 Luk, yu yu Josef, mo yu nao God i bin jusum blong mekem wok blong Lod, be from se yu bin brekem loa, sapos yu no lukaotgud, bae yu foldaon.
10 Be tingbaot, God i gat fulap sore; from hemia, sakem sin from wanem we yu bin mekem we i agensem komanmen we mi bin givim long yu, mo God i jusum yu yet, mo God i singaotem yu bakegen long wok ia;
11 Sapos yu no mekem samting ia, bae God i livim yu mo bae yu kam olsem ol narafala man, mo bae yu nomo gat presen ia.
12 Mo taem yu bin givimaot wanem we God i bin givim yu blong yu luksave mo gat paoa blong transletem, yu bin givimaot wanem we i tabu i go long ol han blong wan man nogud,
13 we i tingting nating long ol komanmen blong God, mo i bin brekem ol promes we oli moa tabu we hem i bin mekem long fored blong God, mo hem i bin dipen long jajmen blong hem nomo mo i bin tokflas long waes blong hem bakegen.
14 Mo hemia nao from wanem yu bin lusum ol gudfala presen ia blong smol taem—
15 From we yu bin letem blong oli wokbaot antap long komanmen blong hem ia we i stap lidim yu, stat long stat blong wok ia finis.
16 Be, wok blong mi i mas gohed, from we long sem fasin we save ia abaot wan Sevya i bin kam long wol ia, tru long testemoni blong Ol Man Jiu, nao long sem fasin ia tu bae save ia abaot wan Sevya bae i kam long ol pipol blong mi—
17 Mo long ol laen blong Nifae, mo ol laen blong Jekob, mo ol laen blong Josef, mo ol laen blong Soram, tru long testemoni blong ol papa blong olgeta—
18 Mo testemoni ia bae i kam long save blong ol laen blong Leman, ol laen blong Lemyul, mo ol laen blong Ismael, we oli kam slak from oli lusum bilif blong olgeta from rabis fasin blong papa blong olgeta, we Lod i bin letem blong oli kilimded ol brata blong olgeta, Ol Man blong Nifae, from ol rabis fasin mo ol rabis sin blong olgeta.
19 From stamba tingting ia nao Lod i bin holemtaet ol buk ia i stap gud, we oli gat ol histri ia insaed long olgeta—blong ol promes blong Lod, we hem i bin mekem long pipol blong hem, oli save kamtru.
20 Mo blong Ol Man blong Leman oli kasem save blong papa blong olgeta, mo blong oli save ol promes blong Lod, mo blong oli save bilivim gospel ia mo dipen long ol gud wok blong Jisas Kraes, mo kasem glori tru long fasin blong gat fet long nem blong hem, mo we tru long fasin blong sakem sin, bae oli save sef. Amen.