Buk blong Momon i tijim se “evriwan i semmak long God,” hemia olgeta we oli “blak mo waet, slef mo fri, man mo woman” (Seken Nifae 26:33). Truaot long histri blong Jos, ol pipol blong evri kaen kala blong skin mo grup long plante kantri oli bin kasem baptaes mo oli stap laef olsem ol fetful memba blong Jos. Long taem blong laef blong Josef Smit, samfala blak pipol we oli ol man, mo oli memba blong Jos, oli bin odenem olgeta long prishud. Long stat blong histri blong Jos, ol lida blong Jos oli stop blong givim prishud long ol blak pipol we oli man mo oli kamaot long Afrika. Ol rekod blong Jos oli no talemaot klia se praktis ia i stat wea. Ol lida blong Jos oli biliv se i nid blong gat wan revelesen we i kam long God blong jenisim praktis ia, mo oli bin prea blong kasem ansa. Revelesen i bin kam long Presiden blong Jos, Spensa W. Kimbol mo konfemesen i bin go long ol nara lida blong Jos long Sol Lek Tempol long namba 1 Jun 1978. Revelesen ia i karemaot evri samting we oli stopem long saed blong kala blong skin we i bin stap bifo long saed blong prishud.