Long 30 Septemba 1978, long namba 148 Medel Yia Jeneral Konfrens blong Jos Ia blong Jisas Kraes blong Ol Lata-dei Sent, Presiden N. Eldon Tana, Fas Kaonsela long Fas Presidensi blong Jos i bin presentem hemia:

Long stat blong manis Jun long yia ia, Fas Presidensi i bin anaonsem se Presiden Spensa W. Kimbol i bin kasem wan revelesen we i givim prishud mo ol blesing blong tempol i go long evri memba blong Jos, we oli man mo oli klin inaf; Presiden Kimbol i bin askem mi blong talem long konfrens se afta we hem i bin kasem revelesen ia, we i bin kam long hem afta long longfala taem blong tingting kwaet mo prea insaed long ol tabu rum blong tabu tempol, hem i bin presentem hemia i go long ol kaonsela blong hem, we oli bin akseptem mo oli bin apruvum. Afta, oli bin presentem i go long Kworom blong Olgeta Twelef Aposol, mo evriwan i bin apruvum, mo afta long hemia, oli bin presentem i go long evri narafala Jeneral Atoriti, we semmak, evriwan i bin apruvum.

Presiden Kimbol i bin askem blong mi ridim leta ia naoia:

Olsem we mifala i bin witnesem wok blong Lod we i gro bigwan long wol, mifala i bin glad tumas se ol pipol long plante kantri oli bin akseptem mesej ia blong gospel we i bin kambak, mo oli bin joenem Jos mo namba ia i stap gohed blong gro. Nao hemia i bin givim tingting long mifala blong givim, long evri memba blong Jos we i klin inaf, evriwan long ol spesel janis mo blesing we gospel ia i stap givim.

Mifala i savegud long ol promes we ol profet mo ol presiden blong Jos we oli bin stap bifo long mifala oli bin mekem, se long wan taem insaed long plan we i no save finis, blong God, se evriwan long ol brata blong yumi we oli klin inaf oli save kasem prishud; mo from mifala i bin witnesem ol fetful man we Lod i holembak prishud long olgeta, mifala i bin prea blong longfala taem mo mifala i bin prea strong long bihaf blong olgeta brata ia, ol fetful brata blong yumi, mo mifala i bin spenem plante aoa long Rum blong Tempol we I Stap Antap Evriwan, mo krae long Lod blong hem i lidim mifala.

Hem i bin harem ol prea blong mifala, mo tru long revelesen, hem i bin konfemem se dei we hem i bin promesem longtaem finis, i kam, taem we evriwan we i man insaed long Jos, we i fetful mo klin inaf i save kasem tabu prishud, wetem paoa blong yusum tabu atoriti blong hem, mo stap glad, wetem olgeta we hem i lavem, long evri blesing we i kam wetem; wetem ol blesing blong tempol. Folem hemia, evriwan we i man we i memba blong Jos mo i klin inaf, ol prishud lida oli save odenem hem long prishud nomata wanem laen mo kala blong hem. Mifala i givim instraksen long evri prishud lida blong folem polisi ia blong stap mekem gud intaviu long evri kandidet blong oli kasem odinesen long Aronik o long Melkesedek Prishud, blong mekemsua se oli inaf long ol standet blong fasin blong stap klin inaf.

Mifala i talemaot long tabu fasin, se naoia, Lod i bin talemaot tingting blong hem long saed blong ol blesing blong evri pikinini blong hem raon long wol, we oli lisin gud long voes blong ol wokman blong hem we hem i givim raet long olgeta, mo blong oli mekem olgeta oli rere blong kasem evri blesing blong gospel.

Long semtaem we yumi luksave Spensa W. Kimbol olsem profet, sia, mo reveleta, mo presiden blong Jos Ia blong Jisas Kraes blong Ol Lata-dei Sent, i propos se yumi, olsem wan grup we i gat raet, blong yumi akseptem revelesen ia olsem toktok mo tingting blong Lod. Evriwan we i agri, plis soemaot mo leftemap raet han blong yufala. Eniwan we i no agri, i soem long semfala saen.

Vot ia blong sapotem mosen we i stap antap ia, i pas wetem vot blong evriwan we i agri.