Seksen 15
Revelesen we Lod i givim, tru long Profet Josef Smit, i go long Jon Witma, long Feyet, Niu Yok, long Jun 1829 (Luk long heding blong seksen 14.) Mesej ia i bigwan mo i wan sapraes from we Lod i stap tokbaot samting we Jon Witma mo Hemwan nomo i save. Sam taem afta, Jon Witma i bin kam wan long Olgeta Eit Witnes blong Buk blong Momon.
1–2, Han blong Lod i stap ova long ful wol ia; 3–6, Blong prijim gospel mo sevem ol sol i samting we i moa gud.
1 Lisin gud, wokman blong mi, Jon, mo lisin long ol toktok blong Jisas Kraes, Lod blong yu mo Ridima blong yu.
2 From luk, mi toktok long yu, mo mi toktok stret mo wetem paoa, from han blong mi i stap ova long ful wol ia.
3 Mo bambae mi talem long yu wanem we i no gat wan narafala man moa i save, be yu mo mi nomo—
4 From plante taem yu bin askem mi blong yu save wanem bae i moa gud long yu.
5 Luk, mi blesem yu from samting ia, mo from yu bin talemaot ol toktok blong mi we mi bin givim long yu folem ol komanmen blong mi.
6 Mo nao, luk, mi talem long yu, se samting we bambae i moa gud long yu, bae hem i blong yu talemaot fasin blong sakem sin long ol pipol ia, blong yu save tekem ol sol oli kam long mi, blong yu save stap wetem olgeta insaed long kingdom blong Papa blong mi. Amen.