Ofisol Toktok 1
Baebol mo Buk blong Momon i tijim se fasin we wan man i maredem wan woman i standet we God i putum blong mared, be nomo sapos Hem i talem se bae i defren (luk long Seken Samuel 12:7–8 mo Jekob 2:27, 30). Afta we God i givim wan revelesen long Josef Smit, fasin blong man i maredem fulap woman i stat long medel blong ol memba blong Jos long stat long ol yia 1840 (luk long seksen 132). Stat long ol yia 1860 i go kasem ol yia 1880, gavman blong Yunaeted Stet i pasem ol loa blong mekem praktis ia i nomo folem loa. Afta, Suprim Kot blong Y.S. i pasem ol loa ia. Afta we hem i kasem wan revelesen, Presiden Wilfod Wudrof i putumaot Pablik Anaonsmen ia, we Jos i bin akseptem blong i kam long paoa mo man i mas folem; oli pasem long namba 6 Oktoba 1890. Hemia nao i putum en long praktis blong man i maredem fulap woman insaed long Jos.
I Go long Evriwan we I Wantem Save:
From se oli bin stap sendemaot ol nius ripot i go wetem ol stamba tingting blong politik biaen long hem, long Sol Lek i kam, mo oli printim long evri ples, mo i talem se Komisen blong Yuta, long las ripot blong olgeta i go long Sekretari blong Intenal Afea, i talem se oli stap selebretem yet ol mared we man i maredem fulap woman long semtaem, mo se i gat foti o moa long foti kaen mared ia we oli bin mekem long Yuta stat long las manis Jun, o stat long las yia i kam, mo tu, se ol lida blong Jos, long ol pablik toktok, oli bin tijim, leftemap tingting mo askem strong blong fasin blong mared long fulap woman i gohed—
From hemia, mi, olsem Presiden blong Jos Ia blong Jisas Kraes blong Ol Lata-dei Sent, naoia, long wan tabu fasin, mi talemaot se ol toktok ia oli no tru. Mifala i no stap tijim fasin blong man i gat fulap woman o fasin blong man i maredem fulap woman long semtaem, mo mifala i no stap letem blong eniwan i folem fasin ia, mo mi talem se toktok we i talem se i gat foti o wan narafala namba blong ol man we oli maredem fulap woman long taem ia we oli bin selebretem insaed long ol Tempol blong mifala, o long eni narafala ples long kantri, ol toktok ia oli no tru.
I gat ripot blong wan kes, we oli talem se oli bin selebretem mared insaed long Endaomen Haos, insaed long Sol Lek Siti, long Spring blong yia 1889, be mi no save kasem huia nao i bin mekem seremoni ia; wanem we i bin hapen long saed ia, mi mi no save long hem. From samting ia we oli talem se i hapen, folem instraksen blong mi, oli brekem daon Endaomen Haos ia finis.
From se Kongres i bin pasem ol loa we i blokem fasin blong maredem plante woman long semtaem, mo ol loa ia, kot i talem se i stret folem konstitusen, naoia, mi talem se mi gat ful tingting blong folem ol loa ia, mo blong yusum paoa blong mi wetem ol memba blong Jos we mi mi prisaed ova long olgeta, blong mekem se olgeta tu, oli folem semmak.
I no gat wan samting, long ol tijing blong mi i go long Jos, o long ol tijing blong olgeta we oli wok wetem mi, long taem ia we oli tokbaot, we oli save talem o i stap leftemap tingting blong fasin blong maredem plante woman long semtaem; mo taem eni Elda blong Jos i bin yusum lanwis ia we i luk se i stap pasem eni kaen tijing ia, nao oli bin tok strong long hem. Mi, naoia, long pablik, mi talemaot se advaes blong mi i go long Ol Lata-dei Sent se oli mas stop blong mared long wei ia we loa blong kantri i blokem olgeta blong mekem.
Wilfod Wudrof
Presiden blong Jos Ia blong Jisas Kraes
blong Ol Lata-dei Sent.
Presiden Lorenso Sno i bin presentem mosen ia:
“Mi muvum se, from se yumi luksave Wilfod Wudrof olsem Presiden blong Jos Ia blong Jisas Kraes blong Ol Lata-dei Sent, mo from yumi luksave se hem nomo i man long wol, we long taem naoia, i holem ol ki blong ol siling odinens, nao yumi mas tekem se hem i gat ful atoriti tru long paoa blong posisen blong hem, blong hem i givimaot Pablik Anaonsmen ia we oli bin ridim blong yumi harem, mo deit blong hem i namba 24 Septemba 1890, mo olsem wan Jos we yumi kam tugeta long Jeneral Konfrens, yumi akseptem ofisol toktok ia long saed blong fasin blong maredem plante woman long semtaem, olsem wan toktok we i gat paoa mo yumi mas folem.”
Sol Lek Siti, Yuta, 6 Oktoba 1890.
Sam Pat blong Tri Toktok we i kam long
Presiden Wilfod Wudrof
long Saed blong Pablik Anaonsmen
Lod bae i no save letem mi o eni narafala man we i stap olsem Presiden blong Jos ia blong lidim yufala i go rong. Hemia i no stap long plan. Hemia i no stap long tingting blong God. Sapos mi traem blong mekem hemia, Lod bae i karemaot mi long ples blong mi, mo bambae hem i mekem i semmak long eni narafala man we i traem blong lidim ol pikinini blong ol man oli go longwe long olgeta we oli kasem ol revelesen we oli kam long God, mo longwe long diuti blong olgeta. (Namba Sikistiwan Medel Yia Jeneral Konfrens blong Jos, Mandei 6 Oktoba 1890, Sol Lek Siti, Yuta. Oli bin ripotem insaed long niuspepa ia, Deseret Evening News, long namba 11 Oktoba 1890, pej 2.)
I nomata hu i laef mo hu i ded, o hu nao Lod i singaotem blong lidim Jos ia; oli mas lidim Jos tru long toktok we i kam long God we I Gat Olgeta Paoa. Sapos oli no mekem samting ia long wei ia, bae oli no save mekem wok ia nating. …
I no longtaem i pas, mi bin kasem sam revelesen, ol revelesen we oli impoten long mi, mo bae mi talemaot long yufala wanem nao Lod i bin talem long mi. Plis, letem mi mekem yufala i tingbaot se wanem nao oli singaotem pablik anaonsmen. …
Lod i bin talem long mi blong mi askem wan kwestin long ol Lata-Dei Sent, mo tu, Hem i bin talem long mi se: “Sapos oli lisin gud long wanem mi bin talem long olgeta mo oli ansarem kwestin we mi askem long olgeta, tru long Spirit mo paoa blong God, bae evriwan i ansa semmak, mo bae evriwan i biliv semmak long saed blong poen ia.”
Kwestin ia i olsem: ?Wijwan nao i rod we i moa gud blong ol Lata-dei Sent oli folem?—?blong oli gohed blong traem praktisim fasin blong man i maredem fulap woman long semtaem, wetem ol loa blong kantri we i agensem fasin ia mo agens blong siksti milian pipol, mo praes blong pem i blong blokem mo lusum evriwan long ol Tempol, mo stopem evriwan long ol odinens we oli mekem insaed, tugeta blong olgeta we oli laef mo olgeta we oli ded, mo blong mekem se Fas Presidensi mo Olgeta Twelef mo ol hed blong ol famli insaed long Jos oli go long kalabus, mo blong gavman i karembak evri samting blong ol pipol (mo evri samting ia bae i mekem ol memba oli stopem fasin ia)? o, ?afta we yumi bin safa finis from se yumi bin folem prinsipol ia, blong i moa gud blong yumi stopem fasin ia mo stap folem loa, mo taem yumi mekem olsem, yumi livim ol Profet, ol Aposol, mo ol papa long hom, blong mekem se oli save tijim ol pipol mo mekem ol wok blong Jos, mo tu, livim ol Tempol i stap long han blong ol Sent, blong mekem se oli save kasem ol odinens blong Gospel, tugeta, blong olgeta we oli laef mo olgeta we oli ded?
Lod i bin soemaot long mi, tru long visen mo revelesen, wanem stret bae i hapen sapos yumi no stopem fasin ia. Sapos yumi no bin stopem fasin ia, bambae yufala i no nidim … eniwan long ol man ia insaed long tempol ia long Logan; from we evriwan long odinens bae i stop raon long graon blong Saeon. Tingting we i fasfas bae i rul raon long Isrel, mo plante man bae oli go long kalabus. Trabol ia, bae i kasem ful Jos, mo bae yumi mas fos nomo blong stopem fasin ia. Naoia, kwestin i stap se: ?I gud blong fasin ia i stop long wei ia, o long wei we Lod i bin soemaot long yumi, mo livim ol Profet mo ol Aposol mo ol papa blong yumi oli ol fri man, mo ol tempol oli stap long han blong ol pipol, blong mekem se Lod i save pemaot ol dedman? Wan bigfala namba blong ol dedman ia, ol pipol oli mekem olgeta oli kam fri finis long kalabus haos we oli stap long hem long spirit wol, mo ?olsem wanem? ?bae wok i gohed o i stop? Hemia nao kwestin we mi putum i stap long fored blong ol Lata-dei Sent. Yufala i mas skelem samting ia yufalawan. Mi wantem yufala i ansarem kwestin ia blong yufalawan. Bae mi mi no ansarem; be mi talem long yufala se, hemia nao stret ples we yumi, olsem wan pipol, bae yumi stap long hem, sapos yumi no bin tekem rod ia we yumi tekem naoia.
… Mi bin luk stret samting we bae i hapen sapos Jos i no bin mekem wan aksen. I longtaem finis we spirit ia i hevi long tingting blong mi. Be mi wantem talem hemia: mi rere blong letem evri tempol i kamaot long han blong yumi, blong mi go long kalabus, mo blong letem evri narafala man i go long kalabus, sapos God blong heven i no bin komandem mi blong mekem wanem we mi bin mekem; mo taem we aoa i kam we Lod i komandem mi blong mekem hemia, evri samting i klia long mi. Mi bin go long fored blong Lod, mo mi bin raetem wanem we Lod i bin talem long mi blong raetemdaon. …
Mi livim hemia wetem yufala, blong yufala i lukluk mo tingting long hem. Lod i stap mekem wok wetem yumi. (Kaj Stek Konfrens, Logan, Yuta, Sandei 1 Novemba 1891. Oli ripotem insaed long niuspepa ia, Deseret Weekly, long 4 Novemba 1891.)
Naoia, bae mi talemaot long yufala wanem we Lod i bin soemaot long mi mo wanem nao wok blong Pikinini blong God long pablik anaonsmen ia. … Semmak olsem we i tru se God we I Gat Olgeta Paoa i stap laef, nao i tru se evri samting ia bae i mas hapen, sapos Pablik Anaonsmen ia i no bin kamaot. From hemia, Pikinini blong God i filim se i stret blong oli presentem samting ia long Jos mo long wol, from ol stamba tingting we oli stap long tingting blong hemwan. Lod i bin talem wetem atoriti se bae oli stanemap Saeon. Hem i bin talem wetem atoriti se bae oli mas finisim tempol. Hem i bin talem wetem atoriti se bae fasin blong sevem man, blong olgeta we oli laef mo olgeta we oli ded, bae i kamtru long ol vale ia blong ol bigfala hil ia. Mo God we I Gat Olgeta Paoa i bin talem wetem atoriti se, Devel, bae i no blokem wok ia. Sapos yufala i save haremsave hemia, hemia nao ki long samting ia. (I kamaot long wan toktok long nambasikis sesen blong dedikesen blong Sol Lek Tempol, Epril 1893. Toktok we oli taepem abaot ol Dedikesen Seves, Akaev, Jos Histri Dipatmen, Sol Lek Siti, Yuta.)