“Japta 3: Enjel Moronae mo Ol Gol Plet: 1823–1827,” Ol Doktrin mo Kavenan Stori (2002), 13–17
“Japta 3,” Ol Doktrin mo Kavenan Stori, 13–17
Japta 3
Enjel Moronae mo Ol Gol Plet
1823–1827
Tri yia i bin pas afta long fas visen blong Josef. Taem hem i bin gat 17 yia, Josef i bin stap tingting se wanem nao God i bin wantem hem blong mekem. Wan naet Josef i bin prea abaot tingting ia. Hem i bin gat fet se God bae i talem long hem wanem blong mekem.
Josef i bin luk wan laet we i bin stap saen long rum blong hem. Wan enjel i bin stap stanap insaed long laet. Fes blong enjel ia i bin saen tumas. Hem i bin werem wan naesfala waet klos.
Enjel ia i bin talem se nem blong hem Moronae. God i bin sendem hem blong toktok long Josef. Moronae i bin talem se God i gat wan wok blong Josef i mekem.
Enjel Moronae i bin talem long Josef abaot wan buk. Buk ia i abaot ol pipol we oli bin laef long Amerika longtaem bifo. Jisas Kraes i bin kam long ol pipol ia mo tijim olgeta abaot gospel blong Hem.
Moronae i bin talem se buk ia oli bin raetem long ol gol pej we oli singaotem ol plet. Oli bin raetem long wan lanwis we i nogat man long dei blong yumi i save. God i bin wantem Josef blong transletem buk ia i go long Inglis.
Enjel Moronae i bin talem se ol gol plet ia oli bin berem olgeta long wan hil kolosap long hom blong Josef. Moronae i bin talem se i gat tu (2) ston, oli bin singaotem Yurim mo Tumim, oli bin haedem wetem ol plet. Tufala ston ia bae i helpem Josef blong transletem buk ia. Taem Moronae i stap toktok, Josef i bin luk wan visen we i soem hem ples ia we oli bin berem ol plet.
Moronae i bin talem long Josef tu abaot Elaeja, hem i wan bigfala profet we i bin laef bifo. Stori blong Elaeja i stap long OlTesteman.
Moronae i bin talem se Elaeja bae i kambak mo putumbak spesel prishud paoa long wol. Paoa ia bae i mekem i posibol blong ol famle blong oli sil tugeta insaed long tempol blong oli save laef tugeta blong oltaem.
Enjel Moronae i bin gobak, mo afta i bin kambak tu (2) moa taem long naet ia. Hem i bin talem long Josef plante samting long wanwan long ol taem ia we hem i bin kam, afta hem i bin gobak taem moning i stap kam. Josef i bin girap mo go blong wok wetem papa blong hem long fam.
Josef i bin taet tumas blong wok, mekem se papa blong hem i sendem hem i gobak long haos. Taem hem i bin stap go hom, hem i bin foldaon long graon. Moronae i kamaot long hem bakegen mo hem i bin ripitim wanem we hem i bin talem long naet. Taem Moronae i bin gobak, Josef i bin talem long papa blong hem evri samting we Moronae i bin tijim long hem. Papa blong Josef i bin bilivim hem. Hem i save se God i bin sendem Moronae, mo hem i bin talem long Josef blong obei long hem.
Josef i bin go long hil long ples we oli berem ol gol plet. Hem i bin faenem ol gol plet insaed long wan ston bokis we i stap andanit long wan bigfala ston. Yurim mo Tumim i bin stap insaed long bokis ia tu.
Taem Josef i bin stap long hil, enjel Moronae i bin kam long hem. Moronae i no bin letem Josef yet blong tekem ol gol plet ia. Hem i bin talem long Josef blong kam long hil long evri yia long sem dei kasem fo (4) yia.
Josef i bin obei long Moronae mo hem i bin go long Hil Kumora evri yia. Long ples ia, Moronae i bin tijim Josef abaot kingdom blong Lod long wol ia.
Famle blong Josef Smit oli bin pua mo oli bin nidim sam mane. Josef i bin wantem blong helpem famle blong hem, mekem se hem i bin go long taon blong Pensilvania blong wok. Hem i bin laef wetem wan man we nem blong hem Mista Hale.
Mista Hale i gat wan gel we nem blong hem Emma. Josef mo Emma i bin lavem tufala, mo afta tufala i bin mared. Afta tufala i bin gobak mo laef wetem famle blong Josef long Niu Yok, ples we Josef i bin helpem papa blong hem long fam.
Plante manis nomo afta we Josef mo Emma tufala i bin mared, Josef i bin go bakegen long Hil Kumora. Fo (4) yia i pas taem Josef i bin luk ol gol plet fas taem, mo naoia Moronae i bin letem hem blong tekem olgeta. Moronae i talem long Josef blong lukaotem gud ol plet ia.
Plante pipol oli bin harem abaot Josef we hem i bin kasem ol gol plet ia. Oli bin traem blong stilim ol plet ia long hem, be hem i bin haedem gud olgeta i mekem se oli no save faenem. God i bin helpem Josef blong holemtaet ol plet ia oli sef oltaem.
Ol pipol long eria ia oli bin mekem tumas trabol long Josef. Oli stap mekem ol giaman toktok abaot hem mo famle blong hem.
Trabol i bin nogud tumas mekem se Josef mo Emma i bin tingting blong gobak long Pensilvania, we Josef i hop se bae hem i stat blong transletem ol plet ia long wan ples we i gat pis. Wan man, nem blong hem Martin Haris i bin laef kolosap long Josef. Hem i bin gud long Josef mo Emma mo hem i bin givim mane blong helpem tufala i muv.