Japta 19

Kambak Bakegen blong Jisas Kraes

Sam pipol long Ketlan, Ohaeo, oli no bin wantem lanem gospel. Sam oli talem ol giaman toktok abaot Ol Sent blong traem blong stopem ol narawan blong oli no lanem abaot gospel.

Doctrine and Covenants 45, seksen heding

Jisas i bin talem long Josef Smit se Hem bae i kam long wol bakegen i no longtaem. Bifo Hem i kam, evriwan long wol oli mas harem gospel. Ol Sent oli sud stap olsem ol gud misinari mo oli sud wok had blong serem gospel.

Doctrine and Covenants 43:20

Doctrine and Covenants 45

Taem Jisas i bin laef long wol, Hem i bin talem long Ol Aposol blong Hem wanem bae i hapen bifo Hem i kambak bakegen.

Doctrine and Covenants 45:16

Jisas i bin talem long Ol Aposol blong Hem se Tempol long Jerusalem bae oli spolem gud. Ol Jiu bae oli go wanwan long plante kantri, mo plante long olgeta bae oli kilim ded olgeta. Bae i gat plante faet. Pipol bae oli nogat lav long ol narawan, mo bae oli tanem ol tingting blong olgeta long God. Bae i gat ol rabis sik, ol bigfala sik, mo graon i seksek. San bae i tudak, mun bae i olsem blad, mo ol sta bae oli foldaon.

Doctrine and Covenants 45:17–27, 29, 31, 33, 42

Wan impoten taem blong rere from taem we Jisas bae i kambak bakegen long wol, hem i restoresen blong Jos blong Hem. Jisas i bin talem se gospel we i bin kambak i olsem wan laet insaed long tudak.

Doctrine and Covenants 45:28

Plante samting we Jisas i bin tokbaot oli bin hapen. Ol nara samting oli stat blong hapen, mo ol narawan bae oli hapen long taem we bae i kam.

Taem ol samting ia oli hapen, ol pipol we oli stret mo gud bae oli save se Jisas bae i kambak i no longtaem. Bae oli wantem Hem blong kam. Plante Jiu bae oli gobak long Jerusalem. Bae oli harem gospel.

Doctrine and Covenants 45:38–39

Ol Sent we oli stret mo gud bae oli bildim niu siti blong Saeon, ples we bae oli save sef long hem. Bae oli no faet wetem wanwan long olgeta. Bae oli hapi mo singsing long ol singsing blong glad. Ol pipol we oli no stret mo gud bae oli no save go long Saeon.

Doctrine and Covenants 45:65–71

Jisas bae i kambak long wol long wan klaod we i saen we i saen. Ol pipol we oli stret mo gud bae oli luk Hem. Evri pipol we oli stret mo gud we oli bin ded bae oli laef bakegen long ded. Bae oli mitim Jisas long klaod mo kam long wol wetem Hem.

Doctrine and Covenants 45:44–46

Jisas bae i kam long Jerusalem. Hem bae i stanap long wan hil longwe, bae i split long haf. Bae heven mo wol bae oli seksek. Ol rabis pipol bae oli smas gud.

Doctrine and Covenants 45:48–50

Ol pipol long Jerusalem bae oli luk Jisas mo askem, “Wanem mak blong kat long ol han mo fit blong yu?” Hem bae i talem se: “Mi ia Jisas we yufala i bin krusifaem mi. Mi mi Pikinini blong God.” Afta bae ol pipol bae oli krae from sin blong olgeta mo filim sore from oli bin mekem nogud long Jisas.

Doctrine and Covenants 45:51–53

Ol pipol we oli stret mo gud bae oli glad tumas blong luk Jisas. Evri ples long wol bae i blong olgeta. Setan bae i no save traem olgeta. Ol pikinini blong olgeta bae oli gro i kam andap bae i nogat sin. Jisas bae i laef wetem olgeta blong 1000 yia mo bae Hem i King blong olgeta.

Doctrine and Covenants 45:55–59

Jisas i bin talem long Josef Smit blong sendem ol misinari blong talem long evriwan blong sakem sin mo rere from Taem we Kraes Bae i Kambak Bakegen. Jisas i bin talem se bae Ol Sent oli sud rere tu. Oli sud prea, livim kakae, mo tijim ol komanmen long wanwan long olgeta.

Doctrine and Covenants 43:20; 88:76–77

Jisas i bin promes se sapos oli stap kolosap long Hem, Hem bae i stap kolosap long olgeta. Hem i bin talem se oli mas prea, mo Hem i bin promes se bae God bae i givim ansa long olgeta.

Doctrine and Covenants 88:63

Ol Sent oli sud mekem evri samting we oli save mekem blong helpem Jisas. Taem ol pipol oli helpem Jisas, oli kam olsem Hem. Afta bae oli save rere from Taem we Kraes Bae i Kambak Bakegen.

Moronae 7:48