“Japta 39: Oli Bin Dediketem Ketlan Tempol: Jenuware–Maj 1836,” Ol Doktrin mo Kavenan Stori (2002), 151–54
“Japta 39,” Ol Doktrin mo Kavenan Stori, 151–54
Japta 39
Oli Bin Dediketem Ketlan Tempol
Jenuware–Maj 1836
Lod i bin givim oda long Ol Sent blong bildim wan tempol long Ketlan. Ol Sent oli pua, be oli bin sakrifaes mo wok had blong bildim tempol. Oli bin gat fet se Lod bae i helpem olgeta blong mekem wanem Hem i bin askem olgeta blong mekem.
Taem kolosap tempol i finis, sam long ol lida blong Jos oli bin holem wan miting longwe. Long miting, papa blong Josef Smit i bin blesem ol lida blong Jos. Papa blong Josef hem i petriak blong Jos.
Afta Josef Smit i gat wan gudfala visen we hem i bin luk selestial kingdom blong heven. Selestial kingdom i ples we God i stap laef long hem. Josef i bin luk olsem wanem selestial kingdom i luk naes. Hem i bin luk Papa long Heven mo Jisas. Hem i bin luk brata blong hem tu Alvin, we hem i bin ded.
Josef i bin sapraes blong luk Alvin long selestial kingdom from se Alvin i no bin baptaes bifo hem i ded. Jisas i bin eksplenem se plante pipol oli no bin save abaot gospel taem oli bin laef long wol.
Sam long ol pipol ia, olsem Alvin, oli bin laef long taem ia taem tru gospel blong Jisas Kraes i no bin stap yet long wol. Sam long olgeta oli bin laef long ol eria we ol misinari oli nogat janis blong tijim olgeta.
Sam long ol pipol ia bae oli bilivim gospel mo baptaes sapos oli bin save abaot gospel ia long taem we oli bin laef long wol. Ol pipol ia bae oli go long selestial kingdom.
Long visen ia, Josef i bin lanem abaot ol pikinini we oli bin ded bifo oli gat eit yia. Jisas i bin talem se ol pikinini ia bae oli go long selestial kingdom.
I no longtaem Ketlan Tempol i bin finis mo i rere blong oli dediketem. I minim se bae oli givim long Lod mo yusum nomo long wok blong Hem. Ol Sent oli bin gat wan spesel miting blong dediketem tempol.
Plante Sent oli bin kam long miting. Oli bin glad tumas blong gat tempol. Oli bin singsing mo prea long Papa long Heven. Oli bin promes blong folem Profet Josef Smit mo ol nara lida blong Jos.
Josef Smit i bin mekem wan spesel prea blong dediketem tempol. Afta long prea, tempol ia i bin kam wan tabu bilding. Hem i haos blong Lod. Ol enjel oli stap long Ketlan Tempol long dei ia. Tabu Spirit i bin stap wetem Ol Sent. Hem i bin wan gudfala dei!