“Japta 32: Jos blong Jisas Kraes long Ketlan: 1833–1834,” Ol Doktrin mo Kavenan Stori (2002), 123–25
“Japta 32,” Ol Doktrin mo Kavenan Stori, 123–25
Japta 32
Jos blong Jisas Kraes long Ketlan
1833–1834
Lod i bin talem se Josef Smit i sud gat ol man blong oli helpem hem blong lidim Jos. Ol man ia bae oli ol kaonsela blong Josef. Lod i bin talemaot se Sidney Rigdon mo Frederik G. Wiliam, tufala i sud kam ol kaonsela.
Long Maj 1833, Josef Smit i bin odenem tufala kaonsela blong hem long wan tabu miting long Ketlan, Ohaeo. Josef mo ol kaonsela blong hem oli Fas Presidensi blong Jos.
Tedei profet we i stap laef hem i lida blong Jos. Hem wetem ol kaonsela blong hem oli olsem Fas Presidensi blong Jos.
Jisas i bin talem long Josef Smit se Ol Sent oli sud bildim plante Jos bilding. Impoten bilding tumas hem i wan tempol long Ketlan. Ol Sent oli nidim tu blong bildim wan haos blong printing mo wan ples blong Fas Presidensi i wok long hem.
Ol Sent oli sud obei long Lod mo statem blong bildim Tempol blong Ketlan. Hemia i hadwok, mo Ol Sent oli nidim blong help.
Taem plante moa pipol oli bin joenem Jos, Jisas i bin talem long Josef Smit blong jusum moa lida. Hem i bin talem se papa blong Josef i sud kam wan petriak blong Jos. Wan petriak i givim ol spesel blesing long Ol Sent. Tedei i gat plante petriak long plante stek blong Jos.
Jisas i bin talem long Josef tu blong jusum twelef man blong sev long wan hae kaonsel. Ol hae kaonsel oli holem ofis blong hae pris insaed long Melkesedek Prishud. Wan long ol wok blong olgeta hem i blong help, blong lukaot long ol problem we bae i save kam andap long Jos.
Long Febware 1834, Josef Smit i bin oganaesem fas stek blong Jos. Wan stek i gat plante memba blong Jos we oli laef long sem eria. Evri Sent long Ketlan oli stap insaed long fas stek.
Tedei Jos i gat plante taosen blong ol stek ia.