“Japta 46: Josef Smit long Kalabus long Libeti: Novemba 1838–Epril 1839,” Ol Doktrin mo Kavenan Stori (2002), 172–74
“Japta 46,” Ol Doktrin mo Kavenan Stori, 172–74
Japta 46
Josef Smit long Kalabus long Libeti
Novemba 1838–Epril 1839
Josef Smit mo ol fren blong hem oli bin stap long kalabus blong plante dei long Rijmon, Misuri. Afta oli bin tekem olgeta i go long wan kalabus long Libeti, Misuri.
Josef mo ol fren blong hem oli bin stap long kalabus moa long fo manis long Libeti. Oli bin safa tumas. Kalabus ia i kolkol mo i doti, mo samtaem oli bin fasem olgeta wetem ol jen. Oli mas slip long floa nating.
Ol kakae oli nogud tumas. Samtaem i bin gat poesen insaed mo i bin mekem olgeta i sik.
Josef i bin harem nogud tumas. Hem i no save sapos hem mo ol fren blong hem bae oli kamaot long kalabus o no. Hem i bin wari tumas abaot ol famle blong hem mo ol memba blong Jos.
Josef i bin prea blong askem Papa long Heven se hem mo Ol Sent bae oli safa kasem wanem taem. Hem i bin askem Papa long Heven tu blong helpem olgeta.
Taem Hem i bin ansa blong prea ia, Jisas i bin talem long Josef blong gat pis. Hem i bin talem se ol trabol we Josef i fesem bae i stap smol taem nomo. Jisas i bin talem tu se sapos Josef i fetful, bae God i blesem hem. Jisas i bin talem long Josef se ol fren blong hem oli lavem hem yet mo bae i no longtaem bae hem i stap wetem olgeta.
Jisas i bin talem se ol rabis pipol we oli bin mekem nogud long Ol Sent bae oli kasem panis. Olgeta mo ol pikinini blong olgeta bae oli safa. Bae oli nogat prishud.
Jisas i bin talem long Josef se bae plante gud samting bae i hapen long Ol Sent. I nogat wan samting blong stopem God blong i blesem olgeta. Tabu Spirit bae i tijim olgeta ol gudfala samting abaot ol heven mo wol.
Jisas i bin talem long Josef blong hem i no sud fraet long wanem we ol man bae oli bin mekem long hem. Jisas i talem se ol problem mo ol safaring bae oli kam blong gud blong yumi from se oli helpem yumi blong lanem samting. Jisas i bin mekem Josef blong tingbaot bakegen se Jisas hem i bin safa bitim eni man bakegen. Jisas i bin leftemap tingting blong Josef blong hem i mas fetful mo Hem i bin promes se bae God bae i stap wetem hem.