Japta 27

Profet I Gohed Wetem Wok Blong Hem Nomata Ol Hadtaem

Maj 1832

Josef Smit mo Sidney Rigdon i bin gohed long wok blong mekem ol koreksen we i kam tru long insperesen long Baebol. Jisas i bin soem long Josef Smit ol ples we tufala i sud korektem, mo Sidney Rigdon i bin raetem daon olgeta (luk long japta 16).

Josef Smit i no bin andastanem sam pat blong Baebol. Hem i bin prea blong hem i andastanem, mo Lod i bin givim ansa. Plante long ol revelesen insaed long Doctrine and Covenants oli kam olsem ol ansa blong kwestin we Profet i bin askem long Lod taem hem i stap transletem Baebol (luk, blong eksampol, Doctrine and Covenants 76, 77, mo 113).

Jisas i bin glad wetem wok blong Josef. Josef i bin wan bigfala profet.

Long taem ia, Josef mo Emma Smit i bin gat twin bebi, tufala i bin laef blong sam haoa nomo. Fren blong Josef mo Emma i bin gat tufala twin bebi tu. Mama blong tufala twin ia i bin ded, mo papa blong tufala i bin letem Josef mo Emma blong adoptem tufala bebi ia.

Wan naet wan grup blong ol rabis man oli bin go long haos blong Josef. Oli bin brekem doa i open mo oli bin go insaed. Josef i bin karem wan long tufala smol bebi ia, we i bin sik tumas.

Ol man oli bin pulum Josef mo pusum hem i go aotsaed long kolkol naet. Bebi ia i bin stap hemwan, mo faef dei i pas biaen hem i ded.

Ol man oli bin jokem win blong Josef mo traem blong putum poesen long maot blong hem. Botel i brekem wan long ol tut blong hem, mo poesen i bin bonem hem.

Ol man oli bin terem ol klos blong Josef mo putum kolta long skin blong hem. Oli bin kavaremap kolta wetem ol feta mo oli bin faetem hem.

Ol rabis man oli bin ronwe, oli ting se Josef bae hem i ded. Josef i bin traem blong stanap, be i no save. Hem i bin spel smol taem, afta hem i gat smol paoa blong wokbaot fo leg i gobak insaed long haos.

Ol fren blong Josef oli bin klinimaot kolta long bodi blong hem. Hem i had blong karemaot kolta. Skin blong hem i bin bon mo soa.

Nekis dei hem i Sandei. Josef i bin harem bodi blong hem i soa tumas be, hem i bin go long jos mo hem i bin givim wan toktok. Sam long ol man insaed long grup blong ol rabis man oli bin kam long miting mo oli bin sapraes blong luk Josef. Profet i no bin letem olgeta blong stopem hem blong mekem wok blong Lod.