Japta 56

Moa Trabol blong Ol Sent

1843–1844

Plante long ol pipol we oli bin laef kolosap long Nauvu, oli no bin memba blong Jos. Plante long olgeta oli no bin laekem Ol Sent mo oli bin stat blong givim trabol long olgeta.

Sam long ol pipol ia oli bin go tugeta olsem wan grup blong ol rabis man. Oli bin stilim ol animol blong Ol Sent mo oli bonem ol fanis mo ol hom blong olgeta. Oli bin traem blong mekem Ol Sent blong gowe long Nauvu. Ol polis mo ol soldia oli no save stopem ol rabis man. Gavna i no bin wantem helpem Ol Sent.

Josef Smit i bin talem long Ol Sent long Nauvu se bae oli gat trabol. Hem i bin save se samdei bae oli gowe long Nauvu mo bae oli go longwe long wan ples we bae i nogat wan bae i tingbaot olgeta.

Josef Smit i gat wan miting wetem Ol Aposol mo sam nara man. Hem i bin talem long olgeta blong faenem wan ples we Ol Sent bae oli stap long hem sapos oli livim Nauvu.

Josef i bin luk long ol map blong lan. Ol map oli bin soem wan ples we i gat ol hil we i go antap olgeta mo ol big bigfala vale. Josef i bin save se hemia i wan gudfala ples blong Ol Sent.

Sam pipol long Nauvu we oli bin ol memba blong Jos oli bin go agensem. Oli no bin laekem Josef Smit mo oli bin wantem blong kilim hem i ded. Oli bin statem wan niuspepa mo oli bin raetem ol giaman toktok abaot Josef mo Ol Sent.

Ol lida blong siti long Nauvu oli bin kros tumas abaot niuspepa ia. From se oli bin mekem ol giaman toktok, ol lida ia oli bin filim se oli gat stret raet blong stopem. Sam man oli go long ples blong niuspepa mo oli bonem ol niuspepa mo spolem gud printing stoa ia. Hemia i mekem olgeta we oli agensem Jos, oli bin kros tumas.