“Japta 41: Trabol long Ketlan: 1837–1838,” Ol Doktrin mo Kavenan Stori (2002), 158–60
“Japta 41,” Ol Doktrin mo Kavenan Stori, 158–60
Japta 41
Trabol long Ketlan
1837–1838
Ol Sent long Ketlan, Ohaeo, oli bin hapi. Lod i bin blesem olgeta.
Sam elda oli bin livim Ketlan mo oli bin go blong tijim gospel long ol nara eria. Plante pipol oli bin lisin long ol elda mo oli bin joenem Jos.
Trabol i bin stat long Ketlan. Josef Smit mo ol nara lida blong Jos oli bin statem wan bank we plante long Ol Sent oli bin sevem ol mane blong olgeta long bank ia.
Sam long Ol Sent oli bin wantem blong gat plante mane. Wan man we i bin wok long bank i no bin ones. Hem i bin stilim sam mane.
Josef Smit i bin talem long ol nara man blong lukaotem gud mane, be bank i bin gohed blong gat ol problem. I no long taem afta hem i mas klos from se evri mane i bin lus. Hemia i bin wan hadtaem long plante bank long Yunaeted Stet, mo plante narawan tu oli bin klos.
Plante long Ol Sent oli bin kros tumas from se oli no bin save karem bak mane blong olgeta. Sam long olgeta oli bin talem se Josef Smit nao i bin mekem se bank i klos. Sam long ol gudfala fren blong Josef oli bin talem rabis toktok abaot hem. Sam pipol oli bin wantem kilim hem i ded.
Sam long ol lida blong Jos oli bin kros tu. Sam long olgeta oli no bin wantem stap olsem ol memba blong Jos bakegen. Hamas long olgeta oli bin kam ol enemi blong Jos.
Ol nara lida blong Jos oli bin lavem Josef mo oli bin helpem hem. Brigham Young i bin wan long ol gudfala lida ia. Hem i bin talem long Ol Sent se hem i save se Josef i wan profet blong God. Sam pipol oli bin kros tumas long Brigham Young se hem i sapotem Profet, mo hem i bin aot long Ketlan blong mekem se hem i no kasem eni kil.
Ol enemi blong Jos oli bin mekem plante trabol long Ketlan. Oli bin stilim ol samting blong Ol Sent mo spolem gud ol hom blong olgeta. Oli bin mekem kilim Ol Sent mo oli bin mekem nogud toktok long olgeta se bae oli kilim ded sam long olgeta.
Sam long ol elda blong Jos oli bin holem ol miting long Ketlan Tempol mo oli bin tok agensem Josef Smit mo oli bin tokbaot se bae oli jenisim hem wetem wan niu lida. Afta, sam pipol oli bin yusum ol masket mo ol naef blong traem blong tekova long tempol. I no longtaem afta, i no bin sef blong Josef blong stap long Ketlan, mekem se hem i aot long Jenuware 1838 mo hem i bin go long Misuri.
From se trabol i bin stap gohed long Ketlan, ol lida blong Jos oli bin stat blong mekem ol plan blong Ol Sent blong oli aot. Long Julae 1838, moa long 500 memba blong Jos oli bin livim Ketlan. Long Oktoba, afta wan wokbaot we i had tumas, kolosap 1000 mael, oli bin kasem long Fa Wes, long Misuri. Josef Smit mo plante long ol nara Jos memba oli bin laef long ples ia.