Japta 37

Ol Prishud Lida

Febware–Maj 1835

Josef Smit i bin askem ol man long Kamp blong Saeon mo ol narawan blong kam long wan impoten miting long Ketlan, Ohaeo. Josef i bin talem long ol man se Jisas i bin wantem ol twelef Aposol blong oli singaotem olgeta blong oli help blong lidim Jos.

Lod i bin talem long Oliva Kowdri, Deved Witma, mo Martin Haris blong oli jusum Ol Aposol ia. Long miting, Oliva, Deved, mo Martin oli bin kasem blesing tru long Fas Presidensi blong Jos. Afta oli bin prea tugeta mo jusum ol twelef gudfala man.

Doctrine and Covenants 18:37

Ol twelef man ia oli bin odenem olgeta blong kam Ol Aposol. Taem ia we oli kolem Ol Aposol i wan bigfala impoten taem long taem blong restoresen blong Jos blong Lod.

Ol Aposol oli ol impoten lida tumas insaed long Jos. Oli save se Jisas Hem i Sevya blong yumi. Oli tijim gospel long evri ples long wol.

Doctrine and Covenants 107:23–24

Afta sam dei i pas, oli bin jusum ol nara man blong kam ol lida blong Jos. Oli singaotem olgeta Ol Seventi. Ol Seventi oli helpem Ol Aposol.

Doctrine and Covenants 107:25, 34

Wan dei Ol Twelef Aposol oli stap long wan miting. Oli stap rere blong go long ol misin, mo oli wantem Papa long Heven i helpem olgeta.

Ol Aposol oli bin askem Josef Smit blong prea blong kasem revelesen blong helpem olgeta long misin blong olgeta. Jisas i bin givim long Josef mo Ol Aposol wan bigfala revelesen; mo revelesen ia i bin stap tokabot prishud.

Doctrine and Covenants 107, seksen heding

Prishud hem i paoa blong God. Hem i wan bigfala paoa long wol. God i givim prishud long ol man we oli stret mo gud. Oli bin givim raet ia long ol man we oli holem prishud blong oli prijim gospel, mekem ol odinens, mo oli kam ol lida blong Jos.

I gat tu (2) prishud long Jos. Wan hem i Melkesedek Prishud, we oli singaotem tu se hae prishud. Presiden blong Jos, ol kaonsela blong hem, Ol Twelef Aposol, mo Ol Seventi evriwan i gat Melkesedek Prishud.

Doctrine and Covenants 107:1, 22–26

Presiden blong Jos i wan profet blong God. Hem i talem long ol pipol wanem Jisas i wantem olgeta blong mekem. Profet i gat tufala kaonsela we tufala i stap helpem hem. Profet wetem tufala kaonsela blong hem oli Fas Presidensi blong Jos.

Doctrine and Covenants 107:22

Olgeta hae pris tu oli gat Melkesedek Prishud. Plante lida insaed long ol stek mo ol wod oli ol hae pris. Hemia i tekem tu ol stek presiden, ol bisop, mo ol kaonsela.

Doctrine and Covenants 107:10, 12, 17

Ol man we oli odenem olgeta blong kam ol elda, olgeta tu oli gat Melkesedek Prishud. Ol elda oli blong tijim ol memba blong Jos mo lukaotem olgeta.

Doctrine and Covenants 20:38–45; 43:15; 107:7, 11–12

Ol elda oli kolem olgeta tu blong go long ol misin blong tijim gospel long ol pipol long evri ples long wol.

Doctrine and Covenants 133:8

Ol man we oli gat Melkesedek Prishud oli save blesem ol pipol. Bae oli save givim Tabu Spirit tu long ol pipol.

Doctrine and Covenants 20:43; 42:43–44; 107:18

Nara prishud hem i Aronik Prishud, we oli singaotem tu se smol prishud. Aronik Prishud i tekem tu ol ofis blong bisop, pris, tija, mo dikon. Ol pris bae oli save baptaesem ol pipol, blesem sakramen, mo helpem ol elda.

Doctrine and Covenants 20:46–52

Ol tija oli priperem sakramen. Oli go mekem hom tijing mo helpem ol memba blong Jos blong oli laef long wan gudfala laef.

Doctrine and Covenants 20:53–57

Ol dikon oli pasem sakramen. Oli kolektem tu ol fas ofring mo helpem bisop.

Jisas i bin talem long ol man we oli gat prishud blong oli lanem wanem we God i wantem olgeta blong mekem. Sapos oli wok had, Papa long Heven bae i blesem olgeta.

Doctrine and Covenants 107:99