“Japta 2: Fas Visen blong Josef Smit: 1820,” Ol Doktrin mo Kavenan Stori (2002), 9–12
“Japta 2,” Ol Doktrin mo Kavenan Stori, 9–12
Japta 2
Fas Visen blong Josef Smit
1820
Josef Smit mo famle blong hem oli bin bilif long God. Oli bin ridim Baebol tugeta. Papa mo mama blong Josef i bin tijim ol pikinini blong tufala blong oli kam gud.
I bin gat plante Jos long ples we Josef i bin stap laef long hem. Evri pipol oli stap raorao se wijwan jos i raet. Josef i no bin save se wijwan jos bae hem i joenem. Hem i bin wantem blong save se wijwan nao i Jos blong Jisas Kraes.
Wan dei taem Josef i bin gat 14 yia, hem i bin rid insaed long Baebol se yumi save askem God taem yumi wantem save samting. Josef i bin mekem tingting blong hem blong prea mo askem God se wijwan jos bae hem i joenem.
Long wan naesfala dei, Josef i bin go long bus kolosap long hom blong hem. Hem i bin nildaon mo hem i bin prea strong. Hem i bin gat fet se Papa long Heven bae i ansa long prea blong hem.
Setan i no bin laekem Josef blong prea. Hem i bin traem blong stopem Josef mo i bin mekem ples i tudak raon long hem. Josef i bin fraet mo hem i no bin save toktok.
Be Josef i no bin stop blong prea. Setan i nomo save stopem hem.
Afta Josef i bin gat wan visen. Hem i bin luk wan naesfala laet we i saen we i saen evri ples raon long hem. Hem i bin luk Papa long Heven mo Jisas Kraes, Tufala i stanap antap long hed blong hem long ea. Papa long Heven i bin poenem Jisas mo talem se, “Hemia i Pikinini blong Mi we Mi lavem Hem. Lisin long Hem!”
Josef i bin askem Jisas se wijwan jos bae hem i joenem. Jisas i bin talem long Josef blong hem i no mas joenem wan long ol jos ia from se evriwan i rong. Se i nogat wan long olgeta i Jos blong Hem. Hem i bin talem long Josef plante narafala samting. Afta visen i bin stop.
Taem Josef i bin go hom, mama blong hem i bin askem sapos hem i oraet. Josef i bin talem se yes hem i oraet. Afta hem i bin talem long mama blong hem se hem i bin luk wan visen. Hem i bin talem long mama blong hem wanem hem i bin lanem long visen blong hem.
Josef i bin talem tu long sam pipol long taon abaot visen blong hem. Ol pipol oli no bilivim hem. Oli talem se hem i giaman, mo oli stat blong kros mo oli no laekem hem.
Josef i bin stap talem trutok oltaem abaot visen blong hem. Hem i bin save se hem i bin luk Papa long Heven mo Jisas Kraes. Hem i bin save se evri jos long wol oli no tru.