“8–14 Febwari. Doktrin mo Ol Kavenan 12–13; Josef Smit—Histri 1:66–75: “Antap long Hed blong Yufala, Ol Wokman we Yumi Wok Tugeta,” Kam Folem Mi—Blong Praemeri: Doktrin mo Ol Kavenan 2021 (2020)
“8–14 Febwari. Doktrin mo Ol Kavenan 12–13; Josef Smit—Histri 1:66–75,” Kam Folem Mi—Blong Praemeri: 2021
8–14 Febwari
Doktrin mo Ol Kavenan 12–13; Josef Smit—Histri 1:66–75
“Antap long Hed blong Yufala, Ol Wokman we Yumi Wok Tugeta”
Maet ol pikinini we yu tijim oli kam long ol defren situesen mo ol defren nid. Taem yu stap rere, tingting long hao yu save helpem olgeta moa blong oli lanem ol trutok we oli tijim long Doktrin mo Ol Kavenan12–13 mo Josef Smit—Histri 1:66–75.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong serem ol taem, taem we oli bin luk wan man i kasem baptaes o kasem wan prishud blesing. ?Olsem wanem nao Josef Smit mo Oliva Kaodri i kasem prishud?
Stap Tijim Doktrin: Ol Smol Pikinini
Jon Baptaes i bin putumbak Aronik Prishud long wol ia.
Long 15 Mei,1829, Jon Baptaes i bin kamaot long Josef Smit mo Oliva Kaodri mo givim Aronik Prishud long tufala. ?Olsem wanem nao, taem ol pikinini we yu stap tijim oli stap lan abaot taem ia i save blesem olgeta?
Samfala Aktiviti we Yu Save Mekem
-
Talem long ol pikinini abaot wei we Aronik Prishud i bin kambak long wol (luk long Josef Smit—Histri 1:68–70; luk tu long “Japta 6: Oli Givim Prishud long Josef mo Oliva,” Ol Doktrin mo Kavenan Stori, 26–27). O invaetem wan man long wod blong kam long klas mo talem stori olsem we hem i Jon Baptaes, mo ridim long pikinini wanem Jon i bin talem long Josef Smit mo Oliva Kaodri.
-
Soem ol pikja blong Jon Baptaes we i stap baptaesem Sevya mo stap putumbak Aronik Prishud long wol (Gospel Art Buk, 35, 93; luk tu long pikja insaed long aotlaen blong wik ia insaed long Kam Folem Mi—Blong Wanwan Man, Woman mo Famli). Invaetem ol pikinini blong serem wanem oli save abaot wanem i stap hapen long ol pikja ia (luk long Matiu 3:13–17; Doktrin mo Ol Kavenan 13; Josef Smit—Histri 1:68–70).
-
Helpem ol pikinini blong lanem wan singsing abaot prishud, olsem “The Priesthood Is Restored” (Children’s Songbook, 89). Invaetem ol pikinini blong maj raon long rum taem oli stap singsing, mo, wan afta long wan, oli holem pikja we i kam long aotlaen blong wik ia insaed long Kam Folem Mi—Blong Wanwan Man, Woman o Famli.
Prishud i paoa blong God.
Ol lesen abaot restoresen blong Aronik Prishud i ol gudfala taem blong helpem ol pikinini oli andastanem moa wanem nao hem i prishud, mo olsem wanem i save blesem olgeta.
Samfala Aktiviti we Yu Save Mekem
-
Karem sam samting i kam long klas, mo wan ki tu. Soem ol samting ia, mo askem ol pikinini blong lisin long yu taem yu ridim Doktrin mo Ol Kavenan 13 mo faenem ol samting we oli tokbaot insaed long skripja ia. ?Wanem nao yumi save mekem wetem wan ki? Soem wan pikja blong ol samting we yumi save mekem from Aronik Prishud i bin kambak long wol (luk long aktiviti pej blong wik ia; luk tu long Gospel Art Buk, 103–4, 107–8). Talem long ol pikinini olsem wanem prishud i bin blesem laef blong yu.
-
Blong helpem ol pikinini blong lanem sot sentens ia Prishud i paoa blong God, askem olgeta blong klap evri taem oli talem wanwan saon blong ol toktok. Soem wan samting we i nidim batri blong i wok, mo tijim se, olsem we batri ia i givim paoa long samting ia, prishud i karem paoa blong God i kam insaed long laef blong yumi. Serem testemoni blong yu long saed blong ol blesing we i bin kam long yu from prishud ia.
Mi save kasem baptaes.
Josef Smit mo Oliva Kaodri i ridim abaot baptaes long Buk blong Momon, mo tufala i bin wantem save moa. Yu save helpem ol pikinini we yu stap tijim blong stap lukluk fored long baptaes blong olgeta, mo lanem moa abaot tabu odinens ia.
Samfala Aktiviti we Yu Save Mekem
-
Soem vidio blong “Restoration of the Aaronic Priesthood” (ChurchofJesusChrist.org). Stopem vidio wanwan taem blong askem ol pikinini ol kwestin olsem “?From wanem Josef Smit mo Oliva Kaodri i go insaed long ol bus?” mo “?Olsem wanem nao yu ting se Josef Smit mo Oliva Kaodri i bin filim afta we tufala i bin kasem baptaes?” Askem olgeta blong serem olsem wanem oli ting se bae oli filim taem bae oli kasem baptaes.
-
Talem long ol pikinini abaot taem Josef Smit mo Oliva i kasem baptaes (luk long Josef Smit—Histri 1:68-74; luk tu long “Japta 6: Oli Givim Prishud long Josef mo Oliva,” Ol Doktrin mo Kavenan Stori, 26-28). Talemaot gud glad we Josef mo Oliva i bin filim, mo talem long ol pikinini abaot baptaes blong yu. Invaetem olgeta blong droem wan pikja blong olgetawan we bae oli baptaes wan dei.
Pikjawan boe i kasem baptaesMi save kasem baptaes from prishud i bin kambak long wol.
Stap Tijim Doktrin: Ol Bigfala Pikinini
Doktrin mo Ol Kavenan 13; Josef Smit—Histri 1:66–72
Jon Baptaes i bin putumbak Aronik Prishud long wol.
Ol stori blong restoresen blong Aronik Prishud i save helpem ol pikinini we yu stap tijim blong andastanem ol impoten trutok abaot prishud mo ol prishud odinesen.
Samfala Aktiviti we Yu Save Mekem
-
Ridim tugeta Josef Smit—Histri 1:66–72, mo invaetem ol pikinini blong droem ol pikja blong wanem ol ves ia oli stap tokbaot. Afta, mekem ol pikinini oli yusum ol pikja blong olgeta blong talem stori. Invaetem wan man blong serem wan eksperiens abaot wan taem we hem i bin luk oli odenem wan man long wan ofis blong prishud. ?Olsem wanem hemia i semmak long wei we Josef mo Oliva i bin oden olsem we oli tokbaot gud long Josef Smit—Histri 1:66–72?
-
Givim ol pikinini sam minit blong mekem wan lis blong evri samting we oli save abaot Jon Baptaes, mo letem olgeta i serem wanem oli bin raetem. Invaetem ol pikinini blong wok tutu blong ridim ol ves ia mo ademap long lis blong olgeta: Matiu 3:13–17; Doktrin mo Ol Kavenan 13; Josef Smit—Histri 1:66-72.
Mi kasem ol blesing tru long Aronik Prishud.
Yumi kasem fulap blesing tru long Aronik Prishud. ?Wanem nao yu save mekem blong helpem ol pikinini we yu stap tijim blong andastanem se, ol blesing ia, yumi save kasem from prishud we i bin kambak long wol?
Samfala Aktiviti we Yu Save Mekem
-
Putum ol pikja blong wan baptaes mo sakramen long wan kontena we i nidim wan ki blong openem. Tokbaot raon long from wanem ol ki ia oli impoten, mo letem ol pikinini oli yusum ki blong openem kontena. Invaetem ol pikinini blong ridim Doktrin mo Ol Kavenan 13 mo faenem ol toktok mo sot sentens we i tijim olgeta wijwan blesing nao i kam long Aronik Prishud.
-
Soem vidio blong “Blessings of the Priesthood” (ChurchofJesusChrist.org), mo askem ol pikinini blong luksave ol wei we ol pipol insaed long vidio oli kasem blesing from prishud.
Tabu Spirit i save helpem mi blong andastanem ol skripja.
Afta we Josef Smit mo Oliva Kaodri i bin baptaes, Tabu Spirit i bin helpem tufala blong andastanem ol skripja gud moa. Maet hemia i save leftemap tingting blong ol pikinini, se maet oli faenem i had blong andastanem ol skripja.
Samfala Aktiviti we Yu Save Mekem
-
Karem wan simpol pasol i kam long klas, mo invaetem ol pikinini blong putum tugeta. Taem oli stap mekem, askem olgeta olsem wanem we, blong stap ridim ol skripja i semmak long fasin blong putum wan pasol tugeta. Ridim tugeta Josef Smit—Histri 1:73–74, mo invaetem ol pikinini blong serem wanem i bin helpem Josef mo Oliva blong andastanem ol skripja. ?Wanem nao yumi save mekem blong lukaotem help blong Tabu Spirit taem yumi stap stadi long ol skripja?
-
Invaetem ol pikinini blong mekem wan bukmak we oli save putum long ol skripja blong olgeta blong rimaenem olgeta blong lukaotem help blong Tabu Spirit taem oli rid. Maet bae oli save faenem wan sot sentens tru long insperesen, insaed long Josef Smit—Histri 1:74 we bae oli save raetem long bukmak blong olgeta.
Stap Leftemap Tingting blong Lanem Samting long Hom
Sapos yu no gat taem blong ol pikinini oli finisim aktiviti pej long klas, tingting blong sendem sam kopi i go long hom blong olgeta blong ol pikinini oli save wok long hem wetem ol famli blong olgeta.
Stap Kam Antap long Fasin blong Yumi blong Stap Tij
Stap rere mo lisin long Spirit. No filim se yu mas yusum nomo ol aedia long aotlaen ia. Yu save ol pikinini we yu stap tijim; askem Papa long Heven blong gaedem yu long ol bes wei blong helpem olgeta blong lanem gospel doktrin mo bildimap fet blong olgeta.