fam blong Martin Haris

Fam blong Martin Harris, i kam long Al Rounds

22–28 Febwari

Doktrin mo Ol Kavenan 18–19

“Praes blong Wan Sol I Bigwan”

Ol revelesen insaed long Doktrin mo Ol Kavenan, oli bin givim blong fesem sam spesifik situesen kolosap 200 yia i pas, be olgeta prinsipol we oli stap tijim, oli blong evri taem nomo. Lukaotem olgeta prinsipol ia taem yu stap rid, mo tingting long wei we yu save praktisim long laef blong yu.

Raetemdaon Ol Filing mo Tingting blong Yu

Martin mo Lusi Haris, tufala i bin gat wan fam we i wan long beswan long Palmaera, Niu Yok. I bin tekem plante yia blong tufala i pemaot, mo i bin mekem se tufala i save lukaotem wan famli, mo i bin mekem se tufala i gat wan gudfala ples insaed long komuniti. Be long 1829, i bin kam klia se bae oli save pablisim Buk blong Momon nomo sapos Martin i yusum fam blong hem olsem sekiuriti blong pem stoa blong printim buk. Martin i bin gat wan testemoni abaot Buk blong Momon, be i no Lusi. Sapos Martin i gohed blong givim fam olsem sekiuriti, mo bae oli no save salem gud Buk blong Momon, bae hem i save lusum fam blong hem, mo i save putum mared blong hem long denja. Long sam samtaem, yumi evriwan i fesem ol semmak kwestin ia we Martin i bin fesem: ?Gospel ia blong Jisas Kraes, i impoten bigwan long mi, o no? ?Wanem nao mi mi rere blong givim olsem sakrifaes blong help blong bildimap kingdom blong God? Bae i helpem yumi blong tingbaot se i no gat wan narawan moa we i pem wan praes we i moa hae bitim praes we Jisas Kraes, “we [i] hae long evriwan,” i bin pem blong blesem ol pikinini blong God (Doktrin mo Ol Kavenan 19:18).

Martin i bin mekem desisen ia blong yusum fam blong hem olsem wan sekiuriti. Sakrifaes blong hem i bin pem praes blong printim ol fasfala 5,000 kopi blong Buk blong Momon. Mo naoia, i gat moa long 190 milian kopi we oli printim, mo plante plante milian blong ol sol raon long wol, oli bin kasem blesing.

Blong save moa abaot taem we oli pablisim Buk blong Momon, luk long Saints, 1:76–84.

stadi blong yuwan pikja bokis

Sam Aedia blong Skripja Stadi blong Yuwan

Doktrin mo Ol Kavenan 18:10–16

Lod i stap glad taem yumi sakem sin.

Luk hamas taem ol toktok ia, sakem sin mo fasin blong sakem sin oli bin yusum truaot long Doktrin mo Ol Kavenan 18 mo 19, mo tingting hevi long wanem we yu lanem aot long ol toktok ia evri taem we oli yusum. Tingting speseli long Doktrin mo Ol Kavenan 18:10–16; ?ol ves ia oli mekem yu harem olsem wanem abaot fasin blong sakem sin—abaot fasin blong yu blong sakem sin, mo abaot diuti blong yu blong invaetem ol narawan blong sakem sin?

Luk tu long Alma 36:18–21; Dale G. Renlund, “Fasin blong Sakem Sin: Wan Joes we I Mekem Man I Glad,” Ensign o https://www.churchofjesuschrist.org/study/general-conference/2016/10/repentance-a-joyful-choice?lang=bis, Okt 2016.

Doktrin mo Ol Kavenan 18:34–36

Mi save harem voes blong Lod insaed long Doktrin mo Ol Kavenan.

?Sapos wan i askem yu se voes blong Lod i saon olsem wanem, bae yu talem wanem? Tingbaot kwestin ia taem yu stap ridim Doktrin mo Ol Kavenan 18:34–36. ?Wanem nao yu lanem abaot voes blong Lod taem yu stap ridim Doktrin mo Ol Kavenan? ?Wanem nao yu save mekem blong harem voes blong Hem i moa klia?

Doktrin mo Ol Kavenan 19:15–20

Jisas i bin safa blong mekem se mi save sakem sin, mo go long Hem.

Niu Testeman i tokbaot safaring blong Sevya long Getsemane; hemia long lukluk blong olgeta we oli luk hemia i hapen. Insaed long Doktrin mo Ol Kavenan 19:15–20, Jisas Kraes i tokbaot safaring blong Hemwan wetem ol toktok blong Hemwan. Taem yu stap ridim histri ia we i tabu mo i blong Hemwan, lukaotem ol toktok mo ol sentens we i tokbaot safaring blong Sevya. Lukluk long wanwan toktok mo sentens ia, mo tingting se oli tijim wanem long yu. ?From wanem Sevya i bin glad mo rere blong safa? Tingting blong raetemdaon ol filing blong yu abaot Jisas Kraes mo sakrifaes we Hem i mekem blong yu.

Luk long Jon 15:13; Mosaea 3:7; Alma 7:11–12; Doktrin mo Ol Kavenan 18:10–13.

Jisas i stap holem wan smol boe

Praes blong Wan Sol, i kam long Liz Lemon Swindle

Doktrin mo Ol Kavenan 19:26 –27, 34–41

Ol blesing blong God oli moa bigwan bitim ol rij samting blong wol ia.

Oli no bin save salem gud Buk blong Momon long Palmaera, mo olsem wan risal blong hemia, Martin Haris i mas salem wan bigfala ples blong fam blong hem blong save pemaot kaon (luk long “The Contributions of Martin Harris,” Revelations in Context, 7–8). Tingting hevi long sakrifaes ia—mo olgeta blesing we yu bin kasem from sakrifaes ia—taem yu stap ridim olgeta ves ia. Mo tu, yu save tingting abaot wanem Lod i bin askem yu blong sakrifaes long hem. ?Wanem nao yu faenem insaed long ol ves ia we i givim insperesen long yu blong mekem olgeta sakrifaes ia wetem “glad”? (Luk tu long ol ves 15–20).

Doktrin mo Ol Kavenan 19:23

Pis i kam taem yumi stap lanem samting abaot Jisas Kraes mo taem yumi stap folem Hem.

Tingting long invitesen blong Sevya “Lanem samting aot long mi.” ?Wanem nao yumi lanem abaot Jisas Kraes long Doktrin mo Ol Kavenan 19? Raetemdaon ol tingting mo ol filing blong yu, afta, tingting hevi long wei we ol trutok ia abaot Sevya oli stap helpem yu blong faenem pis. ?Hem i minim wanem long yu blong go “wokbaot wetem fasin blong no stap flas we i kam long Spirit blong [Hem]”?

famli stadi pikja bokis

Sam Aedia blong Famli Skripja Stadi mo Famli Haos Naet

Doktrin mo Ol Kavenan 18:1–5.Maet ol memba blong famli oli save serem sam long ol “plante taem” (ves 2) we Spirit i bin soemaot long olgeta se ol skripja oli tru, semmak olsem we Hem i bin mekem wetem Oliva Kaodri. ?Olsem wanem nao famli blong yu i stap “trastem olgeta samting we oli raetem finis” (ves 3) insaed long ol skripja? ?Olsem wanem nao yu save bildimap fandesen blong famli blong yu antap long “strong ston” (ves 4) blong gospel?

Doktrin mo Ol Kavenan 18:10–13; 7:16–19.Wanwan memba blong famli i save ridim Doktrin mo Ol Kavenan 18:10–13 mo riplesem ol toktok ia, “sol,” “ol sol,” mo “evri man” wetem nem blong hem. Afta long hemia, yu save toktokraon long, hao nao, olgeta ves ia oli helpem yumi andastanem hamas yumi impoten long Papa mo long Pikinini (luk long Doktrin mo Ol Kavenan 19:16–19).

Doktrin mo Ol Kavenan 18:21–25.?Olsem wanem long ol nem blong ol memba blong famli blong yu? ?Oli gat spesel mining? Mebi yu save tokbaot from wanem ol nem oli impoten, mo wanem nao i minim blong yumi tekem long yumiwan, nem ia blong Jisas Kraes? (luk long Mosaea 5:7). Hemia i save kam wan gudfala janis blong helpem ol memba blong famli blong oli rere blong tekem nem blong Kraes long olgetawan taem oli kasem baptaes.

Doktrin mo Ol Kavenan 19:15–20.Blong helpem famli blong yu blong gat wan gudfala eksperiens wetem olgeta ves ia, maet yu save ridim olgeta mo semtaem soem wan pikja blong Jisas Kraes (wan we i kam wetem aotlaen ia). Afta, ol memba blong famli oli save serem ol filing blong olgeta abaot Sevya. Sapos yufala i singsing wan fevret hym abaot Sevya, hemia i save invaetem Spirit tu.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Sapraes Tumas we Jisas Hem I Lavem Mi,” STSP, pej 22.

Stap Kam Antap long Stadi blong Yuwan

Askem ol kwestin. Doktrin mo Ol Kavenan i pruf ia we ol kwestin oli lidim yumi long revelesen. Taem yu stap stadi long ol skripja, raetem ol kwestin we oli kam long maen blong yu. Afta, tingting hevi long olgeta mo prea blong lukaotem ol ansa.

Kraes i stap prea insaed long Garen blong Getsemane

Kraes I Stap Prea long Garen blong Getsemane, i kam long Hermann Clementz