Hom blong Pita Witma, i kam long Al Rounds

1–7 Maj

Doktrin mo Ol Kavenan 20–22

“Jos Ia blong Kraes I Stanap”

Taem yu stap rid long Doktrin mo Ol Kavenan 20–22, lisin gud long ol kwaet toktok blong Tabu Spirit. Tingting blong raetemdaon olgeta blong mekem se yu save gobak long olgeta.

Raetemdaon Ol Filing mo Tingting blong Yu

Wok blong Profet Josef Smit blong transletem Buk blong Momon i finis naoia. Be wok blong Restoresen i jes stat. I bin klia, aot long sam revelesen we oli bin kamaot bifo, se, antap long wok blong putumbak doktrin mo atoriti blong prishud, Lod i bin wantem blong putumbak wan stret oganaesesen—Jos blong Hem (luk long Doktrin mo Ol Kavenan 10:53; 18:5). Mekem se long 6 Epril 1830, moa long 40 man we oli biliv oli bin hipap long wud haos blong Witma Famli long Feyet, Niu Yok, blong witnesem oganaesesen blong Jos Ia blong Jisas Kraes.

Be stil, sam pipol oli askem olgetawan: ?From wanem yumi nidim wan Jos we i oganaes? Ansa, haf blong hem oli save faenem long ol revelesen we i go wetem fas miting ia blong Jos long 1830. Long ples ia, ol blesing we oli tokbaot, bae oli no save posibol sapos tru Jos Ia blong Jisas Kraes i no oganaes gud long ol las dei ia (Doktrin mo Ol Kavenan 20:1).

Luk tu long Saints, 1:84–86, mo “Build Up My Church,” Revelations in Context, 29–32.

Sam Aedia blong Skripja Stadi blong Yuwan

Doktrin mo Ol Kavenan 20:1–36

Jos Ia blong Jisas Kraes blong Ol Lata-dei Sent i stanap long tru doktrin.

Seksen 20 oli presentem olsem wan “revelesen long saed blong oganaesesen mo fasin blong lidim Jos” (seksen heding). Be bifo oli aotlaenem ol polisi blong Jos, ol ofis blong prishud, mo ol fasin blong stap mekem ol odinens, revelesen ia i stat wetem fasin blong tijim ol stamba doktrin. Taem yufala i stap ridim ol 36 ves blong revelesen ia, askem yuwan from wanem bae i olsem. Maet bae yu mekem tu wan lis blong ol trutok blong gospel we yu faenem. Hemia samfala eksampol:

• Buk blong Momon mo rol blong hem long Restoresen (ol ves 8–12)

• Fasin blong God (ol ves 17–19)

• Atonmen blong Jisas Kraes (ol ves 20–27)

?From wanem i impoten blong tokbaot plante olgeta trutok ia taem we oli bin stap stanemap Jos?

Doktrin mo Ol Kavenan 20:37, 75–79

Ol tabu odinens oli wan stamba pat blong Jos ia we i kambak.

Taem we oli bin oganaesem Jos, Lod i bin tijim olgeta Sent blong Hem abaot ol tabu odinens, wetem hemia blong baptaes mo blong sakramen. Taem yu stap ridim ol instraksen “long saed blong fasin blong mekem baptaes” long ves 37, tingting abaot baptaes blong yuwan. ?Yu yu gat eni long ol filing ia we oli tokbaot insaed long ves ia? ?Yu yu gat olgeta filing ia naoia? Tingting hevi long wanem yu save mekem blong kipim “wan strong tingting blong wok blong hem kasem en.”

Taem yu stap rid abaot sakramen long Doktrin mo Ol Kavenan 20:75–79, traem ridim olgeta tabu prea ia wetem lukluk blong wan we i stap harem olgeta blong fas taem. ?Wanem niu tingting yu kasem abaot sakramen? ?abaot yuwan? ?Olsem wanem ol niu tingting ia oli jenisim wei we yu bin rere blong tekem sakramen long wik ia?

Sakramen i wan tabu odinens.

Doktrin mo Ol Kavenan 20:38–60

Prishud seves i blesem ol memba blong Jos mo ol famli blong olgeta.

Sapos wan i askem yu blong givim nem blong ol diuti blong wan we i kasem prishud, ?wanem nao bae yu talem? Ridim Doktrin mo Ol Kavenan 20:38–60, we i givim lis blong ol diuti blong ol defren ofis blong prishud. ?I gat eni samting long ol ves ia we i jenisim wei we yu tingting abaot ol diuti blong prishud mo wei we Sevya i stap mekem wok blong Hem? ?Long wanem wei nao yu yu bin gat blesing tru long wok we oli tokbaot insaed long ol ves ia?

Blong lanem abaot wei we ol woman oli stap yusum prishud atoriti insaed long wok blong Jos, luk long Dallin H. Oaks, “The Keys and Authority of the Priesthood,” Ensign o Liahona, May 2014, 49–52.

Doktrin mo Ol Kavenan 21

Jos Ia blong Jisas Kraes, wan profet we i stap laef nao i stap lidim.

?Wanem nao yu save lanem aot ol toktok long Doktrin mo Ol Kavenan 21:4–9 abaot ol toktok blong ol profet blong Lod? Tingting long ol promes we oli tokbaot insaed long ves 6 we i blong olgeta we oli akseptem ol toktok we Lod i givim tru long profet blong Hem. ?Ol promes ia oli minim wanem long yu?

?Olsem wanem nao yu akseptem toktok blong profet we i stap laef “semmak olsem se hem i kamaot long maot blong [God]”? (ves 5). ?Wanem kaonsel nao profet blong tedei i bin givim we i save lidim yu long ol blesing we God i bin promesem long ves 6?

Sam Aedia blong Famli Skripja Stadi mo Famli Haos Naet

Doktrin mo Ol Kavenan 20.?Wanem nao bae yumi talem long wan we i stap askem yumi se from wanem nao yumi nidim Jos? ?Wanem ansa yumi faenem insaed long Doktrin mo Ol Kavenan 20? Luk tu long D. Todd Christofferson, “Why the Church,” Ensign o Liahona, Nov. 2015, 108–11.

Doktrin mo Ol Kavenan 20:69.?Hem i minim wanem blong “wokbaot long tabu fasin long fored blong Lod”? Maet bae i wan gud hapi aktiviti blong ol memba blong famli oli dro o raetem, long ol pis pepa, ol samting we i save helpem olgeta blong wokbaot long tabu fasin, o ol samting we i stap pulumaot tingting blong olgeta blong wokbaot long tabu fasin. Oli save krietem wan rod blong wokbaot long hem, mo oli yusum ol pepa ia, mo bae oli traem wokbaot long rod ia; bae oli putum leg blong olgeta antap long ol droing ia we bae i tekem olgeta i go long Kraes.

Doktrin mo Ol Kavenan 20:37, 71–74.Sapos i gat wan insaed long famli blong yu we i no baptaes yet, olgeta ves ia oli save lidim olgeta blong stori abaot wei blong rere blong kasem baptaes (luk long ves 37) mo olsem wanem oli stap mekem olgeta baptaes (luk long ol ves 71–74). Ol memba blong famli oli save serem ol pikja o ol memori blong dei blong baptaes blong olgeta.

Doktrin mo Ol Kavenan 20:75–79.?Olsem wanem famli blong yu i save yusum olgeta ves ia blong rere blong gat wan eksperiens we i gat mining mo respek wetem sakramen? Maet ol ves ia oli tokbaot sam samting we yu save tingting hevi long olgeta long taem blong sakramen, mo ol memba blong oli save faenem o droem ol pikja blong ol samting ia. Olsem we i stret, yu save tekem ol pikja ia i go long nekis sakramen miting blong rimaenem yufala long wanem blong tingting long hem long taem blong sakramen.

Doktrin mo Ol Kavenan 21:4–7.Tingting blong invaetem ol memba blong famli blong lukaotem ol toktok mo ol sentens insaed long ol ves 4–5 we i stap tijim yumi abaot fasin blong folem profet blong Lod. ?Hem i minim wanem blong akseptem toktok blong God wetem fasin blong save wet longtaem? ?mo wetem fet? ?Wetaem nao yumi bin kasem ol blesing we oli promesem long ves 6?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “The Church of Jesus Christ,” Children’s Songbook, 77.

Stap Kam Antap long Fasin blong Yumi blong Stap Tij

Gat wan laef we i semmak long laef blong Sevya. “Be paoa blong Jisas blong tij mo leftemap ol narawan, i kam long wei we Hem i bin stap laef mo i kam long huia Hem. Moa yu wok strong wetem strong tingting blong traehad blong laef olsem Jisas Kraes, moa bae yu kam blong save tij long wei we Hem i bin tij” (Teaching in the Savior’s Way, 13).

Oliva Kaodri I Odenem Josef Smit, i kam long Walter Rane