“15–21 Maj. Doktrin mo Ol Kavenan 27–28: ‘Evri Samting, Oli Mas Mekem long Oda,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“15–21 Maj. Doktrin mo Ol Kavenan 27–28” Kam Folem Mi—Blong Wanwan Man, Woman mo Famli: 2021
15–21 Maj
Doktrin mo Ol Kavenan 27–28
“Evri Samting, Oli Mas Mekem long Oda”
Elda D. Todd Christofferson i bin talem se, taem yu stap stadi long ol skripja, raetemdaon ol tingting mo ol filing blong yu bambae yu “stap givim wan ples insaed long hat blong yu long toktok blong God, mo bae Hem i toktok long yu” (“When Thou Art Converted,” Ensign o Liahona, May 2004, 11).
Raetemdaon Ol Filing mo Tingting blong Yu
Fasin blong kasem revelesen i bin stil stap olsem wan niu samting long olgeta Sent taem we Restoresen i stap gohed blong hapen. Ol fasfala memba blong Jos, oli bin save se Profet Josef Smit i save kasem revelesen long saed blong Jos, ?be ol narawan, oli save kasem? Ol kwestin olsem oli bin kam series taem we Haeram Pej, wan long Olgeta Eit Witnes long ol buk we oli wokem long gol, i bin biliv se hem i bin kasem ol revelesen long saed blong Jos. Plante fetful Sent oli bin biliv se olgeta revelesen ia, oli bin kam long God. Lod i bin ansa taem Hem i bin tijim se, insaed long Jos blong Hem, “evri samting, oli mas mekem long oda” (Doktrin mo Ol Kavenan 28:13), we i minim blong gat wan nomo we “bambae [Hem] i jusum hem blong kasem ol komanmen mo ol revelesen” blong ful Jos ia (Doktrin mo Ol Kavenan 28:2). Iven long hemia, ol narawan oli save kasem revelesen we i blong olgetawan, long saed blong pat blong olgeta insaed long wok blong Lod. Wanem we i tru i stap, i we, ol toktok blong Lod i go long Oliva Kaodri i mekem yumi evriwan i tingbaot bakegen se: “bambae mi talemaot long yu, … wanem nao bambae yu mekem” (Doktrin mo Ol Kavenan 28:15).
Luk tu long “All Things Must Be Done in Order,” Revelations in Context, 50–53.
Sam Aedia blong Skripja Stadi blong Yuwan
Mi mas tekem sakramen wetem wan ae we i lukluk nomo long glori blong God.
Sali Naet mo Ema Smit, tufala i bin kasem baptaes long Jun 1830, be wan grup blong ol rabis man oli bin spolem taem blong konfemesen blong tufala. Tu manis afta, Sali mo hasban blong hem, Niuwel, i bin go visitim Ema mo Josef, mo oli bin disaedem se oli mas mekem ol konfemesen ia, mo grup ia bae i tekem mo kakae sakramen tugeta. Taem hem i stap go blong tekem waen blong sakramen, wan enjel i bin stopem Josef. ?Wanem nao enjel i bin tijim hem abaot sakramen? (luk long Doktrin mo Ol Kavenan 27:1–4).
?Wanem nao ol ves ia oli stap tijim yu abaot wei we Sevya i wantem yu blong kam blong tekem sakramen? ?Wanem insperesen nao yu filim blong mekem from se yu stap lanem wan samting?
Sakramen, i rimaenem yumi abaot sakrifaes blong Sevya.
Doktrin mo Ol Kavenan 27:15–18
Klos blong faet blong God bae i helpem yumi blong stanap agensem ivel.
Presiden M. Russell Ballard i talem: “I no gat wan samting we i bigwan mo i bigfala we yumi save mekem blong spolem yumi long saed blong spirit. Tru paoa long saed blong spirit, i stap long ol plante smosmol aksen we oli wivim tugeta insaed long wan kaliko blong strong spirit we i protektem mo i blokem yumi long evri ivel” (“Be Strong in the Lord,” Ensign, July 2004, 8).
Taem yu stap ridim Doktrin mo Ol Kavenan 27:15–18, yu save krietem wan jat olsem hemia we i stap andanit ia. ?Wanem nao yu stap mekem blong putum wan pis blong klos blong faet ia we i blong God?
|
Pis blong klos blong faet |
Pat blong bodi we i gat proteksen |
Pat blong bodi ia i ripresentem wanem |
|---|---|---|
|
Jesplet blong stret mo gud fasin |
Hat |
Ol samting we yumi wantem mo ol filing blong yumi |
|
Hat blong fasin blong sevem man |
Hed o maen |
Luk tu long Efesas 6:11–18; 2 Nifae 1:23.
Profet we i stap laef, i voes blong God blong Jos blong Hem.
Tingting se bae i olsem wanem sapos eniwan i save kasem ol komanmen mo revelesen blong ful Jos. Taem we Haeram Pej i bin klemem se hem i bin kasem ol kaen revelesen ia, plante memba blong Jos oli bin konfius. Insaed long Doktrin mo Ol Kavenan 28, Lod i bin talem wan oda blong kasem revelesen blong Jos blong Hem. ?Wanem nao yu lanem aot long seksen ia abaot stret rol blong Presiden blong Jos? ?Wanem nao yu lanem aot long toktok blong Lod long Oliva Kaodri insaed long ves 3? ?Aot long seksen ia, wanem nao yu lanem abaot wei we God i save lidim yu?
Luk tu long Dallin H. Oaks, “Two Lines of Communication,” Ensign o Liahona, Nov. 2010, 83–86.
?From wanem misin blong Oliva Kaodri i go long Ol Man blong Leman i impoten tumas?
Wan stamba tingting blong Buk blong Momon, i we, “Ol Man blong Leman oli kasem save blong papa blong olgeta, mo blong oli save ol promes blong Lod” (Doktrin mo Ol Kavenan 3:20). Hemia i go wetem ol promes we Lod i bin mekem long plante long ol profet blong Buk blong Momon (eksampol, luk long 1 Nifae 13:34–41; Inos 1:11–18; Hileman 15:12–13). Ol fasfala memba blong Jos oli bin tekem se Ol Indien blong Amerika oli laen blong ol pipol insaed long Buk blong Momon. (Jos i stap tedei long toktok ia se Ol Man blong Leman oli “ol stret bubu blong ol Indian blong Amerika” [fas toktok blong Buk blong Momon.].)
Blong ridim moa abaot misin blong Oliva long ol traeb blong Ol Indian blong Amerika we oli bin stap kolosap, luk long “A Mission to the Lamanites” (Revelations in Context, 45–49). ?Wanem nao misin ia i stap tijim yu abaot Lod mo wok blong Hem?
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 27:1–2.?Olsem wanem nao yumi save tingbaot gud moa sakrifaes we Sevya i bin mekem blong yumi taem yumi stap tekem mo kakae sakramen?
-
Doktrin mo Ol Kavenan 27:5–14.?Wanem nao yu lanem abaot Sevya aot long ol ves ia? Yu save lukaotem sam infomesen abaot olgeta insaed long Gaed blong Ol Skripja (olskripja.churchofjesuschrist.org). ?Wanem doa blong blesing nao i bin open blong yumi tru long ol ki we oli bin holem? Blong save moa abaot ol ki ia, luk long Matiu 16:16–19; Doktrin mo Ol Kavenan 110:11–16.
-
Doktrin mo Ol Kavenan 27:15–18.Maet famli blong yu bae i laekem blong mekem smol drama mo priten long wan smol faet wetem sam moa klos blong ripresentem klos blong faet blong God; yu save yusum ol samting olsem ol hat, ol kot, ol epron, o ol sus. ?Olsem wanem nao klos blong faet ia i protektem yumi long faet? Toktok raon long sam rabis paoa we famli blong yu i fesem mo ol samting we yu save mekem blong werem klos blong faet long saed blong spirit. Tingting blong soem vidio ia, “Put on the Whole Armor of God” (ChurchofJesusChrist.org).
-
Doktrin mo Ol Kavenan 28:2–7.?Wanem nao yumi lanem aot long ol ves ia abaot koling blong wan profet? Mebi ol memba blong famli oli save luklukbak long ol mesej we oli kam long profet blong yumi we i stap laef, mo serem olsem wanem kaonsel blong hem i stap helpem yumi blong folem Jisas Kraes.
-
Doktrin mo Ol Kavenan 28:11.Taem yumi wantem stretem wan, ?from wanem hem i impoten blong handelem hemia “bitwin hem mo yu nomo”?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Come, Listen to a Prophet’s Voice,” Hymns, no. 21.
Stap Kam Antap long Stadi blong Yuwan
Stadi long ol toktok blong ol lata-dei profet mo aposol. Ridim wanem ol lata-dei profet mo aposol oli bin tijim abaot ol prinsipol we yu faenem insaed long ol skripja. Tingting blong luklukbak long indeks blong ol topik blong jeneral konfrens, we i stap long conference.ChurchofJesusChrist.org o insaed long Gospel Laebri ap.