“15–21 Maj. Doktrin mo Ol Kavenan 27–28: ‘Evri Samting, Oli Mas Mekem long Oda,’” Kam Folem Mi—Blong Praemeri: Doktrin mo Ol Kavenan 2021 (2020)
“15–21 Maj. Doktrin mo Ol Kavenan 27–28,” Kam Folem Mi—Blong Praemeri: 2021
15–21 Maj
Doktrin mo Ol Kavenan 27–28
“Evri Samting, Oli Mas Mekem long Oda”
Ol trutok we oli tijim long Doktrin mo Ol Kavenan 27–28, oli save mekem testemoni blong ol pikinini we yu stap tijim i kam moa strong. Taem yu stap tingting long ol nid blong ol pikinini, ?wanem nao ol trutok we yu filim blong lukluk nomo long olgeta insaed long klas?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong Profet Josef Smit mo wan pikja blong profet blong naoia. Invaetem ol pikinini blong talem nem blong ol man long ol pikja ia mo serem ol samting we ol profet oli stap mekem.
Stap Tijim Doktrin: Ol Smol Pikinini
Sakramen i helpem mi blong tingbaot Jisas Kraes.
Ol smol pikinini i save lanem from wanem sakramen i impotem mo faenem ol wei blong tingbaot Sevya long taem blong tabu odinens ia.
Samfala Aktiviti we Yu Save Mekem
-
Soem, long ol pikinini, wan pikja blong Jisas we i stap givim sakramen long Ol Aposol blong Hem (luk long Gospel Art Buk, namba 54). ?Bae i olsem wanem blong tekem sakramen wetem Sevya? (luk long Doktrin mo Ol Kavenan 27:5). Ridim Doktrin mo Ol Kavenan 27:2, mo stat wetem “tingbaot long fored blong Papa,” mo askem ol pikinini blong lisin long wanem Sevya i wantem yumi blong tingbaot taem yumi tekem sakramen.
-
Soem sam bred mo wota, mo wan pikja blong Sevya long ol pikinini. Mekem ol pikinini oli holem pikja ia taem yu stap tijim olgeta se sakramen i helpem yumi blong tingbaot Jisas Kraes.
-
Helpem ol pikinini blong tingting long ol samting we oli save mekem blong tingbaot Jisas long taem blong sakramen. ?Wanem nao ol famli blong olgeta oli stap mekem blong helpem olgeta blong stap revren? Invaetem ol pikinini blong droem wan pikja we oli save luk long hem long taem blong sakramen blong helpem olgeta blong tingbaot Sevya.
Doktrin mo Ol Kavenan 27:15–18
Klos blong faet blong God i protektem mi.
Tingting long ol wei we yu save helpem ol pikinini we yu stap tijim blong luk olsem wanem, we, blong stap obei ol komanmen, i olsem blong werem klos blong faet blong God.
Samfala Aktiviti we Yu Save Mekem
-
Soem long ol pikinini wan pikja blong klos blong faet (luk long aotlaen blong wik ia long Kam Folem Mi—Blong Wanwan Man, Woman mo Famli.) Taem yu stap ridim Doktrin mo Ol Kavenan 27:15–18, helpem ol pikinini blong faenem ol defren pis blong klos blong faet long pikja. Talem long ol pikinini olsem wanem klos blong faet blong God i bin helpem yu blong “save stanap agensem rabis dei ia” (ves 15).
-
Aotlaen blong Efesas insaed long Kam Folem Mi—Blong Praemeri: Niu Testeman 2019 i gat wan aktiviti pej abaot klos blong faet blong God. Katemaot ol defren pis blong klos blong faet, mo mekem ol pikinini oli putum long wan giaman man long semtaem we yu stap ridim Doktrin mo Ol Kavenan 27:15–18. Helpem ol pikinini blong andastanem ol samting we oli save mekem blong werem klos blong faet blong God, olsem: blong stap prea, stap jusum raet, stap givim seves long ol narawan, mo i go i go.
Pikjaol pikinini i stap plepleiMi save werem klos blong faet blong God.
Doktrin mo Ol Kavenan 28:2, 6–7
Profet i lidim Jos.
Ol pikinini we yu stap tijim, ?oli save from wanem yumi gat ol profet? Yusum Doktrin mo Ol Kavenan 28 blong helpem olgeta blong save se profet hemwan nomo i save lidim Jos.
Samfala Aktiviti we Yu Save Mekem
-
Ridim o talem long toktok blong yuwan, stori blong Haeram Pej (luk long “Japta14: Profet mo Ol Revelesen blong Jos,” Ol Doktrin mo Kavenan Stori, 56–57). Serem testemoni blong yu se Papa long Heven mo Jisas Kraes i bin jusum Josef Smit blong lidim Jos long taem blong hem (luk long Doktrin mo Ol Kavenan 28:2). Serem testemoni blong yu se Lod i bin singaotem profet blong naoia blong i lidim Jos ia blong Hem long taem blong yumi.
-
Askem ol pikinini blong pleplei “folem lida”—wan pikinini i save stanap long fored blong rum, mo ol nara pikinini i save kopi wanem samting we bae hem i mekem. Hemia i save lidim olgeta blong toktok raon long from wanem yumi stap folem profet. Yu save soem wan pikja blong Jisas Kraes. Mo tokbaot strong se yumi folem profet from hem i folem Sevya mo hem i stap talem ol toktok blong Sevya.
Stap Tijim Doktrin: Ol Bigfala Pikinini
Sakramen i helpem mi blong tingbaot Jisas Kraes.
?Olsem wanem nao we, taem yufala i stap lanem ol prinsipol we oli stap long Doktrin mo Ol Kavenan 27:1–2 i helpem ol pikinini we yu stap tijim blong gat wan eksperiens we i gat moa mining blong stap tekem sakramen?
Samfala Aktiviti we Yu Save Mekem
-
Invaetem ol pikinini blong raetemdaon ol samting we oli ting se Sevya bae i wantem olgeta blong save, abaot sakramen. Sapos i nid, oli save ridim “Sakramen” insaed long Gaed long Ol Skripja (olskripja.ChurchofJesusChrist.org). Mekem olgeta oli serem sam samting we oli bin raetem, mo askem olgeta blong ademap long lis blong olgeta afta we oli ridim Doktrin mo Ol Kavenan 27:1–2. ?Olsem wanem ol samting long lis blong olgeta bae i gat paoa blong jenisim wei we oli stap tekem sakramen evri Sandei?
-
Helpem ol pikinini blong tingbaot wanem i minim blong tekem sakramen wetem “wan ae we i lukluk nomo long glori blong [God]” (ves 2). Toktok raon long ol kwestin olsem ia: ?Wanem nao sam samting we i stap karemaot ae o maen blong yumi blong i stap lukluk nomo long Hem long taem blong sakramen? ?Wanem nao yumi save mekem blong lukluk nomo long Sevya taem yumi stap tekem mo kakae sakramen? ?Olsem wanem nao hemia i helpem yumi blong folem Hem evri dei?
Doktrin mo Ol Kavenan 27:15–18
Klos blong faet blong God i helpem mi blong stanap agensem ivel.
Ol pikinini we yu tijim bae oli fesem fulap ivel paoa truaot long laef blong olgeta. Papa long Heven i wantem blong helpem olgeta blong stanap agensem ivel. ?Olsem wanem yu save givim insperesen long olgeta blong putum klos blong faet blong God?
Samfala Aktiviti we Yu Save Mekem
-
Invaetem ol pikinini blong ridim Doktrin mo Ol Kavenan 27:15–18 mo droem ol pis blong klos blong faet we oli bin tokbaot (sapos i nid, oli save lukluk i go long pikja long aotlaen blong wik ia insaed long Kam Folem Mi—Blong Wanwan Man, Woman mo Famli). Ol toktok we oli tokbaot gud wanwan long ol pis klos blong faet ia, ?oli stap tijim wanem long yumi abaot wanem yumi nidim blong mekem blong faet agensem ol ivel raon long yumi? (Eksampol, yumi nidim fasin we i stret mo gud, fet, plan blong fasin blong sevem man, mo i go i go).
-
Invaetem ol pikinini blong tingting long ol samting we oli save mekem blong stanap strong agensem ol temtesen raon long olgeta. Askem olgeta blong finisim sentens ia wetem ol aedia blong olgeta: “Yumi werem klos blong faet blong God evri dei taem yumi …” Helpem olgeta blong luk olsem wanem ol traehad blong olgeta blong kam long Kraes oli stap helpem olgeta blong werem klos blong faet blong God.
Doktrin mo Ol Kavenan 28: 1–7, 15
Papa long Heven i stap lidim mi tru long Tabu Spirit.
Doktrin mo Ol Kavenan 28:1–7, 15 i save helpem ol pikinini we yu stap tijim blong andastanem se Tabu Spirit i save lidim evriwan, be revelesen blong Jos, oltaem bae i kam long yumi tru long profet.
Samfala Aktiviti we Yu Save Mekem
-
Talem stori blong Haeram Pej we i mekem giaman toktok se hem i kasem ol revelesen blong Jos (luk long “Japta14: Profet mo Ol Revelesen blong Jos,” Ol Doktrin mo Kavenan Stori, 56–57). ?Olsem wanem nao bae yumi fesem ol giaman toktok blong Haeram Pej? Ridim tugeta Doktrin mo Ol Kavenan 28: 1–7, 15 blong kasem sam aedia.
-
Helpem ol pikinini blong luklukgud long ol skripja ia blong mekem wan lis blong ol wei we Tabu Spirit i save lidim olgeta: Doktrin mo Ol Kavenan 28:1, 4, 15; Jon 14:26; Moronae 8:26; 10:4–5. Mekem olgeta oli wok tutu sapos i help. ?From wanem presen ia we i Tabu Spirit i impoten tumas? Serem olsem wanem Tabu Spirit i bin lidim yu.
Stap Leftemap Tingting blong Lanem Samting long Hom
Invaetem ol pikinini blong askem ol papa mo mama blong olgeta sapos oli save tijim wan lesen we oli bin lanem long klas long wan famli haos naet.
Stap Kam Antap long Fasin blong Yumi blong Stap Tij
Yusum miusik. Ol singsing blong Praemeri mo ol hym oli save helpem ol pikinini blong ol defren yia blong oli andastanem mo yusum ol trutok blong gospel long wan wei we bae oli tingbaot oltaem. Oli save helpem ol pikinini tu blong gat strong tingting blong stap lanem samting.