Evri Ni Bae I Bodaon, i kam long J. Kirk Richards

22–28 Maj

Doktrin mo Ol Kavenan 29

“Jisas Kraes Bae I Karem I Kam Wanples Ol Pipol blong Hem”

Yu save ol pikinini we yu stap tijim, mo i gat fulap trutok long Doktrin mo Ol Kavenan 29 we i save blesem olgeta. Folem insperesen blong Spirit taem yu stap stadi long seksen 29, mo raetemdaon ol tingting mo ol filing abaot olsem wanem bae yu tijim ol trutok ia long ol pikinini.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Tingting blong invaetem sam pikinini blong serem sam wei we oli stap lanem gospel long hom—wanwan man mo woman o wetem famli blong olgeta. Invaetem wan o moa pikinini blong serem testemoni blong olgeta long wan samting we oli bin lanem long wik ia long hom.

Stap Tijim Doktrin: Ol Smol Pikinini

Doktrin mo Ol Kavenan 29:1–2

Jisas Kraes bae i karem ol pipol blong Hem oli kam wanples bifo Hem i kambak bakegen.

Yumi bin kam tugeta wanples tru long Sevya taem yumi akseptem mo folem ol tijing blong Hem.

Samfala Aktiviti we Yu Save Mekem

• Mekem ol pikinini oli kalarem aktiviti pej blong wik ia long semtaem we yu stap soem vidio ia: “Chicks and Hens” (ChurchofJesusChrist.org). Askem ol pikinini blong lisin long olsem wanem mama faol i protektem ol pikinini blong hem.

• Ridim Doktrin mo Ol Kavenan 29:1–2, mo afta, aktemaot wanem i semmak, mo wanem i defren long wei we Kraes i karem ol pipol blong Hem oli kam tugeta wetem wei ia we “wan mama faol i karem i kam wanples ol smol pikinini blong hem.” Wan pikinini i save aktem mama faol mo jusum wan kona blong rum blong stanap long hem. Taem hem i “singaot (olsem faol),” mekem evri pikinini i kam tugeta raon long hem. Wanwan long ol pikinini i save tekem wanwan raon blong hem blong kam mama faol. Holem wan pikja blong Sevya i go antap, mo invaetem ol pikinini blong kam tugeta raon long Hem. Serem wetem ol pikinini olsem wanem Jisas i stap helpem yumi taem yumi kam tugeta raon long Hem.

  

  Hamas Taem i kam long Liz Lemon Swindle

Doktrin mo Ol Kavenan 29:2–11

Mi save rere blong mitim Sevya.

Sam dei, bae wanwan long yumi bae i stap long ples we Jisas Kraes i stap long hem. Maet bae dei ia bae i hapen longtaem yet long fiuja, be ol pikinini oli stil save tingbaot se bae i olsem wanem, mo olsem wanem nao oli save rere from.

Samfala Aktiviti we Yu Save Mekem

• Soem wan pikja blong Sekem Kaming (luk long Gospel Art Buk, namba 66), mo helpem wan pikinini blong ridim Doktrin mo Ol Kavenan 29:11. Helpem ol pikinini blong luksave ol sot sentens long skripja we i tokbaot gud wanem oli luk long pikja ia. Serem wetem ol pikinini olsem wanem yu filim abaot Jisas Kraes we bae i kambak bakegen long wol ia.

• Olsem wan klas, singsing wan singsing abaot Seken Kaming, olsem “When He Comes Again” (Children’s Songbook, 82–83). Soem long ol pikinini ol pikja blong ol samting we oli save mekem blong rere blong mitim Sevya mo laef wetem Hem blong oltaem (luk long Gospel Art Buk blong gat sam aedia). Helpem olgeta blong faenem ol nara wei blong rere long Doktrin mo Ol Kavenan 29:2–10.

Stap Tijim Doktrin: Ol Bigfala Pikinini

Doktrin mo Ol Kavenan 29

Papa long Heven i bin rere long wan plan blong fasin blong sevem man, blong mi save folem.

Moa wan pikinini i save abaot plan blong fasin blong sevem man we i kam long God, moa bae hem i praktisim fet blong hem long Papa long Heven mo Jisas Kraes blong folem plan ia. ?Wanem pat blong plan nao yu filim blong yu mas lukluk nomo long hem?

Samfala Aktiviti we Yu Save Mekem

• Askem sam pikinini blong serem wan eksampol blong wan taem we oli bin gat wan plan, olsem wan trip, o blong finisim wan wok. Yu save serem ol eksampol blong ol plan ia, olsem wan kalenda wetem ol aktiviti we oli raetem long hem, o ol instraksen blong mekem wan samting. ?From wanem ol plan oli gat gudfala yus? Serem wetem ol pikinini se Papa long Heven i gat wan plan we bae i mekem yumi save kam olsem Hem.

• Blong helpem ol pikinini blong andastanem plan blong God, mekem ol saen wetem ol toktok ia: laef bifo laef long wol ia, Kriesen, Foldaon, laef long wol ia, mo Seken Kaming. Afta we yu eksplenem wanwan long ol toktok ia (luk long Doktrin mo Ol Kavenan 29:9–45), givim wanwan saen long wan defren pikinini, mo askem olgeta blong stanap long wan laen long stret oda blong soem wanem taem bae ol samting ia bae oli hapen long plan blong Papa long Heven. Wanwan pikinini i save serem wanem hem i save abaot saen we hem i gat. Helpem ol pikinini blong luk olsem wanem we, taem yumi save abaot plan blong Papa long Heven, bae i helpem yumi blong kam moa olsem Hem mo Sevya.

• Yusum wan o fulap aktiviti we oli stap daon ia blong tijim ol trutok abaot plan ia mo olsem wanem yumi praktisim olgeta trutok ia tedei. Tingting blong askem sam pikinini blong kam mo rere blong helpem yu blong tij.

  • Fridom blong Mekem Joes. Helpem ol pikinini blong andastanem se Papa long Heven i bin givim presen blong fridom blong mekem joes—fridom blong jusum samting—mo yumi responsibol long ol joes blong yumi (luk long Doktrin mo Ol Kavenan 29:39–40). Mekem tu (2) saen blong wanwan pikinini: wan i ripresentem gud joes (eksampol, wan fes we i smael,) mo wan we i ripresentem nogud joes (eksampol, wan fes we i no hapi). Serem sam eksampol blong ol gudfala joes mo blong ol nogud joes, mo askem ol pikinini blong leftemap stret saen. Askem ol pikinini blong serem ol blesing we oli kam taem yumi folem Jisas Kraes. ?From wanem nao Papa long Heven i letem yumi blong mekem ol joes blong yumiwan?

  • Ol Komanmen. Invaetem ol pikinini blong mekem wan lis long bod blong sam long ol komanmen. (Eksampol, oli save lukaot long Eksodas 20:3–17 mo Gospel Art Buk, 103–15.) ?From wanem nao Papa long Heven i givim ol komanmen long yumi? ?Wanem nao yumi lanem aot long Doktrin mo Ol Kavenan 29:35 abaot ol komanmen blong Papa long Heven?

  • Atonmen blong Jisas Kraes. Helpem ol pikinini blong luk se Papa long Heven i bin mekem wan wei i rere blong yumi save kasem fogivnes taem yumi mekem ol rong joes. Askem wan long ol pikinini blong ridim wan long ol ves ia long Doktrin mo Ol Kavenan 29:1, 42–43 mo serem wanem ves ia i stap tij abaot Atonmen blong Sevya. Faenem wan wei blong invaetem ol pikinini blong serem wanem oli bin faenem, olsem long oda blong ol betdei blong olgeta, o stat long sot kasem tol, mo i go.

Doktrin mo Ol Kavenan 29:1–2

Jisas Kraes bae i karem ol pipol blong Hem oli kam wanples bifo Hem i kambak bakegen.

?Olsem wanem nao yu save helpem ol pikinini we yu stap tijim blong stap glad blong helpem Isrel i kam tugeta?

Samfala Aktiviti we Yu Save Mekem

• Invaetem ol pikinini blong ridim Doktrin mo Ol Kavenan 29: 1–2 mo lukaotem wanem nao Lod i stap komperem Hemwan long hem. ?Wanem nao ol pikinini oli stap pikjarem taem oli ridim ol samting we i semmak mo defren? ?Wanem nao Lod i talem se bae yumi mas mekem blong Hem i mekem yumi kam tugeta long wanples?

• Wan wei blong mekem ol pikinini i glad abaot kam tugeta i blong serem stori blong wan man we i bin joenem Jos. Eksampol, ?huia i bin presentem famli blong yu long Jos? Tingting blong askem ol pikinini bifo taem blong oli faenemaot abaot fas memba blong Jos long famli blong olgeta mo serem stori blong olgeta long klas.

• Invaetem ol pikinini blong mekem wan lis blong ol wei we oli save helpem ol pipol blong kam tugeta long Sevya. Eksampol, oli save invaetem ol fren o ol memba blong famli i kam long wan Praemeri aktiviti o long wan famli haos naet wetem famli blong olgeta.

• Nambaten toktok blong bilif i tokbaot kam tugeta blong Isrel. ?I gat eni pikinini we i save toktok blong bilif ia baehat? Sapos yes, invaetem olgeta blong talem long klas. Sapos no, helpem olgeta blong putum wan gol blong lanem baehat.

Stap Leftemap Tingting blong Lanem Samting long Hom

Invaetem ol pikinini blong raetemdaon wan trutok we oli bin lanem long klas. Askem sapos i gat sam aedia abaot wanem bae oli mekem blong serem trutok ia wetem famli blong olgeta.

Stap Kam Antap long Fasin blong Yumi blong Stap Tij

Lisingud wetem tingting blong yu. Lisingud wetem tingting blong yu long wei we ol pikinini long klas blong yu oli stap tekpat long ol aktiviti blong stap lanem samting. Sapos oli no save stap kwaet, maet hem i taem blong traem wan nara aktiviti o go wokbaot. Sapos yu luksave se ol pikinini oli stap tekpat mo lisin mo stap lanem samting, no filim se yu mas fos blong mas gohed.