Kraes we oli katem pikja blong hem long Ston

29 Maj–4 Epril

Ista

“Mi Mi Hem Ia we I Stap Laef, Mi Mi Hem we Oli Bin Kilim Hem I Ded”

Wan Ista Sandei Praemeri Klas i wan gudfala janis tumas blong helpem ol pikinini blong mekem fet blong olgeta long Jisas Kraes mo long Atonmen blong Hem i kam strong moa. Lukaotem givhan blong Spirit long wei blong mekem hemia. Yu save faenem sam aedia we i save help long aotlaen ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Letem ol pikinini oli serem wetem yu wanem oli save abaot from wanem yumi selebretem Ista. Askem olgeta wanem ol famli blong olgeta i stap mekem blong selebretem Jisas Kraes we i bin Girap Bakegen Long Ded long taem blong Ista. O letem olgeta i serem wanem oli stap lanem abaot Jisas Kraes long hom mo long ol skripja.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 138:11-17

From Jisas Kraes, bambae mi laef bakegen long ded.

Taem yu stap tijim ol pikinini abaot Jisas Kraes we I Girap Bakegen Long Ded, Doktrin mo Ol Kavenan 138:11–17 i save helpem yu eksplenem wanem i minim blong laef bakegen long ded. Ol ves ia i save help tu blong bildim fet blong olgeta se bae oli laef bakegen long ded sam dei.

Samfala Aktiviti we Yu Save Mekem

• Soem ol pikja blong wan ded, taem oli berem wan man, mo Sevya we i laef bakegen long ded (luk long Gospel Art Buk, namba 57, 58, mo 59). Askem ol pikinini wanem oli save abaot ol taem ia. Testifae se Jisas i bin ded from yumi mo i girap bakegen long ded mekem se yumi evri wan i save laef bakegen afta we yumi ded.

• Tingting long wan lesen we i yusum wan samting we i save helpem ol pikinini blong andastanem wanem i hapen taem yumi ded (ol spirit blong yumi mo bodi i seperet) mo taem yumi laef bakegen long ded (ol spirit mo bodi blong yumi i kambak tugeta). Eksampol: ?wanem i hapen taem yumi karem batri aot long wan toj o kontena blong ing aot long wan pen? ?Wanem i hapen taem ol samting ia oli kam wan bakegen?

• Rid long ol pikinini long Doktrin mo Ol Kavenan 138:17: “Spirit mo bodi [bae] i joen wan bakegen blong i neva seperet bakegen, blong mekem se oli save kasem wan glad we i fulwan.” ?From wanem yumi talem tangkyu from ol bodi blong yumi? Serem glad ia we yu filim blong save se bae yumi evriwan i laef bakegen long ded mo gat bodi blong yumi bakegen.

• Singsing tugeta wan singsing abaot Laef Bakegen long Ded, olsem “Did Jesus Really Live Again?” o “Jesus Has Risen” (Children’s Songbook, 64, 70). Givim ol pikja we ripresentem ol toktok o ol sot sentens long wan singsing long ol pikinini (eksampol, luk long Gospel Art Buk, namba 59, 60, mo 61), mo invaetem olgeta blong holem ol pikja blong olgeta antap taem oli singsing ol toktok ia.

Doktrin mo Ol Kavenan 76:11–24; 110:1–7; Josef Smit—Histri 1:14–17

Profet Josef Smit i bin luk Jisas Kraes.

Wan wei blong helpem ol pikinini blong mekem fet blong olgeta long Sevya i kam moa strong i blong serem wetem olgeta testemoni blong Josef Smit: “!Hem i stap laef! From we mitufala i bin luk hem, we i stap long raet han blong God” (Doktrin mo Ol Kavenan 76:22–23).

Samfala Aktiviti we Yu Save Mekem

• Soem long ol pikinini wan pikja blong Fas Visen blong Josef Smit (luk long aotlaen blong 4–10 Jenuware insaed long Kam Folem Mi—Blong Wanwan Man, Woman mo Famli.) Invaetem ol pikinini blong talem long yu wanem i stap hapen long pikja ia, mo askem olgeta blong faenem Jisas Kraes. Askem ol pikinini sapos oli save abaot ol nara taem we Josef Smit i bin luk Sevya. Long toktok blong yuwan, talem abaot ol eksperiens we oli tokbaot gud long Doktrin mo Ol Kavenan 76:11–24; 110:1–7. Talem long ol pikinini olsem wanem ol skripja ia i bildim fet blong yu long Jisas Kraes.

• Taem ol pikinini i stap kalarem aktiviti pej blong wik ia, ridim ol skripja we oli go wetem. Poenemaot ol smosmol samting long ol pikja ia we oli tokbaot gud long ol ves ia. Testifae long ol pikinini se Profet Josef Smit i bin luk Jisas Kraes, mo hemia i wan risen we yumi save se Jisas i stap laef.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 76:11–24; 110:1–10; Josef Smit—Histri 1:14–17

Profet Josef Smit i testifae se Jisas Kraes i stap laef.

Misin blong wan profet we i impoten moa i blong testifae long Jisas Kraes. Helpem ol pikinini blong bildim fet blong olgeta long Sevya taem oli stap lan aot long testemoni blong Josef Smit abaot Sevya.

Samfala Aktiviti we Yu Save Mekem

• Ol sot stori ia i tokbaot gud ol taem we Jisas Kraes i bin kamaot long Josef Smit: Doktrin mo Ol Kavenan 76:11–24; 110:1–10; Josef Smit—Histri 1:14–17. Long bod, listimdaon sam trutok we yumi lanem abaot Sevya aot long ol ves ia. Invaetem ol pikinini blong faenem ol ves we oli tijim ol trutok we oli stap long bod. ?Wanem bakegen yumi lanem abaot Jisas Kraes aot long ol eksperiens blong Josef Smit?

• Long aktiviti pej blong wik ia, helpem ol pikinini blong putum ol pikja we oli go wetem ol ves blong skripja. ?From wanem i wan blesing blong save se Josef Smit i bin luk Sevya we i bin girap long ded? Serem testemoni blong yu se Jisas Kraes i stap laef mo Josef Smit i wan profet.

Doktrin mo Ol Kavenan 63:49; 88:14–17, 27; 138:11, 14–17

From Jisas Kraes, bambae mi laef bakegen long ded.

?Olsem wanem yu save helpem ol pikinini blong talem tangkyu moa from presen blong Sevya we i mekem yumi evriwan i save laef bakegen long ded?

Samfala Aktiviti we Yu Save Mekem

• Asaenem wanwan pikinini wan long ol sot stori blong skripja ia: Doktrin mo Ol Kavenan 63:49; 88:14–17, 27; 138:11, 14–17. Invaetem ol pikinini blong lukaotem long ol ves blong olgeta blong faenem wan sot sentens we oli filim se i wan mesej blong Ista. Letem olgeta oli serem tingting blong olgeta. Sapos taem i letem, letem olgeta i mekem ol kad we i soem ol sot toktok ia we oli faenem we oli save givim long ol memba blong famli o ol fren.

• Askem ol pikinini olsem wanem bae oli eksplenem long wan smol brata o sista o wan fren wanem i minim blong laef bakegen long ded. Blong gat sam aedia, ridim tugeta Doktrin mo Ol Kavenan 138:14–17, mo tingting long ol kwestin olsem hemia: ?Wanem bae i hapen long ol spirit mo bodi blong yumi taem yumi ded? ?Wanem i hapen taem yumi laef bakegen long ded? ?Olsem wanem Jisas Kraes i mekem i posibol blong girap bakegen long ded?

• Soem vidio ia, “Because He Lives” (ChurchofJesusChrist.org), mo letem ol pikinini oli serem olsem wanem oli fil abaot wanem Sevya i bin mekem blong olgeta.

  Jisas I Stap Prea

  Masta blong Prea, i kam long Yongsung Kim

Doktrin mo Ol Kavenan 18:10–13; 19:16–19; 45:3–5; 58:42–43

From Jisas Kraes, bae mi save kasem fogivnes from ol sin blong mi.

Blong ademap, blong sevem yumi long ded blong bodi, Jisas Kraes i bin givim wan wei blong yumi save sef long ded blong Spirit—long nara toktok, blong Lod i save fogivim yumi long ol sin blong yumi mo gobak long fes blong God.

Samfala Aktiviti we Yu Save Mekem

• Raetem long bod tufala heding we i kolosap semmak long hemia: ?Wanem nao Sevya i bin mekem? mo ?Wanem nao mi mas mekem. Invaetem wanwan pikinini blong luklukgud insaed long wan long olgeta sot stori ia blong faenem wan samting we i go andanit long ol heding ia: Doktrin mo Ol Kavenan 18:10–13; 19:16–19; 45:3–5; 58:42–43. Serem glad mo tangkyu blong yu long wanem Sevya i bin mekem blong yumi.

• Helpem ol pikinini oli lanem nambatri toktok blong bilif. Yu save helpem olgeta blong lanem baehat taem yu stap soem ol pikja we i go wetem ol ki sot sentens.

• Soem vidio ia: “The Shiny Bicycle” (ChurchofJesusChrist.org), o talem wan stori blong yuwan abaot wan pikinini we i bin mekem wan rong joes mo i bin sakem sin. Helpem ol pikinini blong toktok raon long wanem pikinini ia long stori i bin mekem blong kasem fogivnes. ?Olsem wanem Sevya i bin mekem i posibol blong yumi kasem fogivnes?

stap lanem samting pikja bokis

Stap Leftemap Tingting blong Lanem Samting long Hom

Helpem ol pikinini blong oli tingting long wan samting we oli save mekem blong talem long ol nara man—speseli ol famli memba blong olgeta—wanem Jisas Kraes i bin mekem blong yumi. Nekis taem we yufala i mit, askem olgeta blong serem wetem yu wanem oli bin mekem.

Stap Kam Antap long Fasin blong Yumi blong Stap Tij

Ol pikinini oli lanem samting aot long fasin blong stap ripitim samting. No fraet blong ripitim ol aktiviti plante taem, speseli wetem ol smol pikinini. Fasin blong stap ripitim samting i helpem ol pikinini blong tingbaot wanem oli stap lanem.

aktiviti pej: Josef Smit i bin luk Jisas Kraes