19–25 Epril

Doktrin mo Ol Kavenan 41–44

“Loa blong Mi blong Lidim Jos blong Mi”

Taem yu stap rere long wik ia, lukluk strong long ol tingting we yu kasem long Spirit. ?Wanem nao yu filim se ol pikinini i nid blong lanem aot long Doktrin mo Ol Kavenan 41–44?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Sakem wan balong i go long wan pikinini, mo askem pikinini ia blong serem wan komanmen we hem i save long hem. Gohed blong pasem balong kasem taem evriwan i gat wan janis blong serem wan samting.

Stap Tijim Doktrin: Ol Smol Pikinini

Doktrin mo Ol Kavenan 42:2

Mi save obei long ol loa blong God.

Taem Jos i bin stap gro mo ol memba i kam wan tugeta long Ketlan, Ohaeo, Lod i bin talemaot long Profet Josef Smit, tru long revelesen, wanem Hem i singaotem “loa” blong Hem mo givim oda long Ol Sent blong “lisin gud mo harem mo obei” long loa ia. ?Olsem wanem yu save helpem ol pikinini blong andastanem se yumi kasem blesing taem yumi stap obei?

Samfala Aktiviti we Yu Save Mekem

• Ridim Doktrin mo Ol Kavenan 42:2, mo tokbaot gud toktok ia, “obei.” Givim sam simpol stori, long ol pikinini, mo long stori ia, i gat wan pikinini i jusum blong obei o no obei long wan loa o rul. Askem ol pikinini blong lisingud mo smael sapos man long stori i obei mo mekem wan nogud fes sapos man ia i no obei. Serem ol blesing we yu bin kasem taem yu bin obei long ol loa blong God.

• Pleplei wan gem mo givim wan rul long ol pikinini blong folem. Eksampol. Yu save talem long olgeta se oli mas leftemap han blong olgeta, mo oli mas singaotem olgeta blong oli save ansarem ol kwestin. Afta lego olgeta oli praktis blong stap obei taem yu stap askem ol kwestin long olgeta mo singaotem olgeta we oli leftemap han blong olgeta. ?Wanem nao ol loa we God i bin givim long yumi?

• Finisim aktiviti pej ia wetem ol pikinini, o singsing wan singsing blong stap obei long ol loa blong God, olsem “I Want to Live the Gospel” (Children’s Songbook, 148). Talem long ol pikinini olsem wanem blong stap obei long ol loa blong God i bin karem hapines i kam long yu.

  

  Yumi lanem ol komanmen blong God long Praemeri.

Doktrin mo Ol Kavenan 42:38

Mi stap givim seves long Jisas Kraes taem mi stap givim seves long ol narawan.

Lod i wantem Ol Sent blong Hem blong kea long olgeta we oli no gat samting mo stap long nid. Helpem ol pikinini blong andastanem se, taem oli stap givim seves long olgeta long nid, oli stap givim seves tu long Sevya.

Samfala Aktiviti we Yu Save Mekem

• Sapos Jisas Kraes i stap long klas blong yumi tedei, wanem nao bae yumi talem long Hem? ?Olsem wanem nao bae yumi tritim Hem? Soem wan pikja blong Sevya, mo eksplenem se ol tijing blong Jisas se, taem yumi soem lav long ol narawan, yumi stap soem lav tu long Hem. Helpem ol pikinini blong ripitim ves 38 wetem yu, mo talem sam toktok fastaem afta sam narawan.

• Helpem ol pikinini blong tingting long ol wei we oli save givim seves long Jisas taem oli givim seves long ol nara man. Oli save faenem sam aedia aot long vidio ia: “Pass It On” (ChurchofJesusChrist.org) o aot long ol pikja blong Sevya we i stap helpem ol narawan, olsem pikja blong Hem we i stap hilim ol sik, o stap kaen long ol pikinini (luk long Gospel Art Buk, namba 42, 47). Testifae se taem oli givim seves long ol nara man, oli stap givim seves long Jisas.

Doktrin mo Ol Kavenan 43:1–7

Lod i lidim Jos blong Hem tru long profet blong Hem.

Yu save helpem ol pikinini blong stap longwe long ol giaman truaot long laef blong olgeta taem yu tijim olgeta, taem oli yang, fasin ia we Lod i stap folem blong lidim Jos blong Hem tru long profet we i stap laef.

Samfala Aktiviti we Yu Save Mekem

• Soem ol pikja blong ol defren man, mo wan pikja blong profet we i stap laef tu. Putum ol pikja i fes daon, mo letem ol pikinini oli tanem ova ol pikja wan afta wan kasem taem oli faenem profet. Eksplenem tijing blong Lod se, profet nomo “[hem] i bin jusum blong yufala, blong hem i kasem ol komanmen mo ol revelesen long [Lod]” blong lidim Jos (Doktrin mo Ol Kavenan 43:2).

• Sing tugeta wan singsing abaot ol profet, olsem las ves blong “Follow the Prophet” (Children’s Songbook, 110–11). Serem testemoni blong yu se profet i stap lidim Jos.

Stap Tijim Doktrin: Ol Bigfala Pikinini

Doktrin mo Ol Kavenan 41:5

Wan disaepol i wan man we i stap kasem ol loa blong God mo stap obei long hem.

Ol pikinini we yu stap tijim ?oli save wanem i minim blong stap olsem wan disaepol blong Jisas Kraes? Doktrin mo Ol Kavenan 41:5 i save helpem olgeta blong andastanem olsem wanem blong stap olsem ol disaepol we oli moa gud.

Samfala Aktiviti we Yu Save Mekem

• Raetem Doktrin mo Ol Kavenan 41:5 long wan pis pepa, mo lego ol spes we i nogat samting long hem long ol ples we toktok ia “disaepol” i sud stap long hem. Askem ol pikinini blong fulumap ol spea we i nogat samting long hem, mo lukluk long Doktrin mo Ol Kavenan 41:5 sapos oli nidim help. ?Wanem nao i minim blong stap olsem wan disaepol blong Jisas Kraes? Serem olsem wanem yu stap traehad blong stap olsem wan disaepol blong Kraes we i moa gud.

• Afta blong toktok raon long Doktrin mo Ol Kavenan 41:5, askem ol pikinini blong tingting long ol loa we yu kasem long Lod. Invaetem olgeta blong aktem aot blong stap obei long wan long ol loa wan afta nara wan, taem ol nara wan long klas i stap traem blong ges wanem loa.

• Givim long wanwan memba blong klas wan pis pepa, mo askem olgeta blong raetem wan wei we oli save kam ol disaepol we i moa gud. Invaetem wanwan pikinini blong serem wanem oli bin raetem, afta skojem ol pis pepa tugeta blong mekem wan pepa jen.

Doktrin mo Ol Kavenan 42:61, 68

God i rivilim save long olgeta we oli askem.

Ol pikinini oli askem fulap kwestin taem oli stap gro long save blong olgeta long wol mo gospel. ?Olsem wanem yu save yusum Doktrin mo Ol Kavenan 42:61, 68 blong helpem olgeta blong save olsem wanem blong kasem save long Lod?

Samfala Aktiviti we Yu Save Mekem

• Askem ol pikinini blong serem wetem yu wan samting we i stap helpem olgeta blong filim pis, mo wan samting we i stap helpem olgeta blong filim glad. Invaetem olgeta blong ridim Doktrin mo Ol Kavenan 42:61 mo lukaotem ol toktok ia “pis” mo “glad.” Helpem ol pikinini blong tingbaot ol trutok we God i bin talemaot tru long revelesen, we i karem pis mo glad i kam long yumi.

• Ridim Doktrin mo Ol Kavenan 42:61, 68 wetem ol pikinini, mo tokbaot bigwan sot sentens ia “kasem wan a revelesen folem nara revelesen, wan save folem nara save.” Eksplenem se God i no stap talemaot evri samting long wan go; be, Hem i givim yumi smol mo smol long wan taem. Soem olsem wanem oli bildim wan pasol smol afta smol, o yusum wan samting we i kolosap semmak blong helpem ol pikinini oli andastanem prinsipol ia. Serem wan eksperiens blong wan taem we yu bin kasem revelesen we i bin blesem yu.

Doktrin mo Ol Kavenan 43:1–7

Profet nomo i save kasem revelesen blong ful Jos.

Taem ol pikinini i stap groap, bae oli mitim ol man we bae oli wantem lidim olgeta i go long rong rod. ?Olsem wanem yu save helpem ol pikinini blong trastem wei mo fasin blong God blong lidim ol pikinini blong Hem tru long ol profet we Hem i jusum?

Samfala Aktiviti we Yu Save Mekem

• Invaetem ol pikinini blong pikjarem long maen blong olgeta wan man we i stanap long wan testemoni miting mo talem long wod se hem i bin kasem wan revelesen blong Jos (eksampol, bae yumi nomo save dring melek o yumi mas stat blong mekem ol sakramen miting blong yumi long ol Tiusdei be i no long ol Sandei). Hem i talem se yumi mas lisin long wanem hem i talem, be i no wanem profet i talem. ?Wanem i rong wetem hemia? Helpem ol pikinini blong lukaot Doktrin mo Ol Kavenan 43:1–7 blong faenemaot olsem wanem Lod i givim ol komanmen blong Jos blong Hem.

• Soem wan pikja blong profet we i stap laef, mo invaetem ol pikinini blong serem wan samting we Hem i bin tijim i no longtaem i pas. Sapos oli nidim help, soem wan vidio o ridim wan sot stori long wan jeneral konfrens mesej we i jes hapen i no longtaem. ?From wanem i wan blesing blong gat wan profet we i stap laef tedei?

Stap Leftemap Tingting blong Lanem Samting long Hom

Invaetem ol pikinini blong jusum wan loa o komanmen we oli filim se oli mas wok strong blong obei long hem long wik ia. Leftemap tingting blong olgeta blong serem ol gol blong olgeta wetem ol famli blong olgeta.

Stap Kam Antap long Fasin blong Yumi Blong Stap Tij

Tijim ol pikinini blong raetemdaon ol filing mo ol tingting. Iven ol pikinini oli save lanem fasin ia blong raetemdaon ol filing o tingting long saed blong spirit. Oli save raetemdaon ol filing o tingting blong olgeta taem oli stap makem ol skripja, dro ol pikja, o raet smol long wan jenol.