26 Epril–2 Mei.

Doktrin mo Ol Kavenan 45

“Ol Promes … Bae Oli Kamtru”

Olsem wan tija, fasin blong rere we i moa impoten long yu, hem i long saed blong spirit. Blong stat, stadi long Doktrin mo Ol Kavenan 45, mo prea blong Tabu Spirit i soem rod long yu. Aotlaen ia i givim ol aedia we, maet, bae oli save helpem yu. Maet bae yu faenem tu ol aedia we oli stap long aotlaen blong wik ia long Kam Folem Mi—Blong Wanwan Man, Woman mo Famli, o insaed long Liahona o Fren.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Askem ol pikinini sapos oli wantem serem wan samting we oli bin lanem aot long ol skripja long wik ia. Jusum wan blong serem, mo askem ol nara pikinini blong leftemap han blong olgeta sapos oli lanem abaot wan semmak samting.

Tijim Doktrin: Ol Smol Pikinini

Doktrin mo Ol Kavenan 45:32

Mi save “stanap long ol tabu ples.”

Insaed long Doktrin mo Ol Kavenan 45:32, Lod i bin stap tijim se ol disaepol blong Hem bae oli faenem wan sef ples long ol las dei taem oli stap stanap long ol tabu ples—ol ples we oli spesel long Lod. ?Olsem wanem nao yu save helpem ol pikinini blong luksave wea nao ol tabu ples insaed long laef blong olgeta?

Samfala Aktiviti we Yu Save Mekem

• Putum ol pikja blong wan hom, wan bilding blong Jos, mo wan tempol long ol defren ples raon long rum. Givim sam smol tingting we i tokbaot ol ples ia, mo invaetem ol pikinini blong stanap kolosap long pikja ia we yu stap tokbaot. Ridim fas laen long Doktrin mo Ol Kavenan 45:32. Testifae se yumi gat blesing taem yumi spendem taem long ol tabu ples olsem ol hom blong yumi, ol bilding blong jos, mo tempol. Askem ol pikinini blong tokbaot olsem wanem oli filim taem we oli stap long ol tabu ples olsem.

• Invaetem ol pikinini blong finisim aktiviti pej blong wik ia. Helpem olgeta blong raetem: “Mi save help blong mekem hom blong mi i wan tabu ples” mo “Doktrin mo Ol Kavenan 45:32” long droing blong olgeta. ?Wanem nao oli save mekem blong helpem hom blong olgeta i kam wan tabu ples?

• Blong helpem ol pikinini blong tingting abaot mining blong “no muvmuv,” askem olgeta blong stanap kwaet mo no muvmuv blong wan minit. Ridim fas laen long Doktrin mo Ol Kavenan 45:32. Helpem ol pikinini blong oli andastanem se “blong stanap long ol tabu ples, mo … oli no muv,” i minim blong jusum raet long evri taem, i nomata wanem i stap hapen. Invaetem olgeta blong “oli no muv” aot long ol stret mo gud tingting mo aksen.

Doktrin mo Ol Kavenan 45:44–45

Jisas Kraes bae i kambak bakegen.

Taem olgeta Sent long Ketlan, Ohaeo, oli harem revelesen we i stap long Doktrin mo Ol Kavenan 45, we i stap tokbaot ol las dei mo Seken Kaming blong Sevya, oli bin akseptem wetem glad. Tingting long wei we bae yu helpem ol pikinini blong oli rere, wetem glad, from Seken Kaming.

Samfala Aktiviti we Yu Save Mekem

• Helpem ol pikinini blong tokbaot olsem wanem oli filim taem we oli save se wan we i spesel i stap kam blong visitim olgeta, olsem wan bubu o wan fren. ?Olsem wanem bae oli rere from visit ia? Soem wan pikja blong Sevya, mo ridim smol pat, o ful pat blong Doktrin mo Ol Kavenan 45:44–45. Talem long ol pikinini hao nao yu yu filim abaot Sevya we i stap kam bakegen, mo givim taem long olgeta blong oli serem ol filing blong olgeta.

• Soem pikja blong Seken Kaming blong Sevya (luk long aotlaen blong wik ia insaed long Kam Folem Mi—Blong Wanwan Man, Woman mo Famli), mo askem ol pikinini blong serem wanem oli filim taem we oli luk pikja ia. Serem testemoni blong yu se Jisas Kraes bae i kambak bakegen.

• Singsing wan singsing abaot Seken Kaming, olsem “When He Comes Again” (Children’s Songbook, 82–83). Yusum singsing ia blong toktok raon long ol wei we yumi save mekem yumi rere blong Jisas i kambak bakegen; sam wei oli blong mekem tingting blong God, mo letem laet blong yumi i saen blong ol narawan oli luk.

Stap Tijim Doktrin: Ol Bigfala Pikinini

Doktrin mo Ol Kavenan 45:3–5

Jisas Kraes i Loya blong yumi long fored blong Papa.

?Olsem wanem nao bae yu helpem ol pikinini blong oli gat wan moa strong fet se Jisas Kraes i Loya blong olgeta? ?Olsem wanem nao yu yu kam blong lanem hemia blong yuwan?

Samfala Aktiviti we Yu Save Mekem

• Raetem samfala toktok mo sentens we oli stap long Doktrin mo Ol Kavenan 45:3–5 long ol seperet pis pepa. Givim wan minit long ol pikinini blong oli stadi long ol ves ia long ol skripja blong olgeta, mo afta, invaetem olgeta blong sarem ol skripja blong olgeta, mo putum ol toktok long ol pepa, folem sem oda we oli kamkamaot long hem long ves ia. Folem ol ves ia, ?wanem nao Sevya i talem blong toktok from yumi long fored blong Papa long Heven?

• Helpem ol pikinini blong oli talem mining blong toktok ia, loya; maet oli save luk toktok ia long diksonari. ?Wanem nao Sevya i bin mekem blong i posibol blong Hem i stap olsem Loya blong yumi? Serem ol filing blong yu abaot wanem Jisas Kraes i bin mekem blong yumi, mo letem ol pikinini oli serem ol filing blong olgeta.

Doktrin mo Ol Kavenan 45:9.

Gospel blong Jisas Kraes i wan laet long wol ia.

Helpem ol pikinini we yu stap tijim blong oli tingting long sam wei we gospel i stap mekem wol ia i rere from Seken Kaming blong Sevya.

Samfala Aktiviti we Yu Save Mekem

• Soem samfala pikja blong wan laet mo wan flag, o droem olgeta samting ia long bod. Invaetem ol pikinini blong ridim Doktrin mo Ol Kavenan 45:9 mo tingting long sam wei we gospel i olsem wan laet, wan saen (o wan flag), mo wan mesenja. Yu save eksplenem se long taem bifo, wan standet i wan bana o wan flag we oli stap karem i go long faet. Hem i helpem ol soldia blong save weaples blong kam wanples long hem, mo wanem blong mekem

  

  Taetol blong Fridom, i kam long Larry Conrad Winborg

• Helpem ol pikinini blong lanem baehat evri pat blong ves 9 mo blong mekem hemia, raetem ves ia long bod mo waepemaot samfala toktok sloslo.

Doktrin mo Ol Kavenan 45:37–38

Jisas Kraes bae i kambak bakegen.

Bae i save mekem ol pikinini oli fraet blong stap rid abaot ol wo, ol fasin nogud, mo ol taem we evri samting i prapa lus evriwan, we oli stap long profesi mo bae i hapen bifo Seken Kaming blong Sevya. ?Olsem wanem yu save helpem olgeta blong wet, wetem glad, from dei ia we Hem i promesem?

Samfala Aktiviti we Yu Save Mekem

• Askem ol pikinini olsem wanem nao oli save taem we wan niu taem blong samting (niu taem blong frut o flaoa) bae i stap kam. ?Wanem saen nao oli stap lukaotem? Eksplenem se, semmak olsem we hemia oli ol saen blong wan niu taem, i gat ol saen blong Seken Kaming. Ridim tugeta Doktrin mo Ol Kavenan 45:37–38. Jisas i bin talem ol saen blong Seken Kaming blong Hem. ?Ol saen ia bae oli olsem wanem? Blong helpem ol pikinini blong faenemaot ol saen we yumi sapos blong lukaotem, givim wok long wanwan pikinini (o grup blong ol pikinini) blong ridim samfala ves aot long Doktrin mo Ol Kavenan 45 we i tokbaot ol saen ia. Eksampol, oli save yusumol ves 26–27, 31–33, 40–42. Letem ol pikinini oli serem wanem we oli faenem. ?Wijwan long ol saen ia oli stap hapen, o stap kamtru tedei?

• Long ol seperet pis pepa, raetem sam long ol promes ia long saed blong ol samting we bae oli hapen long fiuja, we yu bin faenem long stadi blong yu long seksen 45. Sam long ol eksampol blong ol promes ia, oli save faenem long ol ves 44–45, 51–52, 55, 58–59, 66–71. Mekem lis, antap long bod, blong ol ves we ol promes ia oli stap long hem. Givim long ol pikinini ol pepa mo askem olgeta blong yusum ol skripja blong majem ol ves we oli stap long bod long ol promes long pepa. Toktok raon long wanem nao ol promes ia oli stap minim, mo invaetem ol pikinini blong serem wijwan promes nao i helpem olgeta blong oli glad tumas from Seken Kaming blong Sevya.

Stap Leftemap Tingting blong Lanem Samting long Hom

Invaetem ol pikinini blong tingting long wan samting we oli bin lanem long taem blong klas we bae oli save serem wetem ol famli blong olgeta. Askem sam long olgeta blong serem wetem klas wanem oli wantem serem long hom.

Stap Kam Antap long Fasin blong Yumi blong Stap Tij

Helpem ol pikinini blong luksave huia Spirit. Taem yu stap tijim ol pikinini, talem long olgeta wetaem nao yu stap filim Tabu Spirit. Tokbaot olsem wanem yu yu luksave se Hem i stap wetem yu. Eksampol. Maet yu filim pis o glad taem yu stap singsing wan singsing abaot Sevya. Talemaot se ol filing ia, oli olsem wanem, mo hemia bae i helpem ol pikinini blong luksave taem we, olgeta, oli stap filim Spirit.