pul blong wota taem san i girap

10-16 Mei

Doktrin mo Ol Kavenan 49–50

“Wanem we I Kam long God, I Laet”

Taem yu stap ridim Doktrin mo Ol Kavenan 49–50, lukaotem ol mesej o ol prinsipol we yu filim se bae oli gat mining long ol pikinini we yu stap tijim. Oli putum sam i stap long aotlaen ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Soem pikja long aotlaen blong wik ia insaed long Kam Folem Mi—Blong Wanwan Man, Woman mo Famli, mo helpem ol pikinini blong tokbaot Jisas Kraes olsem wan gudfala man blong lukaot long sipsip.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 49:12–14

Mi save folem Jisas Kraes.

Helpem ol pikinini blong oli andastanem se oli save folem Jisas Kraes taem oli stap biliv long Hem, stap sakem sin, kasem baptaes, mo kasem Tabu Spirit.

Samfala Aktiviti we Yu Save Mekem

• Soemaot fo pepa we yu katemaot long sep blong trak blong leg, mo fo pikja we i ripresentem fasin blong stap biliv long Jisas Kraes, stap sakem sin, kasem baptaes, mo kasem Tabu Spirit. Ridim Doktrin mo Ol Kavenan 49:12–14, mo askem ol pikinini blong poenem stret pikja taem yu talem toktok blong hem we i stap long ol ves ia. Letem ol pikinini oli helpem yu blong putum ol trak blong leg ia long floa wetem pikja long saed blong olgeta, mo invaetem ol pikinini, wan afta wan, blong wokbaot antap long trak blong leg ia. Talem testemoni blong yu se, taem yumi mekem olgeta samting ia long ol pikja ia, yumi stap folem Jisas Kraes.

• Yusum aktiviti pej blong wik ia blong mekem ol fingga doli we i save helpem ol pikinini olsem wanem blong lanem blong folem Jisas Kraes taem oli gat fet, stap sakem sin, kasem baptaes, mo kasem Tabu Spirit.

Doktrin mo Ol Kavenan 50:23–25

Laet blong mi long saed blong spirit i save saen bigwan mo bigwan moa.

Ol tingting we yumi no save tajem o soem, olsem trutok mo spirit, bae i had blong ol yang pikinini oli andastanem, be sapos yu komperem olgeta long laet, olsem we Lod i stap mekem long Doktrin mo Ol Kavenan 50:23–25, bae i save help.

Samfala Aktiviti we Yu Save Mekem

• Yusum wan aktiviti we i soem olsem wanem laet blong yumi, long saed blong spirit, i save saen i bigwan mo i kam bigwan moa. Yu save soem ol pikja blong ol samting we i givim laet (olsem wan kandel, wan balb blong laet, mo san) mo letem ol pikinini oli putum olgeta long oda folem hamas oli saen. O, invaetem ol pikinini blong priten se oli ol laet we oli saen i smol gogo i saen bigwan, taem oli bendaon mo sloslo oli stanap mo oli openem bigwan han blong olgeta. Helpem ol pikinini blong tingting long sam gud samting we oli save mekem blong mekem laet blong olgeta long saed blong spirit i saen strong o bigwan moa.

• Wetem ol pikinini, singsing wan singsing abaot laet long saed blong spirit, olsem “Shine On” (Children’s Songbook, 144). Testifae abaot wei we Papa long Heven i bin helpem laet blong yu blong i saen i bigwan mo bigwan moa. Talem long ol pikinini abaot laet we yu stap luk long olgeta.

Doktrin mo Ol Kavenan 50:41–44

Jisas i lavem mi.

Jisas Kraes i Gudfala Man blong Lukaot long Sipsip. Yumi ol sipsip blong Hem, mo Hem i lavem wanwan long yumi. ?Wanem bae i helpem ol pikinini we yu stap tijim blong oli filim lav we Hem i gat long olgeta?

Samfala Aktiviti we Yu Save Mekem

• Soem wan pikja blong Jisas Kraes wetem ol pikinini (luk long Gospel Art Buk, namba 47, 84, o 116), mo askem ol pikinini olsem wanem nao oli save se Jisas i lavem ol pikinini. Serem olsem wanem yu save se Jisas i lavem yu, mo wanwan long ol pikinini we oli stap long klas.

• Mekem wan sipsip wetem pepa; antap long ol sipsip ia, raetem nem blong ol pikinini insaed long klas, mo haedem olgeta raon long rum. Soem wan pikja blong Sevya, mo ridim Doktrin mo Ol Kavenan 50:41–42. Helpem ol pikinini blong andastanem wanem nao ol ves ia oli stap tijim abaot olsem wanem Jisas Kraes i stap filim abaot olgeta. Mekem ol pikinini oli faenem ol sipsip raon long rum, mo putum olgeta kolosap long pikja blong Jisas blong mekem se “i no gat wan long olgeta we Papa blong mi i bin givim long mi we bambae i lus” (ves 42).

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 49:12–14

Mi save folem Jisas Kraes.

Lod i nidim evriwan long yumi blong tijim wanwan long yumi bakegen, blong mekem se oli save go long Hem taem oli gat fet, stap sakem sin, kasem baptaes, mo kasem presen we i Tabu Spirit.

Samfala Aktiviti we Yu Save Mekem

• Invaetem ol pikinini blong komperem Doktrin mo Ol Kavenan 49:12–14 wetem wanem Pita i bin tijim long Ol Wok 2:38 mo wetem nambafo toktok blong bilif. ?Wanem semmak samting oli faenem? ?From wanem ol trutok ia oli impoten?

• Invaetem ol pikinini blong wok tutu mo priten se wan long olgeta i wantem save olsem wanem blong folem Jisas Kraes. Nara pikinini i save tijim hem, mo blong mekem hemia, i yusum Doktrin mo Ol Kavenan 49:12–14.

Doktrin mo Ol Kavenan 49:15–17

Mared bitwin man mo woman hem i wan mas long plan ia blong God.

Ol pikinini we yu stap tijim, oli stap fesem ol mesej we i mekem olgeta oli konfius long saed blong mared. Doktrin mo Ol Kavenan49:15–17 i save helpem olgeta blong andastanem olsem wanem Lod i stap filim abaot mared.

Samfala Aktiviti we Yu Save Mekem

• Eksplenem se “Ol Seka” i bin wan grup we oli bin biliv se ol pipol oli no mas mared (luk long seksen heding blong Doktrin mo Ol Kavenan 49). Invaetem ol pikinini blong faenem ol samting we Lod i bin tijim abaot mared insaed long Doktrin mo Ol Kavenan 49:15–17.

• Helpem ol pikinini blong andastanem wanem sentens ia, “God i odenem mared,” i minim. Invaetem ol pikinini blong wok tutu blong komperem Doktrin mo Ol Kavenan 49:15–17 wetem ol tri fasfala paragraf blong “Famli: Wan Ofisol Toktok I Go long Wol.” ?From wanem mared i impoten tumas long Papa long Heven?

• Singsing tugeta long nambatu ves blong “Famli I Stap Tugeta Foreva” (Liahona, Epril 2013, 65), o wan nara singsing abaot famli. Helpem ol pikinini blong oli tingting abaot sam wei we oli save rere blong mared insaed long tempol wan dei, mo gat wan famli we i no save finis.

  kapol aotsaed long tempol

  Mared bitwin wan man mo wan woman, God nao i odenem.

Doktrin mo Ol Kavenan 50:40–46

Jisas Kraes i Gudfala Man blong Lukaot long Sipsip.

Doktrin mo Ol Kavenan 50:40–46 i gat ol pikja we yu save tingting long ol long maen, we i save helpem ol pikinini we yu stap tijim blong oli andastanem olsem wanem Sevya i stap filim abaot olgeta.

Samfala Aktiviti we Yu Save Mekem

• Mekemap wan maj gem mo yusum ol sentens we oli stap long Doktrin mo Ol Kavenan 50:40–46. Olsem: yu save raetem “No fraet, ol smol pikinini” long wan kad we bae i maj wetem wan nara kad we i talem, “from se yufala i blong mi” (ves 41). Ridim Doktrin mo Ol Kavenan 50:40-46 tugeta. Afta, miksimap ol kad long floa, wan tebol, o antap long bod, mo askem ol pikinini blong majem ol sentens. ?Wanem nao ol sentens ia oli stap tijim yumi abaot Jisas Kraes?

• Blong helpem ol Pikinini blong andastanem olsem wanem Sevya i olsem wan gudfala man blong lukaot long ol sipsip, askem olgeta blong ridim Doktrin mo Ol Kavenan 50:40-46 tugeta. Afta soem vidio ia: “Jesus Declares the Parable of the Lost Sheep” (ChurchofJesusChrist.org), mo askem olgeta blong faenem wan samting insaed long vidio we i rimaenem olgeta long wanem oli bin ridim. ?Olsem wanem nao Jisas Kraes i sevem yumi? ?Olsem wanem nao yumi save stap olsem ol gud man blong lukaot long ol narafala man?

stap lanem samting pikja bokis

Stap Leftemap Tingting blong Lanem Samting long Hom

Mekem rere wan not blong wanwan pikinini, we long hem i gat ol toktok ia: Askem mi long saed blong. Letem ol pikinini oli raetem nara haf blong sentens ia wetem wan samting we oli bin lanem long klas (helpem olgeta sapos i nid) mo pinim not ia long klos blong olgeta blong statem wan storian long hom.

Stap Kam Antap long Fasin blong Yumi blong Stap Tij

Stretem ol aktiviti blong oli fit wetem yia blong ol pikinini we yu stap tijim. Taem ol pikinini oli stap kam bigwan, bae oli save tekpat moa long klas. Oli gat moa eksperiens mo oli kam gud moa blong serem ol tingting blong olgeta. Taem yu stap tijim ol smol pikinini, maet bae yu nidim blong eksplenem moa samting bitim wetem ol pikinini we oli bigwan. Oltaem, givim wan janis long ol pikinini blong oli tekpat olgetawan, mo helpem olgeta sapos oli nidim help.

aktiviti pej: Mi save folem Jisas Kraes