“10–16 Mei. Doktrin mo Ol Kavenan 49–50: ‘Wanem I Kam long God, I Laet,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“10–16 Mei. Doktrin mo Ol Kavenan 49–50” Kam Folem Mi—Blong Wanwan Man, Woman mo Famli: 2021
10–16 Mei
Doktrin mo Ol Kavenan 49–50
“Wanem I Kam long God, I Laet”
“Wanem we i kam long God, i laet; mo hem we i kasem laet, mo i gohed blong stap strong long God, i kasem moa laet; mo laet ia i gro i saen gud mo i saen moa gud bakegen kasem dei we i stret gud evriwan i kam” (Doktrin mo Ol Kavenan 50:24). Tingting long wei we yu stap kasem laet taem yu stap gohed wetem God.
Raetemdaon Ol Filing mo Tingting blong Yu
Sevya i “gudfala man blong yumi blong lukaot long sipsip (Doktrin mo Ol Kavenan 50:44). Hem i save se, samtaem, ol sipsip oli stap mestem rod, mo we i gat plante denja long ol waelples. Mekem se, wetem lav, Hem i stap lidim yumi i gobak long sefti blong doktrin blong Hem, we i stap longwe long ol denja olsem “ol giaman spirit, we oli bin go olbaot long wol ia, mo oli stap trikim wol” (Doktrin mo Ol Kavenan 50:2). Blong stap folem Hem, plante taem, i minim blong lego ol aedia mo kastom we oli no stret. Hemia i bin tru blong Leman Kopli mo sam narawan long Ohaeo, we oli bin akseptem gospel we i bin kambak, be oli stil stap holemtaet sam bilif we oli no bin stret. Long Doktrin mo Ol Kavenan 49, Lod i bin talemaot ol trutok we oli bin stretem ol fasfala bilif blong Leman abaot o topik olsem mared, mo Seken Kaming blong Sevya. Mo taem we ol konvet long Ohaeo “oli bin akseptem ol spirit ia we [oli] no save andastanem,” Lod i bin tijim olgeta olsem wanem blong luksave taem we Spirit i stap soemaot o talemaot samting (Doktrin mo Ol Kavenan 50:15). Gudfala Man blong Lukaot long Sipsip i bin gat longfala tingting; Hem i bin save se ol fasfala Sent ia, oli bin—olsem yumi evriwan—“ol smol pikinini” we “[yumi] mas gro wetem gladhat mo wetem save blong trutok” (Doktrin mo Ol Kavenan 50:40).
Sam Aedia blong Skripja Stadi blong Yuwan
Ol trutok blong gospel oli save helpem mi blong luksave ol giaman tijing.
Bifo hem i joenem Jos, Leman Kopli i bin pat blong wan grup blong relijin we oli bin save olgeta olsem “United Society of Believers in Christ’s Second Appearing,” we oli save tu olsem Ol Seka (luk long “Leman Copley and the Shakers,” Revelations in Context, 117–21). Afta wan storian wetem Leman, Josef Smit i bin askem long Lod blong mekem i klia abaot sam long ol tijing blong Ol Seka, mo Lod i ansarem olgeta wetem revelesen we i stap long seksen 49.
Yu save faenem sam long ol bilif blong Ol Seka we oli tokbaot long heding blong seksen 49. Tingting blong makem, o tekem not long ol trutok we oli stap long ol ves 5–23 we i stretem ol bilif ia. Tingbaot ol nara giaman tijing, o kastom long wol tedei. ?Wanem trutok blong gospel nao i save protektem yu agensem olgeta tijing o kastom ia?
Doktrin mo Ol Kavenan 49:15–17
Mared bitwin man mo woman hem i wan mas long plan blong God.
?Wanem trutok nao abaot mared yu yu lanem aot long Doktrin mo Ol Kavenan 49:15–17? From wanem yu filim se mared bitwin wan man mo wan woman i wan mas long plan blong Papa long Heven? Elda David A. Bednar i bin givim tufala risen: “Risen namba 1: Spirit blong man mo spirit blong woman, oli komplitim tufala mo mekem wanwan long tufala i stret evriwan, mo from hemia, ol man mo ol woman, oli putum i stap blong oli progres tugeta blong kam olsem ol god. … Risen namba 2: Tru long tabu plan, i mas gat tugeta ia, wan man mo wan woman, blong tekem ol pikinini oli kam long laef long wol ia, mo blong givim long olgeta, wan bes ples blong tufala i lukaotem mo fidim ol pikinini.” (“Marriage Is Essential to His Eternal Plan,” Ensign, Jun 2006, 83–84).
Luk tu long Jenesis 2:20–24; 1 Korin 11:11; “Famli: Wan Ofisol Toktok I Go long Wol”,” Ensign o 35538 852.
God i odenem mared bitwin wan man mo wan woman.
Ol tijing blong Lod oli save protektem mi long ol trik blong Setan.
Ol niu konvet long Ohaeo oli bin wantem tumas blong kasem ol samting we Spirit bae i soemaot, we oli stap long ol skripja, be Setan i bin wantem tumas tu blong trikim olgeta. Oli bin stap askem olgetawan, se taem wan i stap singaot o ae blong hem i tudak, ?hemia i paoa blong Spirit?
Traem pikjarem se oli bin askem yu blong helpem ol niufala konvet ia blong oli andastanem olsem wanem blong luksave ol tru taem, taem we Tabu Spirit i stap soemaot samting, mo blong stap longwe long ol giaman mo kopi blong Setan. ?Wanem prinsipol yu faenem insaed long Doktrin mo Ol Kavenan 50 we yu save serem? (luk speseli long ol ves 22–25, 29–34, 40–46).
Luk tu long 2 Timoti 3:13–17.
Doktrin mo Ol Kavenan 50:13–24
Ol tija mo olgeta we oli stap lan, tugeta oli kam antap tru long Spirit.
Wan wei we yu save stadi long Doktrin mo Ol Kavenan 50:13–24, hem i blong droem wan pikja blong wan tija mo wan we i stap lan, mo long saedsaed blong wanwan long tufala, oli raetem wan lis blong ol toktok mo ol sentens aot long ol ves ia we oli tijim yu wan samting abaot fasin blong stap lanem mo tijim gospel. ?Wetaem nao yu bin gat ol eksperiens we oli bin tijim yu olsem wanem i impoten blong gat Spirit long taem blong tij mo lanem samting? Tingting long wanem yu save mekem blong kam antap long ol hadwok blong yu olsem wan we i stap lanem gospel, mo wan we i stap tijim gospel.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 49:2.?Hem i minim wanem long yu blong “wantem save haf trutok nomo, be i no evriwan”? Mebi yu save soem wan pikja we yu haedem haf, mo letem ol famli oli traem faenem se i pikja blong wanem. ?Wanem i bin hapen taem yumi akseptem haf blong trutok nomo? (luk long 2 Nifae 28:29). ?Olsem wanem nao gospel we i fulwan i wan blesing long yumi?
-
Doktrin mo Ol Kavenan 49:26–28.?Olsem wanem nao yumi gat blesing tru long promes ia blong Lod: “Bambae mi go long fored blong yufala mo bae mi biaenem yufala; ; bambae mi stap long medel blong yufala”? Ol memba blong famli oli save serem ol eksperiens blong ol taem we oli bin filim Lod “i go long fored [long olgeta]” o filim se Hem i stap “long medel [blong olgeta].”
-
Doktrin mo Ol Kavenan 50:23–25.Yufala i save kam tugeta long wan rum we i tudak blong ridim Doktrin mo Ol Kavenan 50:23–25 mo sloslo, ademap moa laet taem yu laetem moa kandel, o taem yu onem moa laet, wan afta narawan. Mo tu, yu save ridim ol ves ia mo semtaem lukluk san i girap long moning. ?Wanem nao yu save mekem blong gospel laet blong yu i gogohed blong saen bigwan moa? Taem ol memba blong famli oli lanem wan niu samting abaot gospel long wik ia, leftemap tingting blong olgeta blong serem wanem oli lanem wetem famli taem oli raetem wan not, mo oli putum not ia i go long wan laet we i stanap hemwan, o wan nara laet insaed long haos.
-
Doktrin mo Ol Kavenan 50:40–46.Afta we yufala i ridim Doktrin mo Ol Kavenan 50:40–46, yu save soem pikja blong Sevya we i go wetem aotlaen ia, mo askem ol kwestin olsem ia: ?Olsem wanem nao bae yu save se Sevya i lavem ol sipsip? ?Olsem wanem nao Sevya i olsem wan man blong lukaot long sipsip, long yumi? ?Wanem sentens blong ol skripja i soemaot aedia ia se Sevya i wan man blong lukaot long sipsip mo yumi nao yumi ol sipsip blong Hem?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Shine On,” Children’s Songbook, 144.
Stap Kam Antap long Fasin blong Yumi blong Stap Tij
No mekem sem samting oltaem. Ol bes taem blong tij, speseli insaed long hom, plante taem oli hapen kwiktaem, we yu no plan from: wan famli kaekae i save givim insperesen blong toktok raon long fasin blong lafet long toktok blong God; mo wan strong ren i wan janis blong testifae abaot wota ia we i givim laef. Sapos yu rere long saed blong spirit, bae Lod i givim yu “long stret taem, wanem we bae [yu] talem” (Doktrin mo Ol Kavenan 100:6).
Man blong Lukaot long Ol Sipsip we I Kaen, i kam long Kim Yongsung