Fasfala Hol long Graon, i kam long James Taylor Harwood

17–23 Mei

Doktrin mo Ol Kavenan 51–57

“Wan Wokman we I Fetful, I Stret, mo I Waes”

Blong stap stadi long ol skripja bae i helpem yu blong haremsave voes blong Lod, from se ol skripja, Hem i bin givim tru long Spirit (luk long Doktrin mo Ol Kavenan 18:34–36).

Raetemdaon Ol Filing mo Tingting blong Yu

Blong ol memba blong Jos long ol yia 1830, kam tugeta blong Ol Sent mo blong stap bildimap siti blong Saeon, i ol wok long saed blong spirit, mo tu, ol wok long saed blong laef long wol ia, mo i bin gat fulap samting blong lukluk long olgeta: I nidim wan blong i pem mo serem ol graon blong Ol Sent oli stap long hem. I nidim wan blong printim ol buk mo ol nara samting blong printim. Mo i nidim wan blong lukaotem wan stoa blong givim ol samting i go long olgeta long Saeon. Long ol revelesen we oli raetem long Doktrin mo Ol Kavenan 51–57, Lod i bin jusum mo i bin givim instraksen long ol pipol blong oli lukaotem ol wok ia, mo Hem i bin jusum Indipendens, Misuri, olsem “senta ples” blong Saeon i stap long hem (Doktrin mo Ol Kavenan 57:3).

Be, nomata ol skil long ol samting olsem, blong pem graon, blong print, mo lukaotem wan stoa oli bin impoten long wok long laef ia blong bildimap Saeon, ol revelesen ia oli stap tijim tu se Lod i bin wantem Ol Sent blong Hem blong oli kam klin inaf long saed blong spirit blong oli singaotem olgeta wan pipol blong Saeon. Hem i singaotem yumi wanwan blong yumi wan wokman we i “fetful, i stret, mo i waes,” mo i gat wan spirit we i wantem sakem sin, “i stanap strong” long ol responsabiliti we Hem i bin givim long yumi (luk long Doktrin mo Ol Kavenan 51:19; 52:15; 54:2). Sapos yumi save mekem hemia—nomata ol skil blong yumi long laef ia—Lod i save yusum yumi blong bildimap Saeon, mo bambae Hem “i bildim kwiktaem taon ia long stret taem” (Doktrin mo Ol Kavenan 52:43).

Sam Aedia blong Skripja Stadi blong Yuwan

Doktrin mo Ol Kavenan 51

Lod i wantem mi blong stap wan wokman we i stap fetful, stret, mo waes.

Sapos yu bin wan memba blong Jos long 1831, maet bae oli invaetem yu blong stap laef folem loa blong konsekresen mo givim propeti blong yu, folem loa, i go long Jos tru long bisop. Afta long hemia, bae hem i givimbak long yu, long plante taem, wanem we yu bin givim, mo samtaem, smol moa. Be nomo se, propeti ia i nomo blong yu—yu stap lukaotem nomo.

Tedei, ol rod ia oli defren, be ol prinsipol blong konsekresen mo samting blong lukaotem, oli impoten yet long wok ia blong Lod. Tingting long ol toktok ia we oli kam long Elda Quentin L. Cook: “Yumi stap laef long ol taem blong denja, taem we plante we oli biliv, oli no ansa long God, mo yumi no gat responsabiliti, o wok blong lukaotem yumiwan o ol narawan. Plante long wol ia, oli lukluk nomo blong mekem gud olgetawan bakegen … [mo] oli no biliv se oli mas lukaot long brata blong hem. Be, insaed long Jos, yumi stap biliv ia se ol samting we yumi gat blong lukaotem, oli wan tabu wok” (“Stewardship—a Sacred Trust,” Ensign o Liahona, Nov. 2009, 91).

Taem yu stap ridim seksen 51, tingbaot wanem we God i givim long yu wetem tras. ?Wanem nao ol toktok ia, “man blong lukaot long” (ves 19) mo “konsekretem” (ves 5) i minim, mo wanem nao oli stap talem abaot wanem we God i wantem luk yu yu mekem? ?Wanem prinsipol yu yu faenem insaed long seksen 51 mo long ol toktok blong Elda Cook we i stap tijim yu mining blong stap wan man blong lukaot long samting? (luk speseli long ol ves 9, 15–20).

Luk tu long Matiu 25:14–30; “The Law of Consecration,” vidio, ChurchofJesusChrist.org.

Doktrin mo Ol Kavenan 52:14–19

God i gat wan paten blong stap longwe long fasin blong man i trikim yu.

Wetem plante pipol we oli stap klemem se Spirit i stap soemaot samting long olgeta, ol fasfala Sent oli bin wari, se nogud bae man i giaman long olgeta. ?Olsem wanem nao bae oli save talem se huia nao God i bin akseptem hem? (ves 15). Long Doktrin mo Ol Kavenan 52:14–19, Lod i bin givim wan paten we i help. ?Olsem wanem yu save yusum paten blong faenemaot ol giaman mesej insaed long wol ia? Mo tu, maet yu wantem yusum paten ia blong makem yuwan: tingting blong yusum ol sentens we oli kamaot long ol ves ia blong raetem ol kwestin olsem: “?Taem mi mi stap toktok, spirit blong mi i wantem sakem sin?”

Doktrin mo Ol Kavenan 54

Mi save tanem mi i go long Lod taem ol joes blong ol narawan oli mekem mi mi harem nogud.

Olsem pat blong kam tugeta wanples long Ohaeo, Niuwel Naet i bin lidim wan grup blong Ol Sent; oli bin kasem Kolesvil, Niu Yok, mo oli nidim wan ples blong stap long hem. Leman Kopli, i bin gat wan bigfala fam long Ketlan, mo hem i bin mekem kavenan blong letem Ol Sent oli stap long graon blong hem. Be, stret afta we oli stat blong stanemap olgeta longwe, Kopli i bin muvmuv long fet blong hem, Kopli i bin muvmuv long fet blong hem, i bin brekem ol kavenan blong hem, mo i ronemaot Ol Sent aot long propeti blong hem (luk long Saints, 1:125–28).

Olsem we oli rekodem long seksen 54, Lod i bin talem long Niuwel Naet wanem we Ol Sent oli sapos blong mekem abaot situesen blong olgeta. ?Wanem nao yu fanem insaed long revelesen ia we i save helpem yu taem nara man i no kipim komitmen blong hem, o taem ol pua joes blong ol narawan oli spolem yu?

Ples blong fam long Ohaeo we Leman Kopli i bin promesem long Jos.

Doktrin mo Ol Kavenan 56:14–20

God i blesem olgeta we hat blong olgeta i klin evriwan.

Long ol ves ia, Lod i toktok long tugeta, olgeta we oli rij mo olgeta we oli pua; bae i intresting blong komperem kaonsel blong Hem long tufala grup ia. Long ol ves ia, ?wanem nao yu filim se i stret long yuwan? ?Olsem wanem nao taem we yu lukluk nomo long ol rij samting blong yu, bae i save “kakae” sol blong yu? (ves 16). Long yu, ?i minim wanem blong gat “hat [we] i klin evriwan (ves 18) long saed blong ol samting blong wol ia?

Luk tu long Jekob 2:17–21.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 51:9.Yu save plei wan gem we famli i laekem, mo afta, tokbaot olsem wanem gem ia bae i defren sapos wan i no plei long ones fasin. ?From wanem i impoten blong “mekem samting wetem ones fasin” wetem ol narafala man? ?Olsem wanem nao fasin blong stap ones i helpem yumi blong “stap wan”?

Doktrin mo Ol Kavenan 52:14–19.Taem yu stap toktok raon long paten ia we oli tokbaot long ol ves ia, famli blong yu i save glad blong lukluk long ol paten we yu stap yusum—olsem pat blong somap klos, o mekem wan samting long han. Yufala i save wok tugeta blong mekem wan samting folem wan paten mo semtaem tokbaot paten we Lod i bin givim long yumi blong stap longwe long ol giaman trik.

Doktrin mo Ol Kavenan 53:1.Tingting blong serem wetem wan famli eksperiens, taem we, yu, semmak olsem Sidni Gilbet i bin askem Lod “long saed blong koling blong yu.”

Doktrin mo Ol Kavenan 54:2; 57:6–7.?I minim wanem blong “stanap strong” (Doktrin mo Ol Kavenan 54: 2) long wanem God i bin askem yumi blong mekem? Afta, yu save invaetem ol memba blong klas blong stanap mo talem nem blong wan samting we God i bin askem olgeta blong mekem.

Doktrin mo Ol Kavenan 55.?Olsem wanem nao Lod i bin yusum Wiliam Fels skil olsem wan raeta mo printa? (eksampol, luk long author index insaed long hymbuk blong kasem wan lis blong ol hym we hem i bin raetem). Mebi ol memba blong famli oli save tokbaot ol talen mo ol paoa we oli stap luk long wanwan long olgeta. ?Olsem wanem nao ol talen blong yumi oli givhan long wok blong God?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “‘Give,’ Said the Little Stream,” Children’s Songbook, 236.

Stap Kam Antap long Stadi blong Yuwan

Kipim wan stadi jenol blong yuwan. Bae yu faenem se i help blong yusum wan jenol o notbuk blong raetemdaon ol tingting, ol aedia, ol kwestin, o ol ting mo filing we oli kam long yu taem yu stap stadi.

Bisop Patrij I Kasem Konsekresen, i kam long Albin Veselka