26 Epril–2 Mei

Doktrin mo Ol Kavenan 45

“Ol Promes … Bae Oli Kamtru”

Presiden Russell M. Nelson i tijim: “Raetemdaon ol tingting we oli kam long maen blong yu. Raetemdaon ol filing blong yu mo folemap wetem ol aksen we Spirit i talem yu blong mekem.” (“Revelesen blong Jos, Revelesen blong Laef blong Yumi,” Ensign o Liahona, Mei 2018, 93).

Raetemdaon Ol Filing mo Tingting blong Yu

Yumi stap laef long ol taem blong denja, mo hemia i save mekem tingting i trabol. Iven ol disaepol blong Jisas, taem oli bin harem Jisas i stap profesae abaot ol nogud samting we bae oli hapen long taem blong yumi tedei, “tingting blong olgeta i bin trabol tumas” (Doktrin mo Ol Kavenan 45:34). Ol fasfala Sent, long Ketlan, Ohaeo, olgeta tu tingting blong olgeta i bin trabol from ol taem blong denja we oli bin stap laef long hem. Long medel blong plante samting, i bin gat “plante giaman ripot … mo plante krangke stori” we oli bin stap spolem gud mesej ia blong gospel (Doktrin mo Ol Kavenan 45, heding blong seksen). Be ansa blong Lod, long taem bifo mo naoia, hem i: “Yufala i no mekem tingting blong yufala i trabol” (ves 35). Yes. I gat fasin nogud, be tu, i gat pruf se God i stap mekem wok blong Hem i stap go hariap. Yes. I gat ol bigfala denja we oli talem se bae oli kam fastaem long Seken Kaming, mo yumi mas save gud long olgeta. Be, hemia i no ol woning blong denja nomo; oli ol saen tu se ol promes blong God bae oli kamtru i no longtaem. Maet hemia nao, risen from wanem Doktrin mo Ol Kavenan 45—wan revelesen we i tokbaot plante long ol saen ia long ditel—”ol Sent oli bin glad tumas” long hem (seksen heding).

Sam Aedia blong Skripja Stadi blong Yuwan

Doktrin mo Ol Kavenan 45:1–5

Jisas Kraes i Loya blong yumi long fored blong Papa.

?Yu bin filim we yu no naf, o yu no klin inaf long fored blong God? Bae yu save faenem kwaet pis long tingting long Doktrin mo Ol Kavenan 45:1–5. Ol toktok olsem “loya” mo “toktok long bihaf blong yu,” ?oli stap talem wanem long yu? ?Olsem wanem Sevya i toktok long bihaf blong yu, o i toktok from yu? ?Hem i minim wanem blong save se Kraes i Loya blong yu?

Olgeta toktok ia we oli kam long Josef Filding Smit i save helpem yu blong tingting hevi long ol ves ia: “Jisas i loya blong yumi; Hem i stap toktok long bihaf blong yumi olsem medelman tru long seves mo ol wok blong Hem, blong stretem yumi, blong mekem yumi kam blong agri wetem God” (insaed long Conference Report, Oct. 1953, 58).

Luk tu long 2 Nifae 2:8–9; Mosaea 15:7–9; Moronae 7:27–28; Doktrin mo Ol Kavenan 29:5; 62:1.

Doktrin mo Ol Kavenan 45:9–10

Gospel i wan standet long ol nesen.

Long taem bifo, wan standet i wan bana o flaeg we oli stap tekem i go long faet. Hem i go olbaot, mo i mekem ol soldia oli yunaet; mo i helpem ol soldia blong save weaples blong kam wanples long hem, mo wanem blong mekem. Wan standet i stap tu olsem wan eksampol, o rul we oli stap makem ol nara samting wetem. Taem yu stap rid long Doktrin mo Ol Kavenan 45: 9–10, tingting hevi long wei we ol kavenan blong gospel oli bin stap olsem wan standet long yuwan. ?Bae long wanem wei nao laef blong yu i defren sapos yu no bin gat ol kavenan ia?

Luk tu long Aesea 5:26; 11:10–12; Doktrin mo Ol Kavenan 115:5–6.

Doktrin mo Ol Kavenan 45:11–75

Ol promes blong Lod bae oli kamtru.

Wo, fasin we i no stret, mo ples we i kam prapa nogud bae oli hapen bifo long Seken Kaming. Lod i bin talem se: “Yufala i no mekem tingting blong yufala i trabol tumas, from we, taem evri samting ia i kam blong hapen, bae yufala i save se ol promes we mi bin mekem long yufala bambae oli hapen” (Doktrin mo Ol Kavenan 45:35).

Taem yu stap stadi long Doktrin mo Ol Kavenan 45:11–75, tingting blong no lukluk nomo long ol trabol taem we i stap long profesi, be tu, lukluk long ol blesing we Lod i stap promesem (eksampol, ol promes we oli stap long ol ves 54–59 abaot wan taosen yia blong rul blong Sevya). Yu save mekem hemia taem yu stap mekem ol lis, o taem yu stap makem ol ves ia. ?Wanem nao yu faenem we i stap helpem yu blong no “mekem tingting blong yu i trabol” abaot ol las dei?

Doktrin mo Ol Kavenan 45:31–32, 56–57

“Stanap long ol tabu ples,” mo man i no muvumaot yu long hem.

Wan long ol risen we Sevya mo ol profet blong Hem oli stap tijim yumi abaot ol saen blong Seken Kaming, hem i blong helpem yumi blong rere. ?Wanem nao yu stap lanem insaed long Doktrin mo Ol Kavenan 45:31–32, 56–57 abaot fasin blong stap rere from Seken Kaming blong Lod? Bae i save help blong luklukbak long parabol blong ol ten yangfala gel, we i stap long Matiu 25:1–13. Sevya i komperem oel insaed long parabol ia long trutok mo long Tabu Spirit (luk long Doktrin mo Ol Kavenan 45:57). ?Wanem niu tingting yu kasem taem yu stap ridim parabol ia long wei ia?

Parabol blong Ol Ten Yangfala Gel, i kam long Dan Burr

Doktrin mo Ol Kavenan 45:11–15, 66–71

Saeon i wan ples blong sefti blong Ol Sent blong God.

Ol Sent blong taem blong Josef Smit, oli bin wantem tumas blong bildimap Saeon, Niu Jerusalem ia, olsem we oli tokbaot long Ita 13:2–9) mo long insperesen revisen blong Baebol we Josef Smit i bin mekem (luk long Moses 7:62–64). ?Wanem nao yu lanem, abaot Saeon—tugeta, we i taon blong bifo long taem blong Inok, mo lata-dei taon—we oli tokbaot long Doktrin mo Ol Kavenan 45:11–15, 66–71?

Tedei, oda ia blong stanemap Saeon, i tokbaot blong stanemap kingdom blong God long weaples yumi stap laef long hem—long weaples ol pikinini blong God oli kam tugeta blong stap sef long “kavenan blong Hem we i no gat en” (ves 9). ?Wanem nao yu save mekem blong help blong bildimap Saeon long ples we yu stap long hem?

Luk tu long Gospel Topics, “Zion,” topics.ChurchofJesusChrist.org.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 45:3–5.?Wanem nao wan loya i stap mekem blong yumi? Yufala i save wajem vidio ia, “The Mediator” (ChurchofJesusChrist.org) mo tokbaot from wanem oli singaotem Sevya se Hem i Loya blong yumi.

Doktrin mo Ol Kavenan 45:9–10.Sapos famli blong yu i gat wan “standet,” o flag blong ripresentem komitmen blong yufala long gospel, ?bae i luk olsem wanem? Maet bae i gud blong mekem wan famli flag tugeta mo toktok raon long wei we yu save helpem ol narawan blong folem ol standet blong gospel.

Doktrin mo Ol Kavenan 45:32.?Wanem nao oli ol “tabu ples” blong yumi”? ?Hem i minim wanem blong “no muvmuv”? ?Olsem wanem nao yumi save mekem hom blong yumi i kam wan tabu ples?

Doktrin mo Ol Kavenan 45:39–44.?Olsem wanem yu save helpem ol memba blong famli blong oli andastanem mining blong lukaot mo wet from Seken Kaming blong Sevya. Mebi yu save tingting abaot wan taem we yu stap wet from, mo serem ol wei we yu “stap wet” from taem ia blong i hapen. O, yu save bekem wan samting tugeta, mo lukaot blong faenem ol saen we oli rere blong yu kakae. ?Wanem nao yumi save mekem blong lukaot mo wet long Seken Kaming blong Sevya?

Doktrin mo Ol Kavenan 45:55.Blong stap ridim 1 Nifae 22:26 mo Revelesen 20:1–3 i save helpem famli blong yu blong andastanem olsem wanem bae “oli fasem” Setan long taem blong Mileniom. ?Olsem wanem nao yumi save fasem Setan insaed long laef blong yumi?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “When He Comes Again,” Children’s Songbook, 82–83; luk tu long “Sam Aedia blong Kam Antap long Famli Skripja Stadi.”

Stap Kam Antap long Stadi blong Yuwan

Yusum ol help tul blong stadi. Yusum ol futnot, Topical Guide, Bible Dictionary, mo Gaed long Ol Skripja blong kasem sam niu tingting aot long ol skripja.

Taem Kraes I Kam, i kam long Jubal Aviles Saenz