“19–25 Epril. Doktrin mo Ol Kavenan 41–44: ‘Loa blong Mi blong Lidim Jos blong Mi,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“19–25 Epril. Doktrin mo Ol Kavenan 41–44” Kam Folem Mi—Blong Wanwan Man, Woman mo : 2021
19–25 Epril
Doktrin mo Ol Kavenan 41–44
“Loa blong Mi blong Lidim Jos blong Mi”
“Sapos yufala i askem, bambae yufala i kasem wan revelesen folem nara revelesen, wan save folem nara save” (Doktrin mo Ol Kavenan 42:61). ?Wanem kwestin nao yu save askem blong save kasem revelesen ia we yu nidim?
Raetemdaon Ol Filing mo Tingting blong Yu
Taem we Jos i gro i kam bigwan long 1830 mo 1831—speseli taem ol niu konvet oli stap muv plante i go long Ketlan, Ohaeo—hem i bin wan taem we i mekem ol Sent oli gladglad mo i leftemap tingting blong olgeta. Be tu, i bin karem sam jalenj i kam. ?Olsem wanem nao yu mekem wan bigfala grup blong ol man we oli biliv oli stap wan, speseli taem oli stap tekem wetem olgeta doktrin mo praktis blong fas jos we oli bin stap long hem? Eksampol, taem we Josef Smit i kasem Ketlan, eli long manis Febwari 1831, hem i bin faenem ol niu memba we oli serem wan sem graon wetem tingting ia se bae oli kopi ol fasin blong Ol Kristin Man blong Niu Testeman (luk long Ol Wok 4:32–37). Lod i bin stretem plante samting long saed ia, mo i bin mekem hemia mo sam nara topik oli bin kam klia, mo plante long ol samting ia, oli kam tru long wan revelesen we oli raetem insaed long Doktrin mo Ol Kavenan 42, we Hem i singaotem: “loa blong mi blong lidim jos blong mi” (ves 59). Long revelesen ia, yumi stap lanem ol trutok we oli mas stap blong stanemap Jos ia blong Lod long ol las dei, mo i tekem tu wan impoten promes we i mekem i klia se, oltaem, i gat moa samting blong lanem: “Sapos yufala i askem, bambae yufala i kasem wan revelesen folem nara revelesen, wan save folem nara save” (Doktrin mo Ol Kavenan 42:61).
Luk tu long Saints, 1:114–19.
Sam Aedia blong Skripja Stadi blong Yuwan
“Hem we i akseptem loa blong mi mo i mekem samting folem, hem ia, hem i disaepol blong mi.”
Eli long yia 1831, olgeta Sent oli stat blong kam tugeta long Ohaeo, oli wantem tumas blong kasem loa ia we God i talem se bae i givim olgeta, olsem wan promes ( luk long Doktrin mo Ol Kavenan 38:32). Be faswan, Lod i bin tijim olsem wanem ol disaepol blong Hem oli mas rere blong kasem o akseptem loa ia blong Hem. ?Wanem prinsipol nao yu faenem insaed long ol ves ia 1–5 we i save helpem ol Sent blong kasem o akseptem loa blong God? ?Olsem wanem ol ol prinsipol ia oli save helpem yu blong kasem instraksen we i kam long Hem?
Ol loa blong God oli rulum Jos blong Hem, mo oli rulum tu ol laef blong yumi.
Olgeta Sent oli bin tekem se, revelesen ia we i stap long Doktrin mo Ol Kavenan 42:1–72 i stap olsem wan long ol revelesen we i moa impoten we Profet i bin kasem. Hem i bin wan long ol faswan blong oli pablisim, we i bin kamaot long tu (2) niuspepa blong Ohaeo, mo oli bin save long hem long wan simpol toktok nomo, we i bin “loa ia.” Plante long ol prinsipol insaed long seksen ia, Lod i bin talemaot olgeta finis bifo. I nomata se seksen ia i no tekem evri komanmen we Lod i bin wantem ol Sent blong Hem blong obei long ol, hem i gud inaf blong tingting hevi long, from wanem nao, ol prinsipol ia oli bin impoten blong ripitim bakegen long niufala Jos ia we Lod i bin putumbak.
Maet bae i helpem yu blong rid long seksen 42 long ol smol pat, olsem olgeta ia we i kam afta, mo faenemaot ol prinsipol we oli stap tijim insaed long wanwan long olgeta. Taem yu mekem olsem, tingting long, hao nao, loa ia we bae i lidim Jos, i save help tu blong lidim laef blong yuwan.
Luk tu long 3 Nifae 15:9.
Doktrin mo Ol Kavenan 42:30–42
?Olsem wanem nao Ol Sent oli bin “givim ol propeti” blong olgeta blong sapotem olgeta we oli pua?
Wan impoten pat blong loa we Lod i bin talemaot we i stap long seksen 42 i wanem we yumi kam blong save olsem loa blong konsekresen (o loa blong givim evri samting) mo loa blong ol wok we yumi kasem blong mekem. Loa ia, i bin tijim Ol Sent olsem wanem, olsem olgeta we oli bin folem Kraes bifo, blong oli “glad blong serem olting blong olgeta” (Ol Wok 2:44; 4 Nifae 1:3), mo i no bin gat puaman long medel blong olgeta” (Moses 7:18). Olgeta Sent oli bin konsekretem ol propeti blong olgeta, taem oli bin givim ol propeti ia i go long Lod, tru long bisop (luk long Doktrin mo Ol Kavenan 42:30–31). Bisop i bin givimbak wanem we oli bin nidim (luk long ves 32)—plante taem, i wanem we oli bin givim mo sam moa. Ol memba oli bin donetem wanem we oli gat we i ova blong save helpem olgeta we oli pua (luk long ol ves 33–34). Loa ia i bin wan bigfala blesing long Ol Sent, speseli long olgeta we oli bin lego evri samting blong kam long Ohaeo. Plante long olgeta Sent, oli bin gat bigfala hat mo givim plante long ol donesen blong olgeta.
I nomata we yumi mekem hemia i defren tedei, ol Lata-dei Sent oli stap laef yet folem loa blong konsekresen. Taem yu stap rid long Doktrin mo Ol Kavenan 42:30–42, tingting hevi olsem wanem yu save givim wanem we God i bin givim long yu blong bildimap kingdom blong Hem, mo blesem olgeta we oli stap long nid.
Luk tu long Linda K. Burton, “Mi Mi Wan Strenja,” Ensign o https://www.churchofjesuschrist.org/study/general-conference/2016/04/i-was-a-stranger?lang=bis, Epril 2016; “The Law,” Revelations in Context, 93–95, history.ChurchofJesusChrist.org.
Kraes mo Yangfala Rij Loya, i kam long Heinrich Hofmann
Doktrin mo Ol Kavenan 42:61, 65–68; 43:1–16
God i stap givim revelesen blong lidim Jos blong Hem.
Traem tingting se, yu stap storian wetem wan niu memba blong Jos we i gladglad blong save se Jos ia, revelesen i stap lidim hem. ?Hao nao bae yu yusum Doktrin mo Ol Kavenan 43:1–16 blong eksplenem long hem, paten ia, we hem i we, Lod, tru long profet blong Hem, i stap lidim Jos ia blong Hem? ?Hao nao bae yu yusum Doktrin mo Ol Kavenan 42:61, 65–68 blong tijim abaot fasin blong kasem revelesen blong yuwan?
Luk tu long “All Things Must Be Done in Order,” Revelations in Context, 50–53, history.ChurchofJesusChrist.org.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 41:1–5.?Wanem sam eksampol blong ol loa blong kantri, mo olsem wanem nao ol loa ia oli blong gud blong yumi? ?Olsem wanem ol loa mo ol komanmen ia blong Papa long Heven oli stap blesem yumi? Ol memba blong famli oli save dro ol pikja blong olgetawan we oli stap obei ol loa blong God.
-
Doktrin mo Ol Kavenan 42:45, 88.?Wanem bae i save helpem famli blong yu blong “laef tugeta wetem lav” Mosaea 4:14–15). Tingting blong raetem o talem wan gud samting abaot wanwan long yufala, o singsing long wan hym abaot lav insaed long famli, olsem “Lav long Hom” (STSP, pej 44).
-
Doktrin mo Ol Kavenan 42:61Mebi yu save ridim ves ia taem yufala i stap putum ol pisis blong pasol i go tugeta. Yusum pasol ia blong tijim olsem wanem God i stap talemaot ol sikret blong Hem—wan revelesen folem nara revelesen, wan save folem nara save.” Ol memba blong famli oli save serem olsem wanem God i bin talemaot trutok long olgeta, smol smol long wanwan taem.
-
Doktrin mo Ol Kavenan 43:25.Maet i gat wan samting we famli blong yu i save yusum blong krietem ol saon blong bigfala tanda we i faerap, olsem wan wei blong statem toktok raon long ves 25. ?Olsem wanem nao voes blong Lod i wan “voes blong ol tanda”? Tugeta, lukluk gud insaed long ves ia blong faenem ol wei we Lod i save singaot long yumi blong sakem sin. ?Olsem wanem nao bae yumi save tekem moa aksen folem voes ia blong Lod?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Want to Live the Gospel,” Children’s Songbook, 148; luk long “Sam Aedia blong Kam Antap long Famli Skripja Stadi.”
Stap Kam Antap long Fasin blong Yumi blong Stap Tij
Mekem wan ples we oli filim lav long hem. Wei we ol memba blong famli oli stap filim mo tritim olgeta i save lidim bigwan spirit we i stap insaed long hom blong yu. Helpem ol memba blong famli blong mekem pat blong olgeta blong stanemap wan hom we i gat lav mo respek, blong mekem se evriwan i filim fri blong serem ol eksperiens, ol kwestin, mo ol testemoni. (Luk long Teaching in the Savior’s Way, 15.)
Josef Smit we i stap prij long Nauvu, i kam long Sam Lawlor