“12–18 Epril. Doktrin mo Ol Kavenan 37–40: ‘Sapos Yufala I No Stap Wan, Yufala I No blong Mi,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“12–18 Epril. Doktrin mo Ol Kavenan 37–40” Kam Folem Mi—Blong Wanwan Man, Woman mo Famli: 2021
Ol Sent Oli Muv I Go long Ketlan, i kam long Sam Lawlor
12–18 Epril
Doktrin mo Ol Kavenan 37–40
“Sapos Yufala I No Stap Wan, Yufala I No blong Mi”
Blong stap raetemdaon ol tingting mo ol filing blong yu taem yu stap stadi, i wan wei we yu save folem blong obei long kaonsel blong God blong “holemtaet gud waes” (Doktrin mo Ol Kavenan 38:30).
Raetemdaon Ol Filing mo Tingting blong Yu
Long ol fasfala Sent, Jos i bin wan ples we i moa bitim blong jes harem sam prijing long Sandei. Truaot long ol revelesen blong Hem i go long Josef Smit, Lod i tokbaot Jos wetem ol toktok olsem: stamba tingting, kingdom, Saeon, mo, plante taem, wok. Maet hemia nao i bin pulum plante fasfala memba blong Jos. Oli bin lavem doktrin ia blong Jos we i kambak, be tu, plante oli bin wantem wan samting we oli save givim laef blong olgeta long hem. Mekem se, oda blong Lod long 1830, blong Ol Sent oli kam tugeta long wanples long Ohaeo, i no bin isi blong samfala blong folem. Blong ol pipol olsem Phebe Carter (Fibi Kata), i minim blong lego wan gudfala haos mo go from wan ples we hem i no save long hem (luk long “Ol Voes blong Restoresen” we i stap long en blong aotlaen ia). Tedei, yumi save luk klia wanem we olgeta Sent ia oli bin save luk nomo wetem ae blong fet: Lod i gat ol bigfala blesing i bin stap blong olgeta we oli bin stap long Ohaeo.
Nid ia, blong kam tugeta long wanples long Ohaeo, i bin pas longtaem finis, be Ol Sent tedei, oli stap yunaet raon long semfala stamba tingting ia nomo, semfala wok ia nomo: “blong mekem Saeon i muv fored” (Doktrin mo Ol Kavenan 39:13). Olsem ol fasfala Sent, yumi lego fogud “fasin blong kea long ol samting blong wol” (Doktrin mo Ol Kavenan 40:2) from se yumi trastem promes blong Lod: “Bae yu kasem … wan blesing we i bigwan tumas we yu neva bin save wan olsem bifo” (Doktrin mo Ol Kavenan 39:10).
Luk tu long Saints, 1:109–11.
Sam Aedia blong Skripja Stadi blong Yuwan
?Wanem nao Josef Smit i bin stap transletem long 1830?
Long ves ia, Lod i bin stap tokbaot wok blong Josef Smit long wan revisen blong Baebol we i kam tru long insperesen, we oli tokbaot olsem “translesen.” Taem Josef i bin kasem revelesen we oli raetem insaed long seksen 37, hem i bin komplitim samfala japta nomo long buk blong Jenesis mo i jes lanem abaot Inok mo Saeon siti blong hem (luk long Jenesis 5:18–24; Moses 7). Sam long ol prinsipol ia we Lod i bin tijim Inok, oli semmak long olgeta we Lod i bin talemaot long seksen 38.
Luk tu long Church History Topics, “Joseph Smith Translation of the Bible,” ChurchofJesusChrist.org/study/topics.
Josef Smit i wok wetem Sidni Rigdon long wan revisen blong Baebol we i kam tru long insperesen. Pikja i kam long Annie Henrie Nader
God i karem yumi kam tugeta blong blesem yumi.
Lod i bin endem tok blong Hem blong kam tugeta long Ohaeo taem Hem i talem: “Luk, hemia i waes toktok” (Doktrin mo Ol Kavenan 37:4). Be i no evriwan we i bin luk kwik se i gat waes tingting long hemia. Long seksen 38, Lod i bin talemaot waes tingting blong Hem long moa ditel. ?Wanem nao yu lanem aot long ol ves 11–33 abaot ol blesing blong kam tugeta long wanples? Ol memba blong Jos oli nomo gat oda blong kam tugeta tru long fasin blong muvaot long wan ples i go long nara ples; ?long wanem wei nao yumi kam tugeta long wanples tedei? ?Olsem wanem ol blesing ia oli blong yumi tu tedei? (luk long Russell M. Nelson, “The Gathering of Scattered Israel,” Ensign o Liahona, Nov. 2006, 79–81).
Taem yu stap ridim haf blong seksen ia, lukaotem ol skripja we oli bin helpem ol Sent blong gat fet ia we oli bin nidim blong obei long komanmen ia blong God blong kam tugeta wanples long Ohaeo. Mo tu, tingting abaot ol komanmen we Hem i bin givim long yu mo fet we yu nidim blong obei olgeta. Olgeta kwestin ia i save lidim stadi blong yu:
-
?Wanem nao yu faenem long ol ves 1–4 we i givim yu tras long Lod mo ol komanmen blong Hem?
-
?Olsem wanem ves 39 i helpem yu blong obei ol komanmen blong God, iven taem we i nidim blong mekem sakrifaes?
?Wanem samting moa yu faenem?
Doktrin mo Ol Kavenan 38:11–13, 22–32, 41–42
Sapos mi rere, mi no nid blong fraet.
Olgeta Sent oli bin rere blong fesem plante agens, mo Lod i bin save se bae moa agens bae i kam (luk long Doktrin mo Ol Kavenan 38:11–13, 28–29). Blong helpem olgeta blong oli no fraet, Hem i bin talemaot wan impoten prinsipol: “sapos yufala i rere, bae yufala i no fraet” (Doktrin mo Ol Kavenan 38:30). Tekem wan minit blong tingting hevi long olgeta jalenj we yu stap fesem. Afta, taem yu stap stadi long seksen 38, lisin long ol kwaet toktok blong Spirit we i talem long yu ol wei blong yu rere blong fesem ol jalenj, blong mekem se yu no nid blong fraet.
Luk tu long Ronald A. Rasband, “Yufala I No Mekem Tingting blong Yufala I Trabol,” Ensign o Liahona, Nov. 2018, 18–21.
Ol samting blong wol oli no mas karemaot tingting blong mi blong stap obei long tok blong God.
Ridim ol seksen 39–40, wetem histri bakgraon we i stap long ol heding blong seksen ia, mo tingting long ol wei we, eksperiens ia blong Jemes Kovel, hem i blong yu yusum tu. Eksampol: tingting long sam taem we “hat [blong yu] … i bin stret long fored blong [God]” (Doktrin mo Ol Kavenan 40:1). ?Olsem wanem nao yu yu bin kasem blesing from se yu bin fetful? Mo tu, tingting long “fasin blong kea long ol samting blong wol ia” we yu stap fesem (Doktrin mo Ol Kavenan 39:9; 40:2). ?Wanem nao yu faenem insaed long ol seksen ia we i givim insperesen long yu blong yu obei oltaem moa?
Luk tu long Matiu 13:3–23.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 37:3.Blong helpem famli blong yu i andastanem sakrifaes ia we Ol Sent oli bin mekem blong kam tugeta wanples long Ohaeo, yu save lukluk i go long map we i kam wetem aotlaen ia.
-
Luk long Doktrin mo Ol Kavenan 38:22.?Olsem wanem nao yumi save mekem Jisas Kraes i “[man] we i stap givim loa” long famli blong yumi? ?Olsem wanem nao we taem yumi stap folem ol loa blong Hem, mi mekem se yumi wan “fri pipol”?
-
Doktrin mo Ol Kavenan 38:24–27.Blong tijim ol pikinini mining blong “stap wan,” yu save helpem olgeta blong kaontem ol memba blong famli blong yufala, mo tokbaot from wanem wanwan man mo woman i impoten long famli blong yu. Tokbaot bigwan we, tugeta, yufala i wan famli. Yu save helpem ol pikinini blong yufala blong droem wan bigfala namba 1 long wan posta, mo dekoretem wetem ol nem mo ol droing, o ol pikja blong wanwan memba blong famli. Mo tu, yu save raetem, antap long posta, ol samting we bambae yufala i mekem blong kam moa yunaet olsem wan famli. Maet yu save wajem vidio ia, “Love in Our Hearts” (ChurchofJesusChrist.org) o ridim Moses 7:18.
-
Doktrin mo Ol Kavenan 38:29–30.Yufala i save toktok raon long sam eksperiens we i jes pas, o sam eksperiens blong yufalawan we i bin nidim blong wan i rere. ?Olsem wanem nao, taem yu bin rere, i bin jenisim eksperiens we yu bin gat? ?Wanem nao Lod i wantem yumi blong rere from? ?Olsem wanem nao we, taem yumi rere, i helpem yumi blong yumi no stap fraet? ?Wanem nao yumi save mekem blong rere?
-
Doktrin mo Ol Kavenan 40.?Wanem nao, sentens ia, “fasin blong kea long ol samting blong wol ia” (ves 2) i minim long yumi? ?I gat samfala “fasin blong kea long ol samting blong wol ia” we oli stap holemtaet yumi blong kasem toktok blong God “wetem gladhat”? ?Olsem wanem nao bae yumi stap winim olgeta?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Jesus Said Love Everyone,” Children’s Songbook, 61.
Ol Voes blong Restoresen
Stap kam tugeta wanples long Ohaeo
Ketlan Vilej, i kam long Al Rounds
Wetem olgeta plante Sent we oli bin kam tugeta long wanples long Ohaeo, long ol yia 1830, i bin gat Phebe Carter (Fibi Kata). Hem i bin joenem Jos long Not Is Yunaeted Stet, taem hem i stap long medel blong ol twante yia blong hem, be papa mo mama blong hem i no bin joen. Samtaem afta, hem i bin raetem desisen ia blong hem blong muv i go long Ohaeo, blong joen wetem olgeta Sent:
“Ol fren blong mi oli sapraes long wokbaot blong mi, semmak olsem mi bakegen, be wan samting insaed long mi i bin pusum mi blong mekem. Harem nogud blong mama blong mi from se bae mi aot long hom, i wan samting we mi harem i had blong tekem; mo sapos i no from spirit insaed long mi, bae mi no save mekem nomo. Mama blong mi i talem se, bae i moa gud se bae hem i berem mi, bitim we bae mi go miwan insaed long wol ia we i no gat hat.
“‘[Phebe],’ hem i talem wetem strong tingting, ‘?bae yu kambak long mi sapos yu faenem se fasin blong Ol Momon ia, i wan giamanwan?’
“Mi ansa, ‘yes mama, bae mi kambak.’ … Ansa blong mi i mekem hat blong hem i oraet; be i bin had mo i gat plante harem nogud blong save seperet. Taem we taem i kam blong mi aot, mi no save talem tata; mekem se mi raetem ol not blong talem tata, mo mi livim i stap long tebol blong mi, mi ron i go daon long ol step, mi jiam long wilkat. Mi lego hom ia we mi bin lavem tumas, we mi bin groap long hem, blong joenem laef blong mi wetem ol sent blong God.”1
Long wan long ol mesej ia blong talem tata, Phebe i bin raetem:
“Papa mo Mama blong Mi we Mi Lavem Yutufala Tumas—naoia, bae mi aot long ruf blong haos blong papa blong wan smol taem … mi no save se bae mi aot kasem wetaem—be mi aot wetem ol filing blong bigfala tangkyu from kaen fasin blong yutufala we yutufala i bin givim long mi, we mi bebi i kam kasem tedei—be i luk se Hae God i givim oda long mi se i mas olsem, mo i mas olsem. Bae yumi putum evri samting i go long han blong Hae God mo yumi talem tangkyu from se Hem i bin letem yumi laef tugeta blong wan longfala taem long ol situesen we i gud tumas, mo wetem bilif ia se evri samting bae i go blong gud blong yumi sapos yumi lavem God bitim evri samting. Bae yumi luksave se yumi save prea long wan God ia we bae i harem ol tru prea blong evri samting we Hem i bin krietem, we i kamaot wetem tru hat blong yumi, mo bae i givim long yumi wanem we i bes blong yumi. …
“Mama, mi biliv se hem i tingting blong God blong mi mi go long Wes mo mi bin save hemia longtaem se bae i olsem. Naoia, rod i open … ; Mi biliv se Spirit blong Lod we i bin mekem hemia, mo hemia i inaf blong evri samting. O, yu yu no wari tumas from pikinini blong yu; Lod bae i givim kamfot long mi. Mi biliv se Lod bae i lukaotgud long mi, mo bae i givim mi wanem we i bes long mi. … Mi stap go, from se Masta i singaot—Hem i talemaot diuti blong mi i klia.”2
