“5 Epril–11 Epril. Doktrin mo Ol Kavenan 30–36: ‘Mi Singaotem Yu blong Prijim Gospel blong Mi,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“5 Epril–11 Epril. Doktrin mo Ol Kavenan 30–36” Kam Folem Mi—Blong Wanwan Man, Woman mo Famli: 2021
5 Epril–11 Epril
Doktrin mo Ol Kavenan 30–36
“Mi Singaotem Yu blong Prijim Gospel blong Mi”
Insaed long ol skripja, yumi save faenem ol niu lukluk long ol defdefren situesen blong yumi. Askem Lod blong i helpem yu blong faenem wan mesej we i blong yu nomo insaed long Doktrin mo Ol Kavenan 30–36.
Raetemdaon Ol Filing mo Tingting blong Yu
Parli P. Prat i bin wan memba blong Jos blong samples wan manis taem God i bin singaotem hem “long ples we i no gat plante man long hem” blong prijim gospel (Doktrin mo Ol Kavenan 32:2). Tomas B. Mars i bin wan memba blong Jos we i no kasem wan manis yet, be oli talem long hem se: “aoa blong misin blong yu i stap kam” (Doktrin mo Ol Kavenan 31:3). Orson Prat, Edwod Patrij, mo plante moa i semmak long tufala; oli jes baptaes nomo i kam long Jos taem we misin koling blong olgeta i kam tu. Maet, taem olsem, i bin wan nid—long manis Septemba blong 1830 i go, i no gat wan i bin kam wan memba blong Jos; mo hemia i bin stap olsem blong moa long sikis manis. Be long paten ia, i gat wan lesen we i blong yumi tedei: sapos yu save inaf samting blong save akseptem gospel ia we i kambak tru long baptaes, yu save inaf ia nao blong save serem wetem ol narawan. I tru, oltaem yumi wantem kasem moa save long saed blong gospel, be God i bin neva bin tingting tu taem blong singaotem “olgeta we oli no skul gud” o oli no save tumas samting, blong prijim gospel (Doktrin mo Ol Kavenan 35:13). Wanem we i tru i stap, i we, Hem i stap invaetem yumi evriwan blong “openem maot blong yu blong talemaot gospel blong mi” (Doktrin mo Ol Kavenan 30:5). Mo yumi mekem hemia long bes wei, i no tru long waes tingting mo eksperiens blong yumi nomo, be tu, “tru long paoa blong Spirit” (Doktrin mo Ol Kavenan 35:13).
Luk tu long “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69.
Sam Aedia blong Skripja Stadi blong Yuwan
Oli singaotem mi blong prijim gospel blong Jisas Kraes.
I nomata oli no singaotem yu, o givim koling long yu blong stap wan misinari, Lod i wantem yu blong serem gospel blong Hem, mo plante long ol toktok blong Hem long ol fasfala misinari blong dispensesen ia, oli blong yu. Taem yu stap stadi long Doktrin mo Ol Kavenan 30–36, raetemdaon wanem yu lanem abaot koling ia blong prijim gospel. Yu save mekem wan lis blong ol samting we Lod i askem ol misinari blong Hem (eksampol, luk long Doktrin mo Ol Kavenan 30:8) mo wan nara lis blong ol samting we Lod i promesem olgeta (eksampol: luk long Doktrin mo Ol Kavenan 30:11).
?Olsem wanem ol ves ia oli save leftemap tingting blong wan we yu save hem, we i stap givim seves, o i stap rere blong go long wan misinari wok misin, o wan Jos Seves misin? ?Wanem nao yu faenem we i givim insperesen long yu blong serem gospel ia?
Luk tu long Doktrin mo Ol Kavenan 35:13–15; Russell M. Nelson and Wendy W. Nelson, “Hope of Israel” (wol yut divosen, 3 Jun 2018), HopeofIsrael.ChurchofJesusChrist.org; Silvia H. Allred, “Go Ye Therefore,” Ensign o Liahona, Nov. 2008, 10–12.
Yumi evriwan i ol misinari blong Jos Ia blong Jisas Kraes.
Doktrin mo Ol Kavenan 31:1–2, 5–6, 9, 13
Lod i save helpem mi wetem ol famli rilesensip blong mi.
Ol famli long ol yia 1830 oli bin gat trabol ia wetem ol semfala samting we ol famli tedei oli stap fesem. ?Wanem help mo promes we Lod i bin givim long Tomas B. Mars abaot famli blong hem? ?Olsem wanem ol toktok blong Hem oli save helpem yu wetem ol famli rilesensip blong yu?
Blong save moa abaot Tomas B. Mars, luk long Saints, 1:79–80, 119–20.
?Misin ia i go long Ol Man blong Leman, i bin wokaot o no?
Taem we Oliva Kaodri, Pita Witma Junia, Parli P. Prat, mo Siba Piteson oli aot blong go prij long Ol Indian blong Amerika long Wes blong Misuri, oli bin biliv se oli bin stap mekem ol profesi blong Buk blong Momon oli kamtru abaot Ol Man blong Leman we bae oli kasem gospel ia long ol las dei (eksampol, luk long 1 Nifae 13:34–41; Inos 1:11–18). Mo long en blong misin blong olgeta, iven we oli gat ol gud wok wetem samfala grup, oli no bin baptaesem wan Indian blong Amerika nating. Be oli bin baptaesem ova long wan handred pipol kolosap long Ketlan, Ohaeo; oli bin stop long ples ia taem oli bin stap go long Misuri. Long medel blong ol konvet ia, i bin gat ol strong lida blong Jos, wetem Sidni Rigdon, mo afta long hemia, Ketlan i kam wan impoten ples blong Jos i kam tugeta wanples. ?Eksperiens ia i stap tijim wanem long yu abaot wei we Lod i stap mekem wok blong Hem i kamtru?
Luk tu long “A Mission to the Lamanites,” Revelations in Context, 45–49.
Doktrin mo Ol Kavenan 33:12–18
Sapos mi bildimap laef blong mi long gospel blong Sevya, bambae mi no foldaon.
Doktrin mo Ol Kavenan 33 : ol toktok insaed ia i go long Notrop Swit mo Esra Teya, we tufala i jes konvet. Notrop i lego Jos stret afta we revelesen ia i bin kamaot. Esra i bin fetful blong givim seves blong sam taem, be long en, hem i bin kamaot long Jos. Hemia i wan gudfala janis blong skelem hamas nao yu stanap strong “antap long strong ston [ia]” (ves 13) blong gospel. ?Wanem trutok, insaed long ol ves ia, we i helpem yu blong gohed blong stap fetful long Sevya?
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 30:2.Olsem wan famli, ?yumi stap mekem gud olsem wan famli blong lukluk nomo long ol samting we i blong God be i no “ol samting we i blong wol ia”?
-
Doktrin mo Ol Kavenan 31.Taem yu stap ridim ol promes blong Lod long Tomas B. Mars abaot famli blong hem, yu save tokbaot ol blesing we oli kam long famli blong yu from misinari wok. Yufala i save singsing tu wan hym we i go wetem topik ia, olsem: “Talem Se Mi Redi blong Go, Masta(STSP, pej 46). ?Long wanem wei nao famli blong yu i kasem blesing taem yu serem gospel wetem ol narafala man?
-
Doktrin mo Ol Kavenan 33:7–10.?Wanem pikja nao Lod i bin yusum long ol ves ia blong tokbaot fasin blong serem gospel? ?Wanem sam nara pikja o haed toktok famli blong yu i tingting long hem? Maet bae ol pikja ia oli save helpem famli blong yu blong tingting long sam niu gudfala wei blong serem gospel. Maet storian ia bae i lidim yufala i go long wan plan blong serem gospel. Tingting blong mekem rolplei long ol gudfala situesen ia.
-
Luk long Doktrin mo Ol Kavenan 34:10.Pikimap wan sentens aot long ves 10, mo invaetem wan memba blong famli blong wispa long sentens ia. Ol nara memba blong famli oli save traem blong faenem wanem sentens ia, hem i talemaot. Afta, askem wan memba blong famli blong talem sentens ia long wan voes we i laod. ?Olsem wanem hemia i helpem yumi blong andastanem from wanem Lod i givim komanmen long yumi blong “leftemap voes blong [yumi]”.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Hope They Call Me on a Mission,” Children’s Songbook, 169.
Ol Voes blong Restoresen
Ol Fasfala Konvet
Iven bifo Jos i bin oganaes, Lod i bin talemaot: “Garen i waet, i rere blong oli tekemaot kaekae” (Doktrin mo Ol Kavenan 4:4). Toktok ia, long ol manis afta we i kamaot, i gat pruf se i tru, from hamas pipol we oli bin stap lukaotem trutok, Spirit blong God i bin lidim olgeta blong faenem Jos Ia blong Jisas Kraes we i bin kambak.
Plante long ol fasfala konvet ia oli bin plei bigfala pat blong stanemap fandesen blong Restoresen, mo ol stori blong olgeta abaot taem we oli bin jenisim laef blong olgeta, i impoten long yumi tedei. Fet we oli bin soem i semmak fet ia we yumi nidim blong konvet moa i kam long gospel blong Jisas Kraes.
Abigail Calkins Leonard
Taem we Abigail Calkins Leonard i bin stap long medel blong ol teti yia blong hem, hem i bin filim blong hem i mas kasem fogivnes from ol sin blong hem. Wanwan taem bae hem i ridim Baebol, mo ol pipol blong ol defren Kristin jos bae oli kam visitim haos blong hem, be hem i bin konfius abaot wanem nao i mekem wanwan long ol jos ia oli defdefren long olgeta. Hem i talem: “Wan moning, mi tekem Baebol blong mi, mi go long bus, mo mi nildaon long ni blong mi.” Hem i bin prea strong long Lod. Hem i talem: “Wantaem nomo, wan visen i kamaot long fored blong ae blong mi, mo ol defren kaen jos oli pas, wan afta wan, mo wan voes i singaotem mi i stap talem: ‘Olgeta ia, oli bildimap olgeta blong mekem mane nomo.’ Afta, mi bin save luk wan bigfala laet, mo wan voes we i kam long heven i talemaot: ‘Bambae mi resemap wan pipol, we bae mi glad se oli blong mi, mo bae mi blesem olgeta.’” I no longtaem afta, Abigail i bin harem abaot Buk blong Momon. I nomata se hem i no bin gat wan kopi yet, hem i bin lukaot blong “save trutok blong buk ia, tru long presen mo paoa blong Tabu Spirit,” mo “wantaem nomo, i bin filim we hem i stap.” Taem we hem i bin save ridim Buk blong Momon, “hem i bin rere blong kasem toktok insaed long hem.” Hem mo hasban blong hem, Liman, tufala i bin baptaes long 1831.1
Tomas B. Mars
Taem we Tomas B. Mars i bin wan yang adalt, hem i bin stadi long Baebol mo i bin joenem wan Kristin jos. Be hem i no bin stretem tingting blong hem, mo hem i bin kamaot long evri jos. Hem i talem, “Mi save lelebet abaot spirit blong profesi, mo mi talem long wan lida blong relijin se mi wantem luk se wan niu Jos bae i girap, we bae i gat trutok ia we i klin gud i stap.” I no longtaem afta long hemia, Tomas i bin gat wan kwaet toktok we i kam long Spirit, blong hem i mas aot long hom blong hem long Boston, Masajusets, mo i travel i go long Wes. Afta we hem i spendem tri manis long Wes Niu Yok, we hem i no faenem wanem we hem i bin stap lukaotem, nao hem i stat blong gobak hom. Long rod ia, wan woman i bin askem Tomas sapos hem i bin harem abaot “Gol Buk se wan yut, we nem blong hem, Josef Smit i bin faenem.” Tingting ia i winim tingting blong hem, mo Tomas i travel i go long Palmaera kwiktaem mo i bin mitim Martin Haris long print stoa, stret long taem ia we ol fasfala 16 pej blong Buk blong Momon oli bin stap kamaot long print. Oli bin letem Tomas i tekem wan kopi blong ol 16 pej ia, mo hem i tekem ol pej ia i gohom long waef blong hem, Elisabet. Hem i talem: “Hem i bin glad tumas, mo hem i bin bilivim se hem i toktok blong God.” Afta long hemia, Tomas mo Elisabet i muv i go long Niu Yok, wetem ol pikinini blong tufala, mo oli bin kasem baptaes.2 (Blong gat moa infomesen abaot Tomas B. Mars, luk long Doktrin mo Ol Kavenan 31.)
Parli mo Thankful Prat
Olsem Tomas Mars, Parli mo Thankful Prat, tufala i bin mekem folem ol samting we i pusum tufala long saed blong spirit, blong tufala i lego gudfala fam blong olgeta long Ohaeo, wetem tingting ia blong prijim gospel olsem we oli bin andastanem long Baebol. Taem we Parli i talem long brata blong hem, “Spirit blong ol samting ia i wok wetem paoa long maen blong hem, mekem se hem i no save spel.”3 Taem oli kasem Is Niu Yok, Parli i bin kasem tingting ia blong stap smol long eria ia. Thankful i bin disaed se bae hem i stap mo ol narawan bae oli gohed. “Mi mi gat wok long ples ia,” Parli i bin talem long hem, “mo wanem wok ia, o bae i tekem mi hamas taem blong mekem, mi mi no save; be bambae mi kam taem wok ia i finis.”4 Long ples ia nao i fas taem we bae Parli i harem abaot Buk blong Momon. “Mi filim se mi intres tumas long buk ia,” hem i talem.5 Hem i askem wan kopi, mo i ridim buk truaot long naet. Long moning, hem i bin save se buk ia i tru, i tekem buk ia i impoten, “i moa impoten bitim evri rij samting blong wol ia.”6 Afta sam dei nomo, Parli i kasem baptaes. Afta long hemia, hem i gobak luk Thankful, we hem tu, i kasem baptaes. (Blong gat moa infomesen abaot Parli P. Prat, luk long Doktrin mo Ol Kavenan 32.)
Peinting blong Parli P. Prat i kam long Jeffrey Hein
Sidni mo Phebe Rigdon
Taem hem i bin stap long rod blong hem, we i aot long Niu Yok i go long wan misin long Misuri, Parli Prat mo ol fren blong hem we oli stap wok, oli bin stop long Menta, Ohaeo, long hom blong Sidni mo Phebe Rigdon—tufala i ol gudfala fren blong Parli, we hem i save tufala taem oli bin stap long Ohaeo. Sidni i bin wan Kristin pasta, mo Parli i bin wan memba blong kongregesen blong hem, mo i tekem hem olsem wan tija blong lidim tingting blong hem long saed blong spirit. Parli i bin wantem tumas blong talem long ol fren blong hem abaot Buk blong Momon, mo Restoresen blong gospel blong Jisas Kraes. Sidni hemwan, i bin stap lukaotem blong putumbak tru Jos we hem i bin faenem insaed long Niu Testeman, nomata we hem i no gat gud filing abaot Buk blong Momon long fas taem. Be hem i talem fren blong hem, Parli: “Bae mi ridim buk blong yu, mo bae mi traem had blong faenemaot se, yes o no, hem i wan revelesen we i kam long God.”7 Afta tu wik blong stadi mo prea, tugeta, hem mo Phebe, tufala i save stret se buk ia i tru. Be Sidni i bin save tu se, blong joenem Jos, bae i wan bigfala sakrifaes blong famli blong hem. Bae hem i lusum wok blong hem olsem wan wokman blong jos, wetem sosol ples blong hem insaed long komuniti. Taem we hem mo Phebe oli toktok raon long hemia, Phebe i talem: “Mi kaontem se bae yumitu pem ol samting ia i hamas, mo … hem i tingting blong mi blong mekem tingting blong God, i nomata bae mi fesem laef o ded.”8
Go long Waelples, i kam long Robert T. Barrett