“29 Maj–4 Epril. Ista: ‘Mi Mi Hem Ia we I Stap Laef, Mi Mi Hem we Oli Bin Kilim Hem I Ded,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)

“29 Maj–4 Epril. Ista,” Kam Folem Mi—Blong Wanwan Man, Woman mo Famli: 2021

Pikja

Kraes we oli katem pikja blong hem long Ston

29 Maj–4 Epril

Ista

“Mi Mi Hem Ia we I Stap Laef, Mi Mi Hem we Oli Bin Kilim Hem I Ded”

Taem yu stap rere blong tingbaot taem we Sevya i bin laef bakegen long ded long Ista Sandei, tingting hevi long wei we revelesen blong tedei i bin mekem fet blong yu i dip moa, se, Jisas Kraes i Wan Stret Pikinini Ia Nomo blong God, mo Hem i Ridima blong wol ia.

Raetemdaon Ol Filing mo Tingting blong Yu

3 Epril 1836, i bin Ista Sandei. Afta we tufala i bin help blong blesem mo pasem sakramen long Ol Sent we oli bin kam tugeta long niufala Ketlan Tempol we oli jes dediketem, Josef Smit mo Oliva Kaodri, tufala i bin faenem wan kwaet ples biaen long wan vel insaed long tempol, mo tufala i bin benem hed blong tufala mo prea long saelen. Afta, long tabu dei ia, taem Ol Kristin Man, long evri ples, oli bin stap makem Laef Bakegen long Ded blong Jisas Kraes, Sevya ia we i bin girap, Hemwan i bin kamkamaot insaed long tempol blong Hem, i talem: “Mi mi hem ia we i stap laef, mi mi hem we oli bin kilim hem i ded” (Doktrin mo Ol Kavenan 110:4).

?Hem i minim wanem blong talem se Jisas Kraes, Hem i “hem ia we i stap laef”? Hem i no minim nomo se Hem i bin girap long tumb long nambatri dei mo i bin kamaot long ol disaepol blong Hem blong Galili. I minim se Hem i stap laef, tedei. Hem i stap toktok tru long ol profet, tedei. Hem i stap lidim Jos blong Hem, tedei. Hem i stap hilim ol soa mo ol hat we oli brokbrok, tedei. Tingbaot ol toktok blong Josef Smit: “Afta long plante testemoni we oli bin givim abaot hem, hemia i testemoni, … we mitufala i givim abaot hem: !Se hem i stap laef! (Doktrin mo Ol Kavenan 76:22). Yumi save harem voes blong Hem long ol revelesen ia. Yumi save witnesem han blong Hem insaed long ol laef blong yumi. Mo wanwan long yumi i save filim glad we toktok ia i talem: “Mi save Ridima hem i laef!” (STSP, pej 38).

Pikja

stadi blong yuwan pikja bokis

Sam Aedia blong Skripja Stadi blong Yuwan

Doktrin mo Ol Kavenan 29:5; 38:7; 62:1; 76:11–14, 20–24; 110:1–10

Jisas Kraes i stap laef.

Profet Josef Smit i bin luk Sevya we i bin girap plante taem, mo tu long ol eksperiens ia, oli raetemdaon insaed long Doktrin mo Ol Kavenan. Taem yu stap ridim ol seksen 76:11–14, 20–24; 110:1–10, ?wanem nao i tajem yu abaot testemoni blong Josef Smit? ?From wanem yu tekem se testemoni blong hem i hevi, o impoten tumas long yu?

Truaot long Doktrin mo Ol Kavenan, Sevya i bin talem witnes blong Hem abaot stret misin blong Hem, mo hamas Hem Hem i Hae. ?Wanem nao yu lanem, abaot Kraes ia we i stap laef, aot long ol toktok blong Hem insaed long Doktrin mo Ol Kavenan 29:5; 38:7; 62:1? Yu save tingting blong raetemdaon ol toktok olsem, we yu faenem taem yu stap stadi long Doktrin mo Ol Kavenan.

Luk tu long Josef Smit—Histri 1:17.

Doktrin mo Ol Kavenan 29:26–27; 42:45–46; 63:49; 88:14–17, 27–31; 93:33–34

From Jisas Kraes, bambae mi laef bakegen long ded.

Josef Smit i bin save se, man i harem olsem wanem, taem hem i stap krae sore from ded blong olgeta we yumi lavem olgeta. Tu long ol brata blong hem, Alvin mo Don Karlos, tufala i bin ded taem tufala i yang nomo. Josef mo Ema, tufala i bin berem sikis long ol pikinini blong tufala, wanwan long olgeta i no kasem tu yia. Be, aot long ol revelesen we hem i bin kasem, Josef i bin gat wan lukluk we i no save finis long saed blong ded mo plan ia we i no save finis we i kam long God. Tingting long ol trutok we oli kamaot long Doktrin mo Ol Kavenan 29:26–27; 42:45–46; 63:49; 88:14–17, 27–31; 93:33–34. ?Olsem wanem ol revelesen ia oli jenisim wei we yu lukluk long ded? ?Olsem wanem oli save jenisim fasin ia we yu stap laef long hem?

Luk tu long 1 Korin 15; M. Russell Ballard, “Visen blong Fasin blong Pemaot Ol Dedman,” Ensign o Liahona, Nov 2018, 71–74; Teachings of Presidents of the Church: Joseph Smith (2007), 174–76.

Doktrin mo Ol Kavenan 18:10–13; 19:16–19; 45:3–5; 76:69–70

Jisas Kraes i bin mekem wan “atonmen we i stret evriwan.”

Wan wei blong lukluk nomo long Sevya long Ista taem, hem i blong stadi long ol revelesen insaed long Doktrin mo Ol Kavenan, we oli tijim abaot sakrifaes ia blong Hem we i pem praes from ol sin blong ol man. Sam long ol skripja ia, yu save faenem long Doktrin mo Ol Kavenan 18:10–13; 19:16–19; 45:3–5; 76:69–70. Maet yu save mekem wan lis blong ol trutok abaot Atonmen blong Sevya we yu faenem insaed long ol ves ia. Blong mekem stadi blong yu i go dip moa, yu save ademap, long lis blong yu, taem yu luklukgud ol skripja refrens we oli putum long “Pem Praes, Atonmen” (Gaed long Ol Skripja, olskripja.ChurchofJesusChrist.org).

Hemia samfala kwestin we i save lidim stadi blong yu:

?From wanem Jisas Kraes i bin jusum blong safa?
?Wanem bae mi mas mekem blong kasem ol blesing blong sakrifaes blong Hem?
?Olsem wanem nao mi save talem sapos Atonmen blong Hem i wok insaed long laef blong mi, o no?

Masta blong Prea, i kam long Yongsung Kim

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Jeneral konfrens.From se jeneral konfrens i foldaon wetem Ista Sandei long yia ia, bae yu save tingting long wei we ol mesej blong konfrens (wetem miusik) oli mekem testemoni blong famli blong yu, abaot Jisas Kraes, i kam dip moa. Eksampol: ol yang pikinini oli save droem wan pikja blong Sevya, o oli save holem wan pikja blong Hem taem oli harem wan mesej o wan singsing abaot Jisas Kraes. Ol nara memba blong famli oli save mekem wan lis blong ol trutok we oli harem abaot Sevya. Afta long hemia, ol memba blong famli oli serem ol droing, o ol lis blong olgeta mo testemoni blong olgeta abaot Jisas Kraes.

Doktrin mo Ol Kavenan 88:14–17; 138:17, 50.Maet bae famli blong yu bae i laekem blong tingting long wan analoji, o wan lesen we i yusum wan samting blong eksplenem se i minim wanem blong ded mo laef bakegen long ded—wan we i soem bodi mo spirit we tufala i seperet, mo afta, we tufala i joen bakegen, olsem wan han mo wan hanglav. ?Olsem wanem, ol ves ia, oli mekem yumi talem moa bigfala tangkyu from samting ia we Sevya i bin mekem blong yumi?

“Kraes we I Laef: Testemoni blong Olgeta Aposol.”Blong leftemap tingting blong toktok raon long ol testemoni blong ol profet blong tedei abaot Sevya, yu save givim wok long wanwan memba blong famli blong ridim wan pat blong “Kraes we I Laef: Testemoni blong Olgeta Aposol” (Ensign o 36299 852 ) mo oli serem wanem we oli lanem abaot Jisas Kraes. Mo tu, yu save soem vidio ia: “Apostle Testimony Montage” (ChurchofJesusChrist.org). ?Wanem trutok nao we yumi faenem we i givim insperesen long yumi?

“Mi Save Ridima Hem I Laef”Blong helpem famli blong yu blong tingting long ol plante wei we Sevya we i girap i blesem yumi tedei, yufala i save singsing long “Mi Save Ridima Hem I Laef” (STSP, pej 38) mo konektem ol trutok we oli stap tijim insaed long singsing ia wetem olgeta we oli stap tijim insaed long olgeta skripja ia: Doktrin mo Ol Kavenan 6:34; 45:3–5; 84:77; 98:18; 138:23. Maet bae famli blong yu bae i laekem blong raetem sam moa ves blong hym ia we i talemaot olsem wanem oli save se Ridima blong olgeta i stap laef.

Blong gat wan Ista vidio mo sam moa risos, luk long Easter.ComeUntoChrist.org.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Jesus Has Risen,” Children’s Songbook, 70.

Stap Kam Antap long Fasin blong Yumi blong Stap Tij

Faenem ol lesen insaed long ol samting we yumi mekem evri dei. Tingting long wei we ol eksperiens evri dei, blong ol memba blong famli blong yu, i save lidim yufala blong gat ol storian we oli gat mining abaot wan trutok blong gospel (luk long Teaching in the Savior’s Way, 4). Eksampol: wan strong ren i save kam wan janis blong tokbaot wei we God i kapsaetem ol blesing long ol pikinini blong Hem.