Visen blong Fasin blong Pemaot Ol Dedman

I Kam long Presiden M. Russell Ballard

Akting Presiden blong Kworom blong Olgeta Twelef Aposol

Mi testifae se visen we Presiden Josef F. Smit i kasem, i tru. Mi witnes se evri man o woman i save kam blong save se hem i tru.

Ol brata mo sista. Toktok blong mi, mi rere longtaem finis bifo waef blong mi, Barbara i ded. Famli blong mi mo mi, i talem tangkyu from lav mo kaen fasin blong yufala. Mi prea se bae Lod i blesem mi taem mi stap toktok long yufala long moning ia.

Long Oktoba 1918, 100 yia i pas, Presiden Josef F. Smit i bin kasem wan bigfala visen. Afta kolosap 65 yia blong fetful seves long Lod insaed long Jos blong Jisas Kraes blong Ol Lata-dei Sent, mo sam wik nomo bifo hem i ded long 9 Novemba 1918, hem i sidaon long rum blong hem, i stap tingting hevi long sakrifaes blong Kraes we i pem praes from ol sin blong man, mo stap ridim hao Aposol Pita i tokbaot seves blong Sevya long spirit wol afta we oli hangem Hem long kros.

Hem i raetem: “Taem mi bin stap rid, mi gat bigfala filing ia. … Taem mi tingting hevi long olgeta samting ia, … ae blong andastaning blong mi oli open, mo Spirit blong Lod i stap long mi, mo mi luk olgeta grup blong ol dedman.” Ful toktok blong visen ia oli raetemdaon long Doktrin mo Ol Kavenan, seksen 138.

Bae mi givim sam bakgraon blong yumi save andastanem moa se Josef F Smit i bin rere laeftaem blong hem blong kasem bigfala revelesen ia.

Taem hem i bin Presiden blong Jos, hem i bin visitim Nauvu long 1906 mo i tingting long wan memori we hem i bin gat taem hem i jes gat faef yia. Hem i talem: “Hemia i stret ples we mi stanap long hem taem we Josef, angkel blong mi, papa blong mi, Haeram, oli kam taem oli stap go long Katej. Hem i no jiam daon long hos blong hem, be papa i lei mo i pikimap mi, mi aot long graon. Hem i talem tata long mi, i putum mi daon mo mi luk hem i ron long hos i go.

Nekis taem we Josef F. i luk olgeta, mama blong hem, Maeri Filding Smit, i pikimap mi, i leftemap mi blong mi luk ded bodi blong olgeta ia we oli ded from relijin, we oli slip saedsaed afta oli kilimded olgeta long Katej kalabus long 27 Jun 1844.

Tu yia afta, Josef F., wetem famli blong hem mo fetful mama blong hem, Meri Filding Smit, oli aot long hom blong hem long Nauvu i go long Winta Kwota. I nomata hem i no gat 8 yia yet, Joseph F. i mas draevem wan tim blong ol buluk aot long Maontros, Aeowa, i go long Winta Kwota, mo afta, i go long Sol Lek Vale, i kasem longwe taem we hem i gat kolosap 10 yia. Mi hop se yufala ol boe mo ol yang man i stap lisingud, mo stap luksave responsabiliti mo wanem God i wantem Josef F. i mekem taem hem i wan smol boe.

Jes fo yia afta, long 1852, taem hem i gat 13 yia, mama blong hem i ded—i livim Joseph mo ol brata mo sista oli nomo gat papa o mama.

Oli singaotem Josef F. Blong i go long wan misin long Hawae long 1854, taem hem i gat 15 yia. Misin ia, i blong moa long tri yia, mo i stat blong wan laef seves insaed long Jos.

Taem hem i gobak long Yuta, Josef F. i mared long 1859. Long ol yia afta, laef blong hem i fulap wetem wok, famli diuti, mo tu moa misin. Long 1 Julae 1866, taem hem i gat 27 yia, laef blong Josef F. i jenis fulwan taem hem i kam wan Aposol, mo Brigham Yang i odenem hem. Long Oktoba long yia afta, hem i tekem wan emti ples long Kaonsel blong Olgeta Twelef. Hem i stap olsem kaonsela long Brigham Yang, Jon Teila, Wilfod Wudrof mo Lorenso Sno, bifo hemwan i kam Presiden long 1901.

Josef F. mo waef blong hem, Julina i welkamem fas pikinini blong tufala, Mercy Josephine, insaed long famli. Hem i gat tu mo haf yia taem hem i pasawe. I no longtaem afta, Josef F. i raetem: “Yestedei i wan manis stat long taem we daling blong mi, Josephine i ded. !O! Sapos mi sevem hem blong i groap i kam woman. Mi misim hem evri dei mo mi filim se mi stap miwan. … God, Yu fogivim wiknes blong mi sapos i rong blong mi lavem ol smolwan blong mi olsem we mi lavem olgeta.”

Long laeftaem blong hem, Presiden Smit i lusum papa, mama, wan brata mo tufala sista blong hem, tufala waef mo tetin pikinini. Hem i savegud wanem ia harem nogud mo i wanem blong lusum wan we yu lavem.

Taem we boe blong hem, Albert Jesse i ded, Josef F. i raet i go long sista blong hem, Martha Ann, se hem i bin askem long Lod blong i sevem hem mo i askem: “?From wanem i olsem? ?O, God, from wanem i mas olsem?”

Nomata ol prea blong hem long tetaem ia, Josef F. i no kasem wan ansa long poen ia. Hem i talem Martha Ann se “i olsem se heven i pasem hed blong yumi nomo” long topik ia blong ded mo spirit wol. Be, fet blong hem long ol promes we i no save finis blong Lod, oli stap strong mo oli no muvmuv.

Long stret taem blong Lod, ol nara ansa, kamfot mo andastaning abaot spirit wol we hem i stap lukaotem, oli kam long Presiden Smit tru long visen we hem i kasem long Oktoba 1918.

Yia ia, hem i bin harem nogud fulap long hem. Hem i harem nogud long bigfala namba blong ol man we oli ded long Bigfala Wol Wo se i gohed blong go antap i kasem ova 20 milian pipol. Antap long hemia, flu sik i go raon long wol, i tekemaot laef blong plante kasem 100 milian pipol.

Long yia ia, Presiden Smit i lusum tri moa memba blong famli blong hem. Elda Haeram Mak Smit blong Kworom blong Olgeta Twelef Aposol, fasbon boe mo bubuman blong mi, oli ded wantaem afta we apendiks i brok insaed long bodi.

Presiden Smit i raetem:“!Mi no save toktok moa—krae sore i sarem maot blong mi! … !Hat blong mi i brok, mo i no gat laef insaed! … !O! !Mi lavem Hem! … Bambae mi lavem hem blong oltaem. Mo bambae i olsem, mo bae i olsem wetem evri boe mo gel blong mi, be hem i fasbon boe blong mi, faswan blong tekem glad mo hop i kam blong gat wan gudfala nem long medel blong ol man. Dip insaed long sol blong mi, !mi talem tangkyu long God from hem! Be … !O! !Mi nidim hem! !Yumi evriwan i nidim hem! Hem i gat yus long Jos. … Mo naoia … !O! !bae mi mekem wanem! !O! !God, helpem mi!

Long nekis manis, dewen blong Presiden Smit, Alonzo Kesler, i ded long wan nogud aksiden. Presiden Smit i raetem long jenol blong hem: “Prapa nogud aksiden ia we i brekem hat blong mi, i mekem harem nogud i kavremap famli blong mi bakegen.”

Sevem manis afta, long Septemba 1918, aeneli blong Presiden Smit mo semtaem bubuwoman blong mi, Ida Bowman Smith, i ded taem i bonem nambafaef pikinini blong hem i kam long wol, angkel blong mi, Haeram.

Mekem se long 3 Oktoba 1918, from hem i gotru long plante harem nogud ova long ol milian pipol we oli bin ded raon long wol from wo mo sik, mo tu, from ol ded insaed long famli blong hem bakegen, Smit i kasem wan revelesen we i kam long heven, we oli save olsem “visen blong fasin blong pemaot ol dedman.”

Hem i tokbaot revelesen ia long nekis dei blong hem, long stat blong sesen blong Oktoba jeneral konfrens. Helt blong Presiden Smit, i stap go daon, be hem i toktok smol taem: “Bambae mi no tokbaot, mo no traem blong tokbaot ol plante samting we oli stap long maen blong mi long moning ia, mo bae mi mekem samtaem afta, sapos Lod i wantem, blong traem talem long yufala sam long ol samting we oli stap long maen blong mi, mo stastap insaed long hat blong mi. Mi bin stap miwan long ol las faef manis ia. Mi stastap long spirit blong prea, blong askem samting, blong fet mo strong tingting; mo mi bin toktok wetem Spirit blong Lod oltaem.

Revelesen hem i kasem long 3 Oktoba i leftemap tingting blong hat blong hem, mo i givim ansa long plante kwestin blong hem. Yumi tu, yumi save gat kamfot mo lanem moa abaot fiuja blong yumi, taem we bae yumi mo olgeta we yumi lavem, yumi ded, mo go long spirit wol, taem yumi stap stadi mo tingting hevi long mining blong hem long wei we yumi laef evri dei.

Long medel blong ol plante samting Presiden Smit i bin luk, i visit blong Sevya long olgeta fetfulwan long spirit wol, afta we Hem i ded long kros. Aot long visen ia, mi kwotem:

“Be luk, aot long medel blong olgeta we oli bin stret mo gud, hem i bin oganaesem ol ami blong hem, mo hem i bin jusum ol mesenja, we oli gat paoa mo atoriti, mo i bin givim raet long olgeta blong go aot mo tekem laet blong gospel i go long olgeta ia we oli bin stap long tudak, yes, long evri spirit blong man, [mo woman]; mo olsem ia nao oli bin prijim gospel long olgeta we oli ded. …

“Long olgeta ia, oli bin tijim fet long God, fasin blong sakem sin, baptaes long bihaf blong olgeta we oli ded blong oli kam klin long sin, kasem presen we i Tabu Spirit tru long fasin blong putum han antap long hed blong man,

“Wetem evri narafala prinsipol blong gospel we i bin nid blong oli save, blong mekem se oli save mekem olgeta oli inaf blong Lod i jajem olgeta semmak olsem man we i gat mit mo bun, be oli laef folem tingting blong God taem oli stap long spirit. …

“From olgeta dedman oli bin tekem se fasin we spirit blong olgeta oli stap longwe long bodi blong olgeta longtaem tumas i olsem blong stap long kalabus.

“Olgeta ia, Lod i bin tijim olgeta, mo i bin givim paoa long olgeta blong oli girap long ded, afta we hem i laef bakegen long ded, blong oli go insaed long kingdom blong Papa blong hem, mo long ples ia, bae oli kasem antap long hed blong olgeta, fasin blong nomo save ded mo laef we i no save finis,

“mo, stat long taem ia i go, blong oli gohed long wok blong olgeta olsem we Lod i bin promesem olgeta, mo blong oli gat pat long evri blesing we Lod i holemtaet i stap blong givimaot long olgeta we oli lavem hem.”

Long visen ia, Presiden Smit i bin luk papa blong hem, Haeram, mo Profet Josef Smit. Hem i bin 74 yia nao afta las taem we hem i luk tufala taem hem i smol boe long Nauvu. Yumi save tingbaot glad blong hem blong luk papa mo angkel blong hem. Maet hem i kasem insperesen mo hemia i leftemap hat blong hem blong save se evri spirit, oli karem bak bodi blong olgeta, mo oli stap wet nomo long dei ia blong promes we bae oli laef bakegen. Visen ia i soemaot moa fulwan bigfala plan we Papa long Heven i gat long ol pikinini blong Hem, mo lav blong Kraes we i pemaot man mo paoa we i no gat wan i semmak, blong Atonmen blong Hem.

Long spesel 100 yia ia, mi invaetem yufala blong tingting gud mo ridim gud revelesen ia. Taem yufala i mekem olsem, bae Lod i blesem yu blong andastanem moa mo glad moa long lav blong God, mo plan blong Hem blong fasin blong sevem man, mo hapines blong ol pikinini blong Hem.

Mi testifae se visen we Presiden Josef F. Smit i kasem, i tru. Mi witnes se evri man o woman i save ridim revelesen ia mo kam blong save se hem i tru. Olgeta we oli no kasem save ia yet long laef ia, bambae oli kam blong save se hem i tru taem evriwan bae i kasem spirit wol. Long ples ia, evriwan bae i lavem mo presem God mo Lod Jisas Kraes from bigfala plan ia blong fasin blong sevem man, mo from blesing blong promes blong Laef Bakegen long Ded, taem bodi mo spirit, bakegen, bae oli joen wan mo neva seperet bakegen.

Mi tangkyu tumas blong save weaples gudfala Barbara blong mi i stap long hem, mo bae mitufala i stap tugeta bakegen wetem famli blong oltaem. Bae pis blong Lod i sapotem yumi naoia mo oltaem, i prea blong mi we mi talem wetem tingting we i stap daon, long nem blong Jisas Kraes, amen.

Ol Not

1. Doktrin mo Ol Kavenan 138:6, 11.

2. Josef F. Smit, insaed long Preston Nibley, The Presidents of the Church (1959), 228.

3. Luk long Joseph Fielding Smith, Life of Joseph F. Smith (1938), 13.

4. Hem i maredem Levira Clark long 1859, Julina Lambson long 1866, Sarah Richards long 1868, Edna Lambson long 1871, Alice Kimball long 1883, mo Mary Schwartz long 1884.

5. Oli bin singaotem Josef F. Smith olsem wan moa kaonsela long Fas Presidensi (Brigham Yang, Hiba J. Kimbol mo Daniel H. Wells). Hem i givim seves tu olsem Seken Kaonsela long Fas Presidensi i go long trifala Presiden blong Jos, oli Jon Teila, Wilfod Wudrof, mo Lorenso Sno.

6. Josef F. Smit i bin stap olsem kaonsela long Fas Presidensi long taem blong administresen wok blong Brigham Yang, mo i stap olsem Seken Kaonsela long Fas Presidensi long taem blong administresen blong Jon Teila, Wilfod Wudrof, mo Lorenso Sno. Hem i bin fas Presiden blong Jos we i bin givim seves anda long Fas Presidensi bifo oli singaotem hem i kam Presiden.

7. Mercy Josephine, fasbon pikinini blong Josef F., i bin bon long 14 Ogis 1867, mo i ded long 6 Jun 1870.

8. Jenol blong Josef F. Smit, 7 Julae 1870, Jos Histri Laebri, Jos blong Jisas Kraes blong Ol Lata-dei Sent, Yuta.

9. Josef F. Smith i go long Martha Ann Smith Harris, 26 Ogis 1883, Jos Histri Laebri; luk long Richard Neitzel Holzapfel mo David M. Whitchurch, My Dear Sister: The Letters between Joseph F. Smith and His Sister Martha Ann (2018), 290–91.

10. Long plante taem, Lod i bin lidim Josef F. Smit, long praevet laef blong hem mo long seves blong hem olsem wan Aposol mo Presiden blong Jos, tru long ol drim blong insperesen, ol revelesen, mo ol visen. Plante taem, ol gudfala presen ia we oli kam long Lod, hem i bin raetemdaon olgeta insaed long jenol blong hem, long ol toktok blong hem, ol taem we hem i stap tingtingbak long ol samting, mo ol ofisol rekod blong Jos.

11. Jenol blong Josef F. Smit, 23 Jen 1918, Jos Histri Laebri; oli stretem speling mo fasin blong raetem sentens; luk long Joseph Fielding Smith, Life of Joseph F. Smith,473–74.

12. Luk long “A. [P.] Kesler Is Killed in Fall from a Building,” Ogden Standard, 5 Feb 1918, 5.

13. Jenol blong Josef F. Smit, 4 Feb 1918, Jos Histri Laebri.

14. Luk long “Ida Bowman Smith,” Salt Lake Herald-Republican, Sept. 26, 1918, 4.

15. Joseph F. Smith, insaed long Conference Report, Oct. 1918, 2.

16. Luk long refrens we i go long “Mama Iv blong yumi” mo “ol fetful gel we oli bin wosipim God we i tru mo i stap laef (Doktrin mo Ol Kavenan 138:39).

17. Doktrin mo Ol Kavenan 138:30, 33–34, 50–52.

18. Toktok blong visen i bin kamaot faswan long 30 Novemba 1918, long edisen blong Deseret News,11 dei afta we Presiden Smith i ded long 19 Novemba. Oli bin printim long Disemba namba blong magasin ia, Improvement Era mo long Jenuware 1919 long ol edisen blong Relief Society Magazine, Utah Genealogical and Historical Magazine, Young Woman’s Journal, mo Millennial Star.

19. Nomata ol boe blong tudak bambae oli laef bakegen long ded, bambae oli no save lavem mo presem Papa long Heven mo Jisas Kraes, olsem olgeta ia we bae oli kasem wan kingdom blong glori. Luk long Alma 11:41; Doktrin mo Ol Kavenan 88:32–35.