?Yu Yu Wantem blong Yu Kam Gud Bakegen?”
From Atonmen blong Jisas Kraes, sapos yumi jusum blong sakem sin mo tanem hat fulwan i go long Sevya, bambae Hem i hilim spirit blong yumi.
Sam manis afta we hem i go long misin, yangfala boe blong mitufala mo misinari kompanion blong hem, tufala i stap blong finisim stadi blong tufala taem boe blong mitufala i filim se hed blong hem i soa bigwan. Hem i filim defren: faswan, hem i lusum kontrol blong lef han blong hem; mo afta tang blong hem i no muvmuv. Nao lef saed blong fes blong hem i go insaed. Hem i no save toktok gud. Hem i save se samting i rong. Wanem we hem i no save, i we, hem i stap long medel blong wan bigfala strok long tri eria blong bren blong hem. Fraet i kam taem hem i stat blong paralaes. Hao kwik wan we i gat strok i kasem kea, i save jenisim bigwan hamas bae hem i kam oraet afta. Fetful kompanion blong hem i tekem desisen mo mekem. Hem i ring long 911, i givim hem wan blesing. Merikel, ambulens i stap faef minit longwe nomo.
Afta we oli karem kwik boe i go long hospital, ol wokman blong hospital oli luk wanem we i stap, oli taem se oli mas givim wan meresin long boe blong mitufala se i save mekem se bae i nomo paralaes wetem taem. Be, sapos i no wan strok, bae meresin ia i save mekem nogud samting long hem, olsem bae blad i ronaot long bren. Boe blong mitufala i mas mekem wan joes. Hem i jusum blong akseptem meresin ia. Nomata we blong kam gud evriwan i bin nidim moa operesen, mo plante manis, boe i kamgud bakegen, i gobak long misin afta we ol risal blong strok blong hem oli lus.
Papa long Heven i gat olgeta paoa mo i save evri samting. Hem i save ol traehad long saed blong bodi. Hem i savegud ol sobodi from smol sik, bigfala sik, kam olfala, ol aksiden mo samting we i no stret we yumi bon wetem. Hem i save ol traehad long saed blong filing we i go wetem wari, stap yuwan, tingting i fasfas, mo sik long tingting. Hem i save wanwan we i stap safa from wan i no mekem gud hem, o i abiusum hem. Hem i save ol wiknes mo ol smol fasin mo ol temtesen we yumi stap traehad wetem.
Long laef ia, yumi fesem ol tes blong luk sapos bae yumi jusum gud, be i no nogud. Long olgeta we oli obei ol komanmen blong Hem, bae oli laef wetem Hem “long wan ples blong hapi we i neva gat en.” Blong helpem yumi blong progres blong kam olsem Hem, Papa long Heven i bin givim evri paoa mo save long Pikinini blong Hem, Jisas Kraes. I no gat trabol long saed blong bodi, filing, o spirit we Kraes i no save hilim.
Long seves blong Sevya long laef ia, ol skripja oli tokbaot plante merikel taem we Jisas Kraes i bin yusum tabu paoa blong Hem blong mekem olgeta we oli no oraet long bodi oli kam gud bakegen.
Gospel blong Jon i tokbaot stori blong wan man we i no oraet blong 38 yia.
Taem Jisas i luk hem i ledaon, mo i save se hem i bin olsem blong wan longfala taem, Hem i talem long man ia: “?Olsem wanem? ?Yu yu wantem blong yu kam gud bakegen?”
Man ia, i talem se hem i no gat wan i stap raon long hem blong helpem hem taem we hem i rili nidim.
“Nao Jisas i talem long hem se, Ale, yu stanap, yu tekem mat blong yu, yu wokbaot, yu go.’
“Nao wantaem nomo, man ya i kam gud bakegen, nao hem i tekem mat blong hem, i wokbaot, i go.”
Luk hamas yia nao, man ia i bin safa hemwan—38 yia—mo wantaem nomo hiling i kam taem we Sevya i kam help. Hiling ia i hapen “wantaem nomo.”
Long wan nara taem, wan woman we i gat sik blong blad blong 12 yia, we i spendem laef blong hem wetem ol dokta, i kam biaen long hem, mo i tajem daon long kaliko blong Sevya; mo wantaem nomo sik blong hem i stop.
“Nao Jisas i askem se ‘?ei, hu i tajem mi? from we mi mi haremsave se paoa blong mi i aot long mi i wokem wan samting.’
“Nao taem woman ya i luk we hem i no save haed, hem i kam … i talemaot we taem hem i tajem hem, wantaem nomo sik blong hem i finis.”
Truaot long seves blong Hem, Kraes i tijim se Hem i gat paoa ova long bodi blong man. Yumi no save kontrolem taem we hiling blong Kraes we i kam long bodi blong yumi. Hiling i kam folem tingting mo waes blong Hem. Long ol skripja, sam oli safa blong plante yia; sam narawan oli safa ful laef blong olgeta. Ol samting long bodi we oli blokem yumi long laef ia, oli save mekem yumi kam gud moa, mo yumi dipen moa long God. Taem yumi letem Kraes i kam insaed, oltaem, bambae i mekem yumi kam strong moa, blong yumi gat moa paoa blong stap strong tru long ol hevi taem blong yumi.
Long en, yumi save se evri samting we i mekem bodi blong yumi, sik, mo samting we i no stret, bae Hem i hilim taem yumi laef bakegen long ded. Hemia i wan presen i go long evri kaen man tru long Atonmen blong Jisas Kraes.
Jisas Kraes i save hilim moa bitim bodi blong yumi. Hem i save hilim spirit blong yumi tu. Truaot long ol skripja, yumi lanem hao Kraes i bin helpem olgeta we spirit blong olgeta i wik mo i mekem olgeta oli kam gud bakegen. Taem yumi stap tingting hevi long ol eksperiens ia, hop mo fet blong yumi long paoa blong Sevya blong hilim laef blong yumi, i kam antap. Jisas Kraes, i save jenisim hat blong yumi, i hilim yumi long risal blong fasin blong no gat jastis, o abius we yumi gotru, mo i mekem strong paoa blong yumi blong save tekem samting taem yumi lusum wan, o hat i soa, i givim pis blong helpem yumi stap strong tru ol tes blong laef blong yumi, mo i hilim ol filing blong yumi.
Kraes i save hilim yumi taem yumi sin. Yumi sin taem yumi save se yumi brekem wan loa blong God. Taem yumi sin, sol blong yumi i nomo klin. I no gat samting we i no klin we i save stap wetem God. “Blong kam klin long sin, hem i blong kam oraet long saed blong spirit.”
God Papa i save se bae yumi sin, be Hem i rere wan rod blong yumi blong Hem i pemaot yumi. Elda Lynn G. Robbins i tijim: “Fasin blong sakem sin i no wan seken plan blong God sapos yumi foldaon. Fasin blong sakem sin, i plan ia nao blong Hem, from Hem i save se bae yumi foldaon.” Taem yumi sin, yumi gat janis blong jusum gud aot long nogud. Yumi jusum gud taem yumi sakem sin afta we yumi mekem sin. Tru long Jisas Kraes mo sakrifaes blong Hem we i pemaot man, Hem i pemaot yumi long ol sin blong yumi, mo i tekem yumi gobak stap wetem God Papa sapos yumi sakem sin. Hiling blong spirit i no wan saed nomo—i nidim paoa blong Sevya blong pemaot man, mo tru fasin blong sakem sin aot long hem we i mekem sin. Long olgeta we oli jusum blong no sakem sin, oli stap sakemaot hiling blong Kraes. Long olgeta, i olsem we i no gat man i pemaot olgeta.
Taem mi bin stap kaonsel wetem ol narawan we oli wantem sakem sin, mi luk se ol pipol we oli stap laef wetem sin, oli faenem i had blong mekem ol stret desisen. Tabu Spirit bae i aot long olgeta, mo plante taem, oli traehad blong mekem ol joes we i tekem olgeta i go kolosap moa long God. Bae oli faet blong plante manis, o iven ol yia, oli sem o fraet long wanem i kam afta long sin blong olgeta. Plante taem, oli filim se bae oli no save jenis o kasem fogivnes. Plante taem, mi harem oli serem se oli fraet se olgeta we oli lavem bae oli save wanem oli bin mekem, nao bae oli stop blong lavem olgeta mo bae oli lego olgeta. Taem oli folem kaen tingting olsem, oli disaed nao blong stap kwaet mo pusumbak taem blong sakem sin. Oli gat rong tingting mo filim se i moa gud blong no sakem sin naoia, blong oli no mekem nogud long olgeta we oli lavem. Long maen blong olgeta, i moa gud blong safa afta long laef ia bitim blong save sakem sin naoia. Ol brata mo sista. Hem i neva wan gud tingting blong pusumbak taem blong sakem sin. Enemi, plante taem i yusum ol fraet blong yumi blong stopem yumi blong mekem kwik samting wetem fet long Jisas Kraes.
Taem olgeta we yumi lavem oli fesem tru samting abaot wan sin blong yumi, maet bae oli harem i soa bigwan, plante taem, oli wantem helpem, wetem tru tingting, hem ia we i sin blong i jenis mo i stretem hem wetem God. I tru, hiling long spirit i hariap moa taem hem we i mekem sin i konfes, mo i stap raon long olgeta we oli lavem hem, mo helpem hem blong lego sin fogud. Plis tingbaot se Jisas Kraes i hae tumas long wei we Hem i hilim tu olgeta we oli viktim blong sin, we oli lukluk long Hem.
Presiden Boyd. K. Packer i talem: “Spirit blong yumi i karem kil taem yumi mekem ol mistek mo mekem sin. Be i no olsem bodi blong yumi long laef ia, taem fasin blong sakem sin i finis, i no gat mak i stap from Atonmen blong Jisas Kraes. Promes i we: “man we i bin sakem ol sin blong hem, mi fogivim hem, mo mi, Lod, mi nomo tingbaot ol sin ia bakegen.’ [Doktrin mo Ol Kavenan 58:42].”
Taem yumi sakem sin ‘wetem ful tingting long hat” “wantaem nomo bambae bigfala plan blong pemaot man bae i hapen” long laef blong yumi. Sevya bae i mekem yumi kam gud bakegen.
Misinari kompanion mo ol helt wokman we oli bin help boe we i kasem strok long misin, oli tekem aksen kwiktaem. Boe blong mitufala i jusum blong tekem meresin ia we bae i stopem strok. Ol samting blong strok we bae i mekem hem i save paralaes blong ful laef blong hem, i stop. Semmak, moa yumi kwik blong sakem sin mo tekem Atonmen blong Jisas Kraes insaed long laef blong yumi, moa hariap bae yumi hil long ol nogud risal blong sin.
Presiden Russel M. Nelson i givim invitesen ia: “Sapos yu kamaot long rod, … Mi stap invaetem yu, … plis, kambak. Nomata wanem wari blong yu, nomata wanem jalenj blong yu, i gat wan ples blong yu insaed long ples ia, insaed long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia blong kambak long rod ia blong kavenan.”
Blong spirit i hil, i nidim blong yumi folem ol kondisen we Sevya i putum i stap. !Yumi no mas wet i go moa! !Yumi mas mekem samting tedei! Mekem naoia blong spirit blong yu i no paralaes mekem se bae yu no progres i go long taem we i no save finis. Taem mi bin stap toktok ia, sapos yu bin filim nid blong askem fogivnes long wan we yu mekem rong long hem, mi invaetem yu blong mekem folem filing ia. Talem olgeta wanem yu bin mekem. Askem fogivnes long olgeta. Sapos yu mekem wan sin we i mekem yu no save go long tempol, mi invaetem yu blong go kaonsel wetem bisop blong yu—tedei. Yu no wet i go moa.
Ol brata mo sista blong mi. God i Stap long Heven we I Gat Lav. Hem i givim evri paoa mo save blong Hem i go long Pikinini blong Hem we Hem i lavem tumas, Jisas Kraes. From Hem, evri kaen man, wan dei, bae oli kam oraet long wanem i no stret long bodi blong olgeta. From Atonmen blong Jisas Kraes, sapos yumi jusum blong sakem sin mo tanem hat fulwan i go long Sevya, bambae Hem i hilim spirit blong yumi. Hiling ia i save stat wantaem naoia. !Joes i blong yumi!?Bae yumi, yumi wantem blong kam gud bakegen?”
Mi testifae se Jisas Kraes i bin pem praes ia blong yumi save kam gud bakegen. Be yumi mas jusum blong tekem meresin ia we bae i hilim yumi, we Hem nao i givim. Tekem meresin ia tedei. Yu no wet i go moa. Long nem blong Jisas Kraes, amen.