Evriwan i Mas Tekem long Olgeta Nem we i Kam long Papa
Nem blong Sevya i wan nem ia nomo we i gat olgeta paoa. Hem i nem ia nomo we i mekem fasin blong sevem man i save kamtru.
Samfala wik i pas, Mi bin tekem pat long baptaes blong samfala pikinini we i gat eit yia. Oli bin stat blong lanem abaot gospel blong Jisas Kraes tru long ol papa, mama mo ol tija blong olgeta. Fet blong olgeta long Hem we i olsem wan smol sid i stat blong gro. Mo naoia oli wantem blong folem Hem i go insaed long wota blong baptaes blong kam memba blong Jos blong Hem we i bin kambak. Taem mi stap lukluk bigfala glad ia long olgeta, mi stap tingting long hamas nao oli andastanem abaot wan long ol impoten saed blong kavenan we oli mekem long baptaes blong olgeta: we i blong tekem long olgeta wan nem blong Jisas Kraes.
Long stat, God i bin talemaot abaot nem blong Jisas Kraes we i tabu long plan blong Hem from yumi. Wan enjel i bin tijim fasfala papa blong yumi, Adam, “Bambae yu mas mekem evri samting we yu stap mekem long nem blong Pikinini, mo yu mas sakem sin mo singaotem God long nem blong Pikinini gogo kasem taem we i no save finis.”
King Benjamin we i wan profet King long Buk blong Momon i tijim ol pipol blong hem se, “Bambae i nomo gat eni narafala nem o eni narafala wei we fasin blong sevem man i save kam.”
Lod i bin talem bakegen trutok ia long profet blong Hem Josef Smit: “Luk, Jisas Kraes i nem we Papa i givim, mo i no gat wan narafala nem, we tru long hem, bae i sevem man.”
Long dei blong yumi tedei, Presiden Dalin H. Oaks i bin tijim se “olgeta we i praktisim fet long tabu nem blong Jisas Kraes mo go insaed long kavenan … Bae i save singaotem mo kasem ol blesing blong atonmen blong Jisas Kraes.”
Papa blong yumi long Heven i wantem blong mekem i klia gud se nem blong Pikinini blong Hem, Jisas Kraes, i no wan nem ia nomo long medel blong plante nem. Nem blong Sevya i wan nem ia nomo we i gat olgeta paoa. Hem i nem ia nomo we i mekem fasin blong sevem man i save kamtru. Tru long plante strongfala poen long trutok ia long taem blong yumi tedei, Papa blong yumi we i lavem yumi tumas i givim hop long evri pikinini blong Hem se i gat wan wei blong gobak long Hem. Blong gat wan stret wei we i stap i no minim se bae yumi gat hop se rod blong yumi blong gobak bae i otomatik nomo. God i talem long yumi se yumi nidim aksen: “Taswe, evri man i mas tekem long hem nem ia we Papa i bin givim.”
Blong yumi save kasem paoa we i save sevem man we i save kam nomo tru long nem blong Jisas Kraes, yumi mas “putum tingting blong yumi i stap daon long fored blong God … mo kam long Hem wetem wan hat we i fulap wetem sore mo wan spirit we i wantem blong sakem sin … mo wantem blong tekem long yumiwan nem blong Jisas Kraes” mo save kwalifaem yumi olsem ol yangfala eit yia fren blong mi, “blong kasem baptaes insaed long jos.”
Evriwan we i gat wan sofsof hat mo strong tingting blong tekem long olgetawan nem blong Sevya oli mas kwalifae blong kasem odinens ia blong baptaes olsem wan witnes long saed blong bodi i go long God from joes blong olgeta. Be baptaes hem i olsem stat nomo.
Toktok ia tekem hem i no wan toktok we i stap i no gat mining. Hem i wan aksen toktok wetem plante mining long hem. Semmak, komitmen blong yumi blong tekem long yumiwan nem blong Jisas Kraes i nid blong gat aksen mo i gat plante saed blong lukluk long hem.
Long sem fasin, wan mining blong toktok ia tekem hem i blong tekem wan pat, o blong tekem i go insaed long bodi, olsem taem we yumi tekem wan dring. Taem yumi tekem long yumiwan nem blong Kraes, yumi komitim yumi blong tekem olgeta tijing blong Hem, ol fasin blong Hem, mo lav blong Hem, blong i kam dip insaed long yumi blong mekem se ol ol samting ia i kam pat blong laef blong yumi Taswe, impoten samting long invitesen blong Presiden Nelson long ol yang adalt we i blong “prea mo lukaotem blong andastanem wanem nao wanwan long ol taetel mo nem blong Sevya i minim long olgetawan,” mo kakae gud long ol toktok blong Kraes long ol skripja, speseli long Buk blong Momon.
Wan narafala mining blong toktok ia, tekem, i blong akseptem wan man long wan spesel wok o blong akseptem wan aedia o wan prinsipol. Taem yumi tekem long yumiwan nem blong Kraes, yumi akseptem Hem olsem Sevya mo gogohed blong akseptem ol tijing blong Hem olsem laet blong rod blong yumi. Long evri joes we yumi mekem we i gat mining, yumi save tekem gospel blong Hem se i tru mo stap obei mo laef folem wetem ful hat, wetem strong, maen mo paoa blong yumi.
Toktok ia tekem i save minim olsem blong putum yuwan stret gud wetem wan nem o wan wok. Plante long yumi oli bin gat eksperiens long saed blong tekem sam responsabiliti long wok o tekem wan wok o muvmen. Taem yumi tekem long yumiwan nem blong Kraes, yumi tekem long yumiwan ol responsabiliti blong wan tru disaepol, yumi stanap long bihaf blong Hem mo mekem wok blong Hem, mo yumi “stanap olsem ol witnes blong [Hem] long evri taem mo long evri samting, mo long evri ples we bae [yumi] save stap long hem.” Presiden Nelson i bin singaotem “evri yang woman mo evri yang man … blong oli joenem bigfala grup blong ami blong yut blong Lod blong helpem wok blong karem Israel i kam tugeta.” Mo yumi evriwan i glad blong tekemap bigfala singaot blong profet ia blong yusum nem blong Jos blong Hem we i bin kambak olsem we Sevya Hemwan i soemaot: Jos blong Jisas Kraes blong Ol Lata-dei Sent.
Long wei blong tekem long yumiwan nem Sevya, yumi mas andastanem se wok blong Kraes mo Jos blong Hem i wan mo sem samting nomo. Oli no save seperetem. Semmak, fasin blong yumiwan blong stap ol disaepol blong Sevya mo stap wan aktiv memba insaed long Jos blong Hem tu, tufala i no save seperet. Sapos yumi foldaon long komitmen blong yumi long wan, bambae komitmen blong yumi long narawan bae i kam daon tu, semmak olsem we naet i folem dei.
Samfala man oli no wantem blong bilif long nem blong Jisas Kraes mo wok blong Hem from we oli lukim se hem i wan smol samting, i gat limit, mo hem i wan samting we i stap long wan ples nomo. Tru samting se, blong tekem long yumiwan nem blong Kraes hem i tugeta, i gat fridom mo gat bigfala tingting. Hem i wekemap strong filing ia we yumi filim taem yumi akseptem plan blong God tru long fet blong yumi long Sevya. Wetem strong filing ia we i stap laef insaed long hat blong yumi, yumi save luksave ol rili stamba tingting blong ol spesel presen mo talen, mo eksperiensem paoa blong lav blong Hem, mo tingting blong yumi tu bae i gro from gudlaef blong ol narafala man. Taem yumi tekem long yumiwan nem blong Sevya, yumi stap tru blong kasem evri gud samting moa kam olsem Hem.
Hem i impoten blong tingbaot se blong tekem nem blong Sevya long yumiwan i wan kavenan komitmen—stat wetem kavenan we yumi mekem long taem blong baptaes. Presiden Nelson i tijim, “Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap.” Wan long ol bigfala janis blong tekem long yumiwan nem blong Sevya tru long baptaes hem i we hem i givim yumi rod blong kasem nekis odinens long kavenan rod ia we i konfemesen blong yumi. Taem mi askem wan yangfala fren blong mi we i gat eit yia wanem nao i minim blong tekem long hem nem blong Kraes, hem i talem se, “I minim se mi save kasem Tabu Spirit.” !Hem i raet!
Presen ia we i Tabu Spirit, yumi kasem tru long konfemesen afta we yumi kasem odinens blong baptaes. Presen ia hem i wan raet mo janis blong gat Tabu Spirit olsem kompanion blong yu oltaem. Sapos yumi stap lisin mo obei long smol kwaet voes ia blong Hem, Hem bae i kipim yumi stret long rod blong kavenan ia we yumi bin go tru long hem long taem blong baptaes, bae i wonem yumi taem we yumi stat blong foldaon, mo leftemap tingting blong yumi blong sakem sin mo tanem raon mo kambak sapos i nid. Stamba lukluk blong yumi afta long baptaes hem i blong gat Tabu Spirit i stap wetem yumi oltaem blong mekem se yumi save gohed blong progres long rod blong kavenan. Tabu Spirit i save stap wetem yumi nomo taem we yumi kipim laef blong yumi i stap klin mo fri long sin.
From samting ia, Lod i bin givim long yumi wan wei blong gohed blong luklukbak klin laef blong yumi taem yumi baptaes long wan narafala odinens—we i sakramen. Evri wik yumi save “witnes … se yumi rere gud blong tekem long [yumiwan] nem blong Pikinini” bakegen blong tekem simbol blong bodi mo blad blong Lod long han blong yumi—bred mo wota—mo tekem mo kakae bred o tekem mo dring wota ia i go insaed long sol blong yumi. Blesing we i kambak i we, Sevya i mekem merikel blong Hem blong mekem yumi klin mo i kwalifaem yumi blong gat Tabu Spirit i stap wetem yumi. ?Hemia i no pruf blong sore ia we i no gat en we i kam nomo long nem blong Jisas Kraes? Olsem we yumi tekem nem blong Hem long yumiwan, Hem i tekem ol sin mo harem nogud blong yumi long Hemwan, mo yet ol han blong Hem “i longfala yet” blong tekem yumi evriwan i kam tugeta long lav blong Hem.
Sakramen i rimaenem yumi evri wik se blong tekem long yumi nem blong Jisas Kraes hem i wan komitmen ia we i gohed, be i no wan samting we i hapen wan taem nomo long dei blong baptaes. Yumi save gohed mo stap glad long “tabu ofring ia, we man i no save andastanem gud, blong karemaot ol sin blong yumi mo tekem bodi mo blad blong Hem.” Hem i bin wan sapraes se taem we ol pikinini blong God i andastanem, bigfala paoa, mo ol blesing long saed blong spirit we i save kam taem we oli tekem long olgetawan nem blong Jisas Kraes, bae oltaem oli wantem blong gat glad, mo oltaem bae oli wantem tumas blong mekem kavenan wetem God blong olgeta.
Taem yumi folem tabu rod blong kavenan ia, komitmen mo ol traehad blong yumi blong tekem long yumiwan nem blong Jisas Kraes bae i givim yumi paoa “blong holemtaet gud nem blong Hem insaed long hat blong yumi.” Bae yumi lavem God mo ol neiba mo wan filing blong wantem blong givhan long olgeta. Bambae yumi kipim ol komanmen blong Hem mo wantem blong kam kolosap long Hem taem yumi mekem moa kavenan wetem Hem. Taem yumi faenem se yumi wik mo no save mekem tingting blong yumi , bae yumi krae from paoa ia we i save kam nomo tru long nem blong Hem mo bae Hem i kam blong helpem yumi. Taem yumi fetful blong stanap strong, bae dei ia i kam we bae yumi luk Hem mo stap wetem Hem, mo bae yumi faenem se yumi bin kam olsem Hem, taswe i mekem yumi kwalifae blong gobak stap wetem Papa .
From promes blong Sevya hem i tru oltaem: olgeta we “oli bilif long nem blong Jisas Kraes, mo wosipim Papa long nem blong Hem, mo stanap strong long fet long nem blong Hem kasem en.” bae Hem i save sevem olgeta long kingdom blong God. Wetem yufala, mi glad tumas se ol bigfala blesing ia oli posibol taem yumi tekem long yumi nem blong Jisas Kraes; abaot Hem mo long nem blong Hem, mi stap testifae, amen.