Olgeta Samting Bambae Oli Kam Joen long Kraes
Paoa blong gospel blong Sevya blong jenisim mo blesem yumi, i kam taem we yumi luksave mo stap praktisim wanem i joenem doktrin, prinsipol mo praktis, long laef blong yumi.
Wan rop i wan tul we yumi evriwan i save gud long hem. Ol rop, oli mekem wetem ol smol pis kaliko, plant, waea, o ol nara samting, we oli twistim o oli tantanem tugeta. I gud blong luk se, ol samting we oli olbaot nomo, oli save wivim tugeta mo bae i kam strong tumas. From hemia, taem oli joenem mo fasem gud ol samting olbaot, i save givim wan gudfala tul blong yusum.
Olsem we wan rop i karem paoa blong hem aot long ol wanwan pis samting we oli wivim tugeta, i semmak wetem gospel blong Jisas Kraes from hem i givim bigfala lukluk abaot trutok mo i givim ol rij blesing taem yumi stap mekem folem wan Pol i askem strong, we i blong “olgeta samting long heven mo long wol bambae oli kam joen long Kraes, we hem i olsem hed blong olgeta samting.” Wanem i impoten, i we evri trutok ia we oli kam joen tugeta, oli stanap mo oli lukluk nomo long Lod Jisas Kraes, from se Hem nao i “rod ya, mo … i stamba blong trutok, mo [i] stamba blong laef.”
Mi prea se Tabu Spirit bae i givim laet long wanwan long yumi taem yumi stap tingting long, hao nao, prinsipol blong olgeta samting bambae oli kam joen long Kraes, bae i kamtru long praktis blong stap lanem mo stap laef folem gospel we i kambak long evri dei laef blong yumi.
Wan Taem blong Revelesen
Yumi stap laef long wan taem we i gud tumas, wan taem blong revelesen long Jos we i kambak blong Jisas Kraes. Ol histri anaonsmen blong stretem ol samting tedei, oli gat bigfala stamba tingting we i kavremap olgeta: blong mekem fet long Papa long Heven mo plan blong Hem, mo fet long Pikinini blong Hem, Jisas Kraes, mo Atonmen blong Hem, i kam strong moa. Sandei miting taemtebol ia, oli no jes mekem i sot nomo. Be, naoia yumi gat moa janis mo responsabiliti olsem wanwan man, woman mo famli blong yufala gud taem blong yumi blong mekem Sabat i kam moa olsem wan glad, long hom mo long jos.
Las Epril, oganaesesen blong ol kworom blong prishud, oli no jenisim nating nomo. Be, oli tokbaot bigwan mo givim moa paoa long wan wei we i moa hae mo tabu blong stap givhan long ol brata mo sista blong yumi.
Semmak olsem ol smosmol string blong wan rop i save givim wan tul we i gat paoa mo i stap longtaem, evri aksen ia we oli joen, oli pat blong wan joen wok blong mekem se yumi stretem lukluk, risos mo wok blong Jos we i kambak blong Sevya, i gobak long stamba misin blong hem: blong helpem God long wok blong Hem blong mekem se Kraes i sevem ol pikinini blong God mo blong oli kam olsem ol god. Plis, no lukluk faswan long hao nao bae yumi mekem olgeta samting we oli bin anaonsem. Yumi no mas letem ol rod blong wokem samting oli kam blokem bigfala risen long saed blong spirit we i mekem se ol jenis ia oli hapen.
Wanem yumi wantem, i we fet long plan blong Papa mo long misin blong Sevya blong pemaot man i save kam antap long wol ia, mo blong kavenan we i no gat en blong God i save stanap. Stamba tingting blong yumi i blong yumi gohed blong mekem we man i jenisim laef i kam long Lod, mo blong lavem moa fulwan, mo wok gud moa blong ol brata mo sista blong yumi.
Mekem Ol Grup mo Seperetem
Samtaem, olsem ol memba blong Jos, yumi mekem ol smol grup, yumi seperetem, mo yusum gospel long laef blong yumi taem yumi mekem ol longfala jeklis folem wanwan topik blong stadi long ol mo folem ol smol wok blong mekem. Be kaen fasin ia i save blokem smol andastaning mo visen blong yumi. Yumi mas lukaotgud from se blong lukluk long ol jeklis ia olsem ol Farisi i save mekem se i tekemaot tingting blong yumi blong kam kolosap long Lod.
Stamba tingting mo fasin blong kam klin evriwan, hapines mo glad, mo fasin blong gogohed blong jenisim laef, mo proteksen we i kam from se yumi “givim hat blong [yumi] long God” mo “kasem pikja blong fes blong hem long fes blong [yumi],” yumi no save kasem taem yumi mekem mo tikim evri samting long saed blong spirit we yumi sapos blong mekem. Be, paoa blong gospel blong Sevya blong jenisim mo blesem yumi, i kam taem we yumi luksave mo stap praktisim wanem i joenem doktrin, prinsipol mo praktis, long laef blong yumi. Taem yumi mekem olgeta samting oli kam joen long Kraes, wetem wan strong lukluk we i stap long Hem nomo, bae oli trutok blong gospel oli joen wan blong mekem se yumi save kam wanem we God i wantem yumi blong kam mo yumi save stap strong kasem en wetem strong paoa.
Stap Lanem mo Joenem Ol Trutok blong Gospel
Gospel blong Jisas Kraes i wan bigfala naes mat blong trutok we “oli putum stret frem raon long hem” mo oli wivim tugeta. Taem yumi stap lan mo joenem tugeta ol trutok blong gospel we Lod i soemaot, yumi gat blesing blong save lukluk longwe moa, mo kam antap moa long paoa long spirit tru long ol ae we oli save paoa blong Lod insaed long laef blong yumi mo tru long ol sora we i save harem voes blong Hem. Mo prinsipol ia we, olgeta samting oli kam joen—long Kraes, i save helpem yumi blong jenisim ol nomol jeklis, oli kam wan we i joen wan, i gat evri samting insaed mo i fulwan. Bae mi givim wan doktrin mo jos eksampol blong wanem mi stap tokbaot.
Eksampol namba 1. Nambafo toktok blong bilif i soemaot gud fasin we olgeta samting oli kam joen long Kraes: “Mifala i biliv we ol fas prinsipol mo odinens blong Gospel oli: nambawan, Fet long Lod Jisas Kraes; nambatu, Fasin blong Sakem Sin; nambatri, Kasem Baptaes andanit long wota blong kam klin aot long ol sin; nambafo, Putum han antap long hed blong man blong kasem presen we i Tabu Spirit.”
Tru fet i lukluk nomo insaed long mo long Lod Jisas Kraes—tru fet long Hem olsem Hae mo Wan Stret Pikinini Ia Nomo blong Papa mo long Hem mo misin blong pemaot man we Hem i bin kam mekem. “From hem i bin mekem wanem we loa i askem, mo hem i wantem olgeta evriwan we oli gat fet long hem; mo olgeta we oli gat fet long hem, bae oli hang long evri gudfala samting; taswe, hem i toktok from stamba tingting blong ol pikinini blong ol man; mo hem i stap blong taem we i no save finis long ol heven” Blong stap praktisim fet long Kraes, hem i blong trastem mo putum tras blong yumi long Hem olsem Sevya blong yumi, long nem blong Hem mo long ol promes blong Hem.
Fas risal mo wanem i kamaot oltaem taem yumi trastem Sevya i we yumi stap sakem sin, mo yumi tanem baksaed blong yumi long devel. Taem yumi stap praktisim fet long Lod, bae i mekem se yumi gobak long Hem, mo stap dipen long Hem. Olsem ia nao, fasin blong sakem sin hem i blong stap trastem mo stap dipen long Ridima blong mekem blong yumi wanem we yumi no save mekem blong yumiwan bakegen. Wanwan long yumi i mas “[hang] fulwan long ol gud wok blong hem, we i gat olgeta paoa blong sevem man” from se i “tru long ol gudfala wok, mo sore, mo gladhat blong Tabu Mesaea” we bae yumi save kam ol niu man mo woman long Kraes, mo long en, yumi gobak mo stap wetem God.
Odinens blong baptaes andanit long wota blong kam klin aot long ol sin i askem yumi blong trastem Hem, mo hang long Hem, mo folem Hem. Nifae i talem: “Mi save se sapos yufala i folem Pikinini, wetem evri tingting blong hat, mo no mekem fasin blong gat tufes mo no giaman long fored blong God, be wetem tru tingting, yufala i sakem ol sin blong yufala, mo soem long Papa se yufala i glad blong tekem long yufala nem blong Kraes, tru long baptaes—yes, taem we yufala i folem Lod mo Sevya blong yufala i go daon long wota, folem toktok blong hem, luk, afta nao bae yufala i kasem Tabu Spirit; yes, afta nao baptaes blong faea mo blong Tabu Spirit i kam; mo afta nao bae yufala i save toktok wetem ol lanwis blong ol enjel mo singaot ol pres i go long Tabu Wan blong Isrel.”
Odinens blong putum han antap long hed blong givim presen we i Tabu Spirit i askem yumi blong trastem Hem, hang long Hem, folem Hem mo go fored wetem Hem mo wetem help blong Tabu Spirit blong Hem. Olsem we Nifae i bin talem: “Mo nao, … mi save tru long samting ia se sapos wan man i no stap strong kasem en blong folem eksampol blong Pikinini blong God ia we i stap laef, bae Lod i no save sevem hem.”
Nambafo toktok blong bilif i no soemaot nomo ol stamba prinsipol mo odinens blong gospel we i kambak. Be, toktok ia blong ol bilif, i joenem tugeta evri samting i kam long Kraes: trastem Hem, hang long Hem, folem Hem, mo go fored wetem Hem—mo iven go long Hem.
Eksampol namba 2. Naoia, mi wantem tokbaot olsem wanem evri program blong Jos mo niu fasin blong wok oli joen tugeta, oli wan long Kraes. Yumi save soem plante eksampol; bae mi yusum sam nomo.
Long 1978, Presiden Spencer W. Kimball i bin talem long ol memba blong Jos blong bildimap paoa blong Saeon raon long wol. Hem i bin givim kaonsel long olgeta Sent blong stap long homples blong olgeta mo stanemap ol strong stek taem oli joenem tugeta famli blong God mo tijim olgeta ol wei blong Lod. Antap long hemia, hem i talem se bae oli bildim moa tempol, mo i bin promesem ol blesing blong ol Sent, long weaples bae oli stap laef long hem long wol ia.
Taem namba blong ol stek i stap kam antap, i bin gat nid i kam antap blong hom blong ol memba oli kam “ol ples we ol memba blong famli oli lavem blong stap long hem, oli ol ples we oli save mekem laef blong olgeta i kam rij, mo oli faenem lav, sapot, oli save glad long wanem wan i mekem mo oli leftemap tingting blong olgeta.” Folem hemia, long 1980, ol miting long Sandei oli joenem olgeta long 3 aoa we i folfolem olgeta blong “tokbaot bigwan responsabiliti blong wanwan mo blong famli blong stap lanem, stap laef folem mo stap tijim gospel.” Blong tokbaot bigwan famli mo hom bakegen, “Famli: Wan Ofisol Toktok I Go long Wol” i kamaot mo Presiden Hinckley nao i presentem long 1995.
Long Epril 1998, Presiden Hinckley i bin anaonsem se bae oli bildimap plante moa smol tempol, mo long wei ia, oli tekem ol tabu odinens blong haos blong Lod i go kolosap moa long wanwan Lata-dei Sent pipol mo famli raon long wol. Mo antap long olgeta moa gud janis ia blong gro long saed blong spirit mo kam antap, fasin blong dipen long yuwan long laef ia i kam joenem taem oli statem Pepetuol Edukesen Fand long 2001.
Long taem blong hem, Presiden Thomas S. Monson i ripitim mo askem ol Sent blong “go sevem man” mo tokbaot bigwan fasin blong kea long olgeta we oli pua mo olgeta long nid, from hem i wan tabu responsabiliti blong Jos. Blong gohed blong tokbaot fasin blong stap rere long laef ia, oli statem Indipenden Laef Seves long 2012.
Ova long ol pas yia, stamba prinsipol ia blong mekem Sabat dei i wan glad insaed long hom mo long Jos, oli bin tokbaot bigwan mo mekem i kam strong moa; hemia i mekem se yumi rere blong Sandei miting taemtebol we oli bin anaonsem long sesen ia blong jeneral konfrens.
Mo sikis manis i pas, ol kworom blong Melkesedek Prishud, oli mekem i kam strong moa mo oli stretem blong oli wok moa gud wetem ol okseleri blong oli mekem wok blong givhan long wan moa hae mo tabu wei.
Mi biliv se evri smol aksen ia mo taem blong ol aksen ia ova long plante yia i save helpem yumi blong luk se i gat wan yunaet wok we i fulwan, mo i no jes ol smol seperet wok blong mekem blong sot taem. “God i soemaot wan paten blong progres long saed blong spirit, blong wanwan man, woman mo famli tru long ol odinens, ol tijing, ol program mo ol aktiviti we oli lukluk moa long hom senta we Jos i givim sapot long hem. Ol Jos oganaesesen mo program oli stap ia blong blesem wanwan man, woman mo famli, mo oli no stap blong gud blong olgetawan nomo.”
Mi prea se bae yumi luksave wok blong Lod olsem wan bigfala wol wok, we moa i go, moa bae i lukluk long hom mo Jos i sapotem. Mi save mo testifae se Lod i stap soemaot mo “bambae i soemaot yet plante bigfala mo impoten samting abaot kingdom blong God.”
Promes mo Testemoni
Mi statem mesej blong mi mo tokbaot bigwan paoa we i kamaot long ol wanwan string blong samting we oli stap twistim o wivim tugeta blong i kam wan rop. Long semmak wei, mi promes se bae lukluk blong yumi, stamba tingting mo paoa bae i kam klia moa taem yumi stap lan mo stap laef folem gospel we i kambak mo taem yumi stap traehad blong mekem olgeta samting oli joen long Kraes.
Evri janis mo blesing we risal blong hem i stap blong taem we i no save finis, oli stat wetem, mo oli posibol mo gat stamba tingting from, mo oli stap stap tru long Lod Jisas Kraes. Olsem we Alma i testifae: “I o gat narafala rod o wei we bae God i sevem man, be nomo, long mo tru long Kraes. “Luk, hem i laef mo laet blong wol.”
“Mi talemaot wetem glad, se mi mi witnes Tufala i tabu mo i tru se Tufala i stap laef, hemia Papa we I No Save Finis mo Pikinini blong Hem we Hem i Lavem, Jisas Kraes. Long Sevya blong yumi, yumi faenem glad. Mo long Hem, yumi faenem se i tru, bae i gat “pis long wol ia, mo laef we i no save finis long wol we bae i kam.” Mi testifae olsem long tabu nem blong Lod Jisas Kraes, amen.