Wan Jenis long Laef we I Tru mo I Stap I Go long Papa long Heven mo Lod Jisas Kraes
Stamba tingting blong mifala i blong balensem eksperiens long Jos mo long hom long wan wei we bae i mekem fet i kam antap , spirit fasin i kam antap, mo i gat moa bigfala jenis long laef i go long Papa long Heven mo Lod Jisas Kraes.
Olsem we Presiden Russel M. Nelson i jes talem long wan naes mo gudfala wei, ol lida blong Jos oli bin wok blong wan longfala taem finis long wan hom senta mo Jos sapot plan blong lanem doktrin, blong mekem fet i kam strong moa, mo mekem wanwan i gat moa wosip fasin.” Long moning ia, mifala i stap anaonsem wan niu jenis blong “balensem gospel tijing insaed long hom, mo insaed long Jos.”
Blong ol stamba tingting ia oli hapen—olsem we Presiden Russel M. Nelson i tokbaot mo anda long daereksen blong hem, mo folem desisen blong Kaonsel blong Fas Presidensi mo Kworom blong Olgeta Twelef Aposol—bae oli stretem taemtebol blong Sandei miting i go olsem, stat long Jenuware 2019.
Taemtebol blong Sandei Miting
Ol Sandei Jos miting, naoia i go olsem: bae i gat wan 60 minit sakramen miting evri Sandei, we i lukluk long Sevya, odinens blong sakramen, mo ol mesej long saed blong spirit. Afta brek taem blong go long klas, bae ol memba blong Jos oli stap long wan 50 minit klas we bae i jenis evri Sandei.
-
Sandei Skul bae i tekples long evri fas mo nambatri Sandei blong manis.
-
Ol kworom blong prishud, Rilif Sosaeti, mo Yang Woman miting bae oli holem long evri nambatu mo nambafo Sandei.
-
Ol miting long nambafaef Sandei bae i tekples anda long daereksen blong bisop.
Praemeri, bambae oli holem evri wik long semfala 50 minit taem ia mo bae i gat taem blong singsing mo gat klas.
Long saed blong Sandei miting taemtebol, ol senia lida blong Jos oli bin save longtaem finis se, long sam long ol memba blong yumi, tri aoa Sandei taemtebol long jos, hem i had. Hemia i tru long ol papa mo mama wetem ol smol pikinini, ol Praemeri pikinini, ol olfala, ol niu konvet mo ol narawan.
Be i gat plante moa samting biaen long jenis ia bitim blong jes mekem Sandei mitinghaos taemtebol i kam sot. Presiden Nelson i bin luksave, wetem tangkyu, hamas yufala i stap mekem from yufala i bin stap fetful long ol invitesen blong fastaem. Hem, mo ful lidasip blong Jos, i wantem se i gat moa gospel glad long ol papa, mama, pikinini, yut, ol singgel, ol olfala, ol niu konvet, mo olgeta pipol ia we ol misinari oli stap tijim tru long wan balens wok we senta i stap long hom mo Jos i givim sapot. Insaed long ol stamba tingting mo blesing we oli joen wetem jenis ia mo ol nara las jenis, i gat:
-
Wan jenis long laef we i tru mo i stap, i go long Papa long Heven mo Lod Jisas Kraes, mo wan fet long Tufala we i kam strong moa.
-
Wok blong mekem wanwan man, woman mo famli oli kam strong moa tru long wan hom senta mo Jos sapot kurikulom we i helpem wan gospel laef we i gat glad long hem.
-
Stap ona long Sabat dei, wetem wan lukluk we i go nomo long odinens blong sakramen.
-
Stap helpem evriwan long ol pikinini blong Papa long Heven long tugeta saed blong vel tru long misinari wok, mo fasin blong kasem ol odinens mo ol kavenan mo ol blesing blong tempol.
Stap Lanem Gospel long Hom we i Senta, mo Jos i Sapotem
Sandei taemtebol ia bae i givim moa taem blong gat haos naet, mo blong stadi long gospel long hom long Sandei, mo long eni nara taem olsem we wanwan man, woman mo famli i jusum. Bae yufala i save holem wan famli aktiviti naet long Mandei, o long sam nara taem. From hemia, ol lida oli gohed blong kipim Mandei i fri, we i no mas gat ol miting mo aktiviti long Jos. Be, taem we oli stap spendem long haos naet, stadi long gospel mo ol aktiviti blong wanwan man, woman mo famli, bae oli save putum folem situesen blong wanwan long olgeta.
Famli mo wanwan gospel stadi long hom, bae i kam antap bigwan wetem wan kurikulom we i go wetem, mo wan niu risos, Kam Folem Mi we i go wetem wanem bae oli tijim long Sandei Skul mo Praemeri. Long Jenuware, Sandei Skul blong ol yut mo adalt blong Jos, mo ol klas blong Praemeri, bambae oli stadi long Niu Testeman. Niufala hom stadi risos, Kam Folem Mi blong wanwan man, woman mo famli, i lukluk tu long Niu Testeman—oli mekem blong i helpem ol memba blong lanem gospel insaed long hom. Buk i eksplenem: “Risos ia i blong wanwan man, woman mo famli insaed long Jos. Oli raetem blong helpem yumi lanem gospel i gud moa—yumiwan, o wetem famli blong yumi. … Ol aotlaen blong niufala risos ia, oli oganaesem folem wan taemtebol blong wik.”
Ol niufala Praemeri lesen blong Kam Folem Mi we oli stap tijim long Jos, bambae i folem sem wik taemtebol. Ol Sandei Skul klas blong ol adalt mo yut, long fas mo nambatri Sandei, bambae oli mekem se oli semmak blong oli kam sapotem niufala hom risos ia, Kam Folem Mi. Long seken mo nambafo Sandei, ol adalt long Prishud mo Rilif Sosaeti, bambae oli gohed blong stadi long ol tijing blong ol lida blong Jos, mo oli tokbaot bigwan nao ol las mesej blong ol profet blong tedei. Ol yang woman, mo ol yang man long Aronik Prishud, bambae oli stadi long ol gospel topik long ol Sandei ia.
Niufala hom stadi risos ia, insaed i gat “Sam Aedia blong Famli Skripja Stadi mo Famli Haos Naet.” Ol aotlaen blong wanwan wik oli gat insaed long gudfala stadi aedia mo aktiviti blong wanwan man, woman mo famli. Niufala risos, Kam Folem Mi blong wanwan man, woman mo famli gat fulap droing o pikja we bae i helpem bigwan wanwan man, woman mo famli blong lanem samting, speseli, ol pikinini. Niufala risos ia, bambae oli givim long wanwan haos long Disemba long yia ia.
Presiden Nelson, long fas toktok blong hem i go long ol memba blong Jos long Jenuware, i askem strong long yumi blong rere from Seken Kaming blong Jisas Kraes taem yumi stap wokbaot folem kavenan rod ia.
Olsem wanem wol i stap tedei, i mekem se yumi nidim plante blong jenisim laef blong yumi i bigwan moa, nao yumi mas tanem yumi long mo mekem fet blong yumi long Papa long Heven mo Jisas Kraes mo Atonmen blong Hem i bigwan moa. Lod i mekem yumi rere, tijing folem tijing, from ol denja taem we yumi stap fesem naoia. Long ol las yia i pas, Lod i bin lidim yumi blong luklukgud long ol stamba poen, we i gat insaed:
-
Stap ona long Sabat dei mo tabu odinens blong sakramen, mifala i bin tokbaot bigwan ova long ol las tri yia.
-
Anda long daereksen blong bisop, mekem ol kworom blong ol elda mo mekem ol Rilif Sosaeti oli lukluk nomo long stamba tingting blong Jos mo ol tabu responsabiliti blong hem mo stap helpem ol memba blong mekem mo kipim ol tabu kavenan.
-
Stap givhan long wan moa hae mo tabu wei, i wan samting we yumi glad blong mekem.
-
From yumi stat wetem en i stap long maen blong yumi, ol kavenan blong tempol mo famli histri seves oli kam wan stamba pat blong kavenan rod ia.
Jenis we oli bin anaonsem long moning ia, i wan nara eksampol bakegen, we God i stap lidim yumi from ol jalenj blong taem blong yumi.
Nomol kurikulom blong Jos i tokbaot bigwan Jos eksperiens long Sandei. Yumi save se, taem yumi gat moa gud tijing, mo moa memba blong klas we oli rere long spirit, nao yumi gat wan moa gud Jos eksperiens long Sandei. Yumi gat blesing ia, se plante taem, Spirit i mekem se i gat moa jenis mo i mekem yumi kam moa strong insaed long Jos.
Niufala kurikulom blong yusum long hom mo Jos i sapotem, i nidim blong lidim moa strong ol famli blong oli folem mo tekem aksen folem relijin, mo i lidim moa strong wanwan man mo woman blong folem mo tekem aksen folem relijin. Mifala i save hamas i save tajem spirit blong man mo jenis long laef we i tru mo i stap, we i save hapen insaed long hom. Sam yia i pas, wan stadi i faenem se blong ol yang man mo yang woman, Tabu Spirit i lisim tingting blong olgeta ia we oli stap mekem skripja stadi mo prea blong olgetawan insaed long hom. Stamba tingting blong mifala i blong balensem ol eksperiens long Jos mo long hom long wan wei we bae i mekem fet mo spirit fasin i kam antap, mo i gat moa bigfala jenis long laef i go long Papa long Heven mo Lod Jisas Kraes.
Insaed long jenis ia blong hom senta, Jos sapot, i gat wei blong wanwan man, woman mo famli i prea mo luk olsem wanem mo wetaem bae hem i statem jenis ia. Eksampol. Hemia bae i blesem bigwan evri famli; folem ol lokol nid bae i stret gud long olgeta yang singgel, ol singgel adalt, ol singgel papa o mama, ol pat-memba famli, ol niu memba, mo ol narawan blong oli kam tugeta aotsaed long nomol Sandei wosip seves blong gat gospel sosol taem, mo kam strong moa tugeta taem oli stadi tugeta long niu hom senta, Jos sapot risos. Hemia, olgeta we oli wantem olsem, bambae oli oganaesem hemia olgetawan.
Long plante pat long wol, ol pipol oli jusum blong stap long mitinghaos afta long nomol Sandei taemtebol blong stap storian tugeta long sosol rilesensip. I no gat eni samting long jenis we oli jes anaonsem we bae i blokem gudfala praktis ia we i givim gud taem.
Blong helpem ol memba blong rere from Sabat, sam wod oli stap sendem finis wan infomesen imel, teks, o sosol media mesej long medel blong wik. Wetem jenis ia, mifala i sapotem strong kaen komunikesen ia. Ol invitesen ia bae oli rimaenem ol memba long saed blong Sandei miting taemtebol long wik ia, wetem topik blong lesen blong klas we i stap kam antap, mo sapot gospel storian we i gogohed long hom. Antap long hemia, ol adalt miting long Sandei bae i givim infomesen blong joenem Jos mo hom stadi long evri wik.
Sakramen miting mo klas taem, bae i nidim fulap tingting mo prea blong meksua se ol fas wok long saed blong spirit oli kam fastaem ova long ol administresen wok. Eksampol. Ol anaonsmen, oli save mekem tru long medel wik invitesen o long wan program we oli printim. Sakramen miting, i mas gat wan fas mo las prea, be nambatu miting, i nid nomo blong i gat wan las prea.
Olsem we mifala i talem fastaem, niufala Sandei taemtebol ia, bae i stat nomo long Jenuware 2019. I gat plante risen from hemia. Tufala bigfala impoten risen, hem i, blong gat taem blong serem niufala buk, Kam Folem Mi blong wanwan man, woman, mo famli, mo sekenwan, i blong givim taem long ol stek presiden mo ol bisop blong stretem ol miting taemtebol wetem gol ia blong gat moa wod oli mit eli long deitaem.
Taem we oli lida oli bin lukaot blong kasem revelesen, toktok we oli kasem ova long ol yia we i pas, i blong mekem sakramen miting i kam antap, ona long Sabat dei, mo leftemap tingting mo helpem ol papa mo mama mo wanwan man mo woman blong mekem hom blong olgeta i kam wan ples blong paoa long spirit mo fet we i kam antap—wan ples blong stap filim glad mo stap hapi.
Ol Bigbigfala Blesing
?Ol jenis ia oli minim wanem long ol memba blong Jos blong Jisas Kraes blong Ol Lata-dei Sent? Mifala i trastem we God bae i blesem ol memba long ol bigfala wei. Sandei bae i wan dei blong lanem mo tijim gospel long jos mo long hom. Taem we wanwan man, woman mo famli oli stap mekem ol famli kaonsel, famli histri, wok blong givhan, seves, wosip blong wanwan, mo gat gudfala famli taem, bae Sabat dei we i rili wan glad.
Wan famli long Brasil, oli memba blong wan stek we oli bin testem niufala hom risos, Kam Folem Mi. Papa, Fernando, wan riten misinari mo waef blong hem, Nansi, tufala i papa mo mama blong fo yang pikinini, oli ripotem se: “Taem we Kam Folem Mi program i stat insaed long stek blong mifala, mi mi glad tumas, mo mi tingting se ‘wei we yumi stap stadi ol skripja long hom bambae i jenis.’ I rili hapen insaed long hom blong mi, mo, olsem wan lida blong Jos, mi luk se i bin hapen tu long ol narafala hom. … Hem i helpem mifala blong rili toktok raon long ol skripja long hom blong mifala. Waef blong mi mo mi i gat moa dip andastaning abaot topik mifala i stadi long hem. I helpem mifala … blong mekem gospel save blong mitufala i kam bigwan, mo leftemap fet mo testemoni blong mitufala. … Mi talem testemoni blong mi … se mi save se hemia i wan insperesen we i kam long Lod, blong mekem se stadi we i hapen oltaem mo i wok gud moa, abaot ol prinsipol mo doktrin we oli stap long ol skripja, oli tekem moa fet, testemoni mo laet i go long ol famli … long wan wol we i stap gohed blong foldaon.”
Long ol paelot stek we oli testem hemia raon long wol, i gat gudfala toktok mo tingting i kam long saed blong niu hom risos ia, Kam Folem Mi. Plante oli ripotem se oli progres, oli bin stap ridim ol skripja mo naoia oli stap stadi long ol skripja. Evriwan i filim se eksperiens ia i promotem fet mo i mekem bigfala jenis insaed long wod.
Jenis long Laef we I Tru mo I Stap
Gol blong ol jenis ia i blong gat wan jenis long laef we i dip mo i stap, long ol adalt mo jeneresen we i stap kam antap. Fas pej blong risos blong wanwan man, woman mo famli i talem: “Stamba blong lanem mo tijim gospel i blong mekem dip jenis long laef mo helpem yumi kam moa olsem Jisas Kraes. … Hemia i minim blong stap dipen long Kraes blong “jenisim hat blong yumi.” Yumi help long hemia taem yumi “go i bitim klasrum mo kasem hat mo hom blong wanwan. I nidim blong traehad oltaem, evri dei, blong andastanem mo laef moa gud folem gospel. Tru jenis long laef i nidim “paoa blong Tabu Spirit.”
Gol we i moa impoten, mo blesing we i moa bigwan blong dip jenis long laef we i stap oltaem, i blong stap klin inaf blong kasem ol kavenan mo ol odinens blong rod blong kavenan.
Mifala i trastem yufala se bae yufala i kaonsel tugeta mo askem revelesen blong stat yusum ol jenis ia—no lukluk i go i bitim mak ia, o traem blong talem stret wanem wanwan man, woman o famli i mas mekem. Bae oli serem sam moa Infomesen long ol komunikesen we bae i kam yet, mo tu, long wan leta we i kam long Fas Presidensi.
Mi testifae long yufala se long ol fulap toktok blong Kaonsel blong Fas Presidensi mo Kworom blong Olgeta Twelef Aposol insaed long tempol, mo afta we profet blong yumi i askem Lod blong kasem revelesen blong muv i go wetem ol jenis ia, wan strong konfemesen i kam long mifala evriwan. Russell M. Nelson, i Presiden mo profet blong yumi we i stap laef. Ol anaonsmen we oli mekem tedei bambae i givim ol bigfala blesing long olgeta we oli smat mo glad blong akseptem ol jenis ia mo lukaotem blong Tabu Spirit i lidim olgeta long hem. Bambae yumi kam kolosap moa long Papa long Heven mo Lod blong yumi, Jisas Kraes, we mi mi wan strong witnes blong Hem. Long nem blong Jisas Kraes, amen.