Kamp Faea blong Fet we i blong Yumi
Long olgeta we oli stap lukaotem, letem, mo laef from, moning blong fet, samtaem i slo, be bambae i kam, o bambae i kambak.
Ol Dia Brata mo Sista. ?Hem i no gud tumas blong kasem revelesen we i kam long heven tru long Presiden Russel M. Nelson mo ol lida blong Jos, we oli stap invaetem yumi blong laef long ol niu mo tabu wei, long hom mo long jos, wetem evri hat, maen mo paoa blong yumi?
?Yu yu harem se yu bin gat janis blong mekem wan samting we yu filim se yu no rere from, o yu no naf long hem, be yu bin kasem blesing from se yu bin traem?
Mi bin filim olsem. Hemia wan eksampol.
Sam yia i pas finis, Elda Richard G. Scott, wan memba blong Kworom blong Olgeta Twelef Aposol, i invaetem mi: “Gerrit, ?yu wantem pentem wan wota kala pikja wetem mi?”
Elda Skot i talem se peinting i helpem hem blong luklukgud mo krietem ol samting. Hem i bin raetem: “Traem blong krietem samting, iven sapos risal i no gudgud tumas. Fasin blong krietem samting i save givim spirit blong talem tangkyu from laef mo from ol samting we Lod i bin wivim insaed long bodi blong yu. … Sapos yu jusum wetem waes, bae i no save kakae taem blong yu.”
Presiden Henry B. Eyring i tokbaot ol taem blong hevi tingting wetem art, olsem se, “wan filing blong lav” i lidim, we i “lav blong wan Krieta we i wantem luk ol pikinini blong Hem oli kam olsem Hem—blong krietem mo bildim samting.” Ol gudfala wok blong Presiden Eyring, oli givim wan lukluk we i spesel, i long saed blong spirit abaot testemoni mo fet.”
Presiden Boyd K. Packer, art blong hem, i soem wan stamba mesej blong gospel: “God i Man we i Krietem ol heven mo wol ia, mo evri samting insaed long hem, blong mekem se evri samting i testifae abaot tabu kriesen ia, mo i gat evri samting we i joen bitwin neja, saens, mo gospel blong Jisas Kraes.”
Alma i testifae: “Evri samting i soem se i gat wan God.” Ol Praemeri pikinini blong yumi oli singsing, “Taem mi harem, singsing blong pijin, o luk long blu, blu skae, … Mi glad mi laef long naesfala wol, Papa God i krietem blong mi.” Man blong raet, Vikto Yugo, i selebretem “merikel rilesensip bitwin ol man mo ol samting long wol ia we i fulap long samting, olsem san i go kasem smol bebet blong flaoa. … Evri pijin we oli flae oli holem tred blong taem we i no save finis long maot blong olgeta. … Grup blong klaod i olsem ol dot blong sta.”
Mo hemia i tekem yumi i gobak long invitesen blong Elda Scott.
“Elda Scott,” mi ansa, “bae mi glad moa blong stap lukluk yu bitim blong krietem samting. Mi glad tumas blong save traem tingting se Papa long Heven i stap peint wetem ol klaod mo evri kala blong skae mo wota. Be—mi stop longtaem nao mi talem—“Elda Scott, mi no gat skil ia blong pentem wan wota kala pikja. Nogud bae mi mekem nogud long yu we bae yu traem blong tijim mi.”
Elda Scott i smael mo i putum taem blong mitufala i mit. Long stret dei, hem i rere long pepa, peint, mo bras blong peint. Hem i raetem sam laen mo i helpem mi blong mekem pepa i wetwet.
Mifala i yusum naes peinting blong hem, blong pentem, Kamp Faea Taem San i Draon. Taem mitufala i stap peint, mitufala i tokbaot fet—olsem wanem we taem yumi fesem laet mo hot blong wan kamp faea, yumi lego tudak mo fasin blong no save gud samting i stap biaen long yumi—olsem wanem we, samtaem, long ol longfala naet we yumi stap yumiwan, kamp faea blong fet i save givim hop mo filing se evri samting i oraet. Mo afta, san i stap girap. Kamp faea blong fet blong yumi—ol memori, ol eksperiens, mo fet long gud fasin blong God, mo ol naes sore taem long laef blong yumi—oli mekem yumi kam strong moa tru long naet.
Testemoni blong mi i olsem, long olgeta we oli stap lukaotem, letem, mo laef from, moning blong fet, samtaem i slo, be bambae i kam, o bambae i kambak. Laet bae i kam taem yumi wantem mo lukaotem, taem yumi save wet longtaem mo stap obei long ol komanmen blong God, taem yumi open long gladhat, hiling mo kavenan blong God.
Taem mitufala i stap peint, Elda Scott i stap leftemap tingting blong mi: “Gerrit, iven wetem wan lesen, bae yu pentem wan samting we bae yu wantem kipim mo stap rimemba.” Elda Scott i talem stret. Mi laekem tumas wota kala peinting blong kamp faea blong fet blong mitufala, we Elda Scott i bin helpem mi blong pentem. Art skil blong mi i bin, mo i nogud yet i stap, be memori ia blong kamp faea blong fet blong yumi i save leftemap tingting blong yumi long faef defren wei.
Faswan, kamp faea blong fet blong yumi i save leftemap tingting blong yumi blong faenem glad long ol gudfala aktiviti.
I gat glad taem yumi traem luk ol samting long tingting blong yumi, taem yumi lan, o mekem ol gud niu samting. Hemia i tru taem yumi stap mekem fet mo tras long Papa long Heven mo long Pikinini blong Hem, Jisas Kraes i kam dip moa. Yumi no save lus long ol tingting blong yumi inaf, blong save sevem yumi inaf; Be Papa long Heven i lavem yu moa, mo i save yu moa gud bitim we yu lavem o save yuwan bakegen. Yumi save trastem Lod mo no dipen long save blong yumiwan.
?Yu luk finis se yuwan nomo oli no invaetem long wan betdei pati?
?Olsem yu ia nao oli jusum yu laswan, o oli no jusum yu taem oli stap mekem ol tim?
?Yu yu rere blong wan tes long skul, wan wok intaviu, wan janis we yu rili wantem—mo filim se yu mestem?
?Yu yu prea from wan rilesensip we, from wan risen, i no bin wokaot?
?Yu yu fesem longfala sik, hasban o waef i lego yu, tingting i trabol from famli blong yu?
Sevya i save situesen blong yu. Taem yumi praktisim fridom blong joes we God i givim, mo yusum evri paoa wetem tingting i stap daon mo fet, Sevya blong yumi, Jisas Kraes, i save helpem yumi blong fesem ol jalenj mo ol glad taem blong laef. Fet, insaed long hem, i gat filing blong wantem mo wan joes blong biliv. Fet i kam tu taem yumi obei ol komanmen blong God, we i blong blesem yumi, taem yumi folem kavenan rod blong Hem.
Taem yumi bin filim, o stap filim se yumi nomo save stret, yumi stap yumiwan, yumi kros, se God mo Jos blong Hem we i kambak i lego o mekem nogud yumi, mo yumi seperet long hem, maet i nidim wan bigfala moa traehad mo fet blong kambak bakegen long kavenan rod blong Hem. !Be praes i gud inaf! !Plis kam, o kambak long Lod Jisas Kraes! Lav blong God i strong moa bitim ol rop blong ded—blong laef ia o long saed blong spirit. Atonmen blong Sevya i no gat en mo i no save finis. Wanwan long yumi i gat tu tingting mo mestem rod. Blong sot taem, bae yumi save lusum rod. God, wetem lav, i talem gud se i nomata se yu stap wea, o wanem yu bin mekem, i no gat wan ples we yu no save gobak long hem. Hem i stap wet blong akseptem yumi.
Sekenwan, kamp faea blong fet blong yumi i save leftemap tingting blong yumi blong givhan long wan niu wei long saed blong spirit, we yu save krietem, we i moa hae, we i moa tabu, i fulap long Spirit.
Kaen givhan ia i tekem ol merikel mo ol blesing blong kavenan oli kam—we yumi filim lav blong God mo yumi lukaot blong givhan long ol narawan wetem kaen spirit ia.
I no longtaem i pas, Sista Gong mo mi, i jes kam blong save wan papa mo famli blong hem, we wan fetful prishud brata i blesem olgeta, taem hem i go luk bisop, mo askem sapos hem i save kam hom tijing kompanion wetem papa ia. Papa ia i no aktiv, mo i no intres blong go hom tijing. Be taem hat blong papa ia i jenis, hem long gudfala prishud brata ia, i stat blong visitim ol famli blong “tufala.” Afta long wan visit, waef blong hem—we hem tu i no stap go long Jos—i askem hasban blong hem se ol samting i go olsem wanem. Papa ia i admitim: “Ating mi filim wan samting”—afta i go long kijin i karem wan bia.
Be ol samting oli folfolem olgeta: ol gudfala eksperiens, givhan seves, hat i jenis, klas blong rere blong go long tempol, kam long jos, sil olsem wan famli insaed long tabu tempol. Traem tingting se hamas tangkyu i kam long ol pikinini, mo ol apupikinini i go long papa mo mama blong olgeta, mo long givhan brata we i kam olsem wan fren mo wan kompanion wetem papa blong olgeta, blong givhan mo lavem ol narawan.
Wan nambatri kamp faea blong fet blong leftemap tingting: ol glad mo blesing blong gospel we yumi krietem long ol defren wei, oli kam taem yumi stap lukaot blong lavem Lod mo ol narawan wetem evri hat mo sol blong yumi.
Ol skripja oli invaetem yumi blong putum evri samting we i mekem yumi, mo huia bae yumi kam, i stap antap long olta blong lav mo seves. Long OlTesteman, Dutronome i invaetem yumi blong “lavem Lod God blong yumi,” wetem olgeta tingting, laef, mo paoa blong yumi. Josua i askem strong: “[Lavem Hae God we i God blong yufala,] … mekem ol samting we hem i wantem, … obei long ol tok we hem i putum. Tingting blong yu i mas stap strong long hem oltaem, mo long olgeta laef blong yu, yu mas mekem ol wok blong hem long gladhat blong yu.”
Long Niu Testeman, Sevya blong yumi i talem tufala bigfala komanmen: “Yu mas lavem Hae God ya we i God blong yu long olgeta hat …, … olgeta laef …, … olgeta paoa …, mo long olgeta tingting blong yu. Mo yu mas lavem [neiba blong yu olsem yuwan bakegen.]”
Long Buk blong Momon: Wan Narafala Testeman blong Jisas Kraes”, King Benjamin i bin wok “wetem ful paoa blong bodi blong hem mo paoa blong ful sol blong hem,” mo i stanemap pis bakegen long graon ia. Long Doktrin mo Ol Kavenan, olsem evri misinari i save, Lod i askem yumi blong wok blong Hem wetem evri “ful hat, ful paoa blong tingting, ful maen mo ful paoa blong [yumi].” Taem olgeta Sent oli go long Jakson Kaonti, Lod i givim oda long olgeta blong kipim Sabat dei i tabu taem oli “lavem Lod God wetem ful hat blong [olgeta], wetem ful paoa blong tingting, ful maen mo ful paoa blong [olgeta]; mo long nem blong Jisas Kraes, bae [oli] mas wok blong hem.”
Yumi glad long invitesen blong givim ful sol blong yumi blong lukaot blong kasem ol wei we oli hae mo tabu moa blong lavem God mo ol narawan raon long yumi, mo blong mekem fet blong yumi long Papa long Heven mo Jisas Kraes i kam strong moa insaed long hat mo hom blong yumi mo long jos.
Nambafo, kamp faea blong fet blong yumi i leftemap tingting blong yumi blong stanemap ol gudfala paten blong stret mo gud laef we i mekem yumi gat moa dip fet mo spirit.
Ol tabu evri dei fasin ia, stret mo gud evri dei fasin ia, o ol nara fasin, insaed i save gat, prea, skripja stadi, livim kakae, stap rimemba Sevya blong yumi mo ol kavenan tru long odinens blong sakramen; serem ol blesing blong gospel tru long misinari, tempol mo famli histri wok, mo ol nara seves; stap kipim wan jenol wetem ol gud tingting, mo ol narawan moa.
Taem ol stret mo gud tingting mo hemia long spirit oli joen, taem naoia mo taem we i no save finis oli kam tugeta. Laet mo laef blong Spirit i kam taem fasin blong obei long relijin standet i pulum yumi kolosap moa long Papa long Heven, mo long Sevya blong yumi, Jisas Kraes. Taem yumi lavem spirit mo tok biaen long loa, ol samting we i blong taem we i no save finis oli draon sloslo insaed long sol blong yumi olsem smol ren blong moning we i kam long heven. Taem yumi obei evri dei, mo dring wota we i laef, yumi faenem ol ansa, fet mo paoa blong fesem ol evri dei jalenj mo rod, wetem longfala tingting, longfala lukluk mo glad blong gospel.
Nambafaef. Taem yumi stap kipim ol paten ia we yumi savegud mo stap lukaotem wan niu mo tabu wei blong lavem God, mo helpem yumi mo ol narawan blong rere blong mitim Hem, kamp faea blong fet blong yumi i save leftemap tingting blong yumi blong tingbaot gud se, fasin we i stret evriwan, i stap long Kraes, i no long yumiwan o long ol kaen fasin ia blong wol.
Ol invitesen blong God oli fulap long lav, mo ol rod, from se Jisas Kraes nao “i rod, i trutok, mo i laef.” Long olgeta we oli filim se trabol i hevi, Hem i invaetem yu se “Kam long mi,” mo long olgeta we oli go long Hem, Hem i promesem: “bae mi mekem yufala i spel gud.” “Kam long Kraes, mo kam stret evriwan tru hem, … lavem God wetem ful paoa blong tingting, ful maen mo ful paoa blong yufala, afta nao, gladhat blong hem i naf blong yufala, blong tru long gladhat blong hem, yufala i save kam stret evriwan tru Kraes.”
Gud toktok ia, “blong tru long gladhat blong hem, yufala i save kam stret evriwan tru Kraes,” hem i kamfot ia, pis ia mo promes ia se yumi save gohed i go wetem fet mo tras long Lod, iven taem ol samting oli no go olsem yumi hop o wantem, o nidim, we i no rong blong yumi, iven afta we yumi mekem bes blong yumi.
Long ol defren taem mo wei, yumi evriwan i filim se yumi no naf, yumi no sua, maet yumi filim no klin inaf. Be yet, long ol fetful traehad blong yumi blong lavem God mo givhan long neiba blong yumi, yumi save filim lav blong God, mo insperesen we yumi nidim insaed long laef blong yumi mo blong olgeta, long ol niu mo tabu wei.
Wetem lav mo sore, Sevya blong yumi i stap leftemap tingting blong yumi mo promesem se yumi save “wokbaot i go wetem strong bilif long Kraes, wetem wan stret mo klin hop, mo wan lav long God mo long evri man.” Doktrin blong Kraes, Atonmen blong Sevya blong yumi, mo ful sol blong yumi we i stap folem kavenan rod blong Hem, i save helpem yumi blong save ol trutok blong Hem mo mekem yumi kam fri.
Mi testifae se ful gospel blong Hem mo plan blong stap glad blong Hem, i kambak finis, mo oli tijim insaed long Jos blong Jisas Kraes blong Ol Lata-dei Sent, insaed long tabu skripja, mo tru long ol profet stat long Profet Josef Smit i kam kasem Presiden Russel M. Nelson tedei. Mi testifae se kavenan rod blong Hem i lidim yumi i go long hae presen olgeta we Papa long Heven i promesem: “Bae yufala i kasem laef we i no save finis.”
Bae ol blesing mo glad blong Hem we i gogohed i blong yumi taem yumi mekem hat mo hop mo komitmen blong yumi i wom long kamp faea blong fet, mi prea olsem long tabu nem blong Jisas Kraes, amen.