Nambatu mo Nambatri Sandei Miting
Long nambatu mo nambatri Sandei blong wanwan manis, ol elda blong kworom mo ol Rilif Sosaeti oli stadi long ol tijing blong ol lida blong Jos we oli jes kamaot long las jeneral konfrens. Oli mas stadi moa long ol mesej we oli kam long ol memba blong Fas Presidensi mo Kworom blong Olgeta Twelef Aposol. Be, folem ol lokol nid mo insperesen we i kam long Spirit, oli save toktok raon long eni mesej we i kamaot long las jeneral konfrens.
Plante taem, bae presidensi blong kworom blong ol elda, o presidensi blong Rilif Sosaeti nao bae i jusum wan mesej blong konfrens blong stadi long hem folem nid blong ol memba, nomata bisop o stek presiden i save givim wan tingting tu. Ol lida oli save jusum wan mesej we i go wetem topik we oli tokbaot long fas Sandei kaonsel miting, o oli save jusum wan nara mesej folem insperesen we i kam long Spirit.
Ol lida mo ol tija oli mas faenem ol wei blong leftemap tingting blong ol memba blong ridim mesej ia we oli jusum bifo taem blong klas, mo blong oli kam we oli rere blong serem ol trutok blong gospel mo ol aedia long ol wei blong tekem aksen long olgeta. Olgeta tingting blong ol aktiviti we oli stap daon ia, we oli folem ol prinsipol insaed long buk ia, Teaching in the Savior’s Way, i save helpem ol memba blong lanem samting aot long ol mesej blong jeneral konfrens.
M. Russell Ballard, “Ol Nambawan Presen we Oli Kam long God,” 9–11
Mesej blong Presiden Ballard i kavremap plante topik—olsem ol profet, fet long Kraes, sakramen, mo seves—mo ol memba blong kworom o Tabu Spirit blong yu, oli save faenem ol defren topik we oli gat mining. Invaetem ol memba blong serem wan samting aot long mesej ia we i givim insperesen long olgeta. ?Wanem invitesen nao, o wanem promes blesing nao yumi save faenem insaed long mesej blong Presiden Ballard? Tingting blong invaetem ol memba blong tingting hevi blong sam minit long wanem we oli bin filim insperesen blong mekem afta we yufala i toktok raon long mesej ia.
Gary E. Stevenson, “Hat blong Wan Profet,” 17–20
Blong helpem ol memba blong oli “andastanem hamas fasin blong singaotem wan niu profet i hevi,” yu save invaetem ol memba blong luklukgud insaed long mesej blong Elda Stevenson, mo lukaotem ol trutok, mo ol niu tingting we bae i helpem olgeta blong andastanem olsem wanem nao, rod ia, i tabu mo i impoten tumas. Tingting blong invaetem ol memba blong serem wanem oli bin filim long taem blong tabu asembli ia, we oli bin sastenem Presiden Nelson olsem Presiden blong Jos. Yu save droem wan hat long bod, mo askem ol memba blong oli raetem long toktok o sentens, wanem nao i hat mo fasin blong Presiden Nelson. ?Wanem nao hem i bin tijim yumi we i bin blesem yumi?
Neil L. Andersen, “Profet blong God,” 24–27
Blong toktokraon long mesej blong Elda Andersen, i save mekem fet blong ol memba long ol profet we oli stap laef, i kam strong moa. Yu save invaetem olgeta blong luklukgud insaed long mesej blong hem blong lukaotem wan samting we i helpem olgeta blong andastanem from wanem God i stap singaotem ol profet long wol, mo from wanem nao yumi stap folem olgeta. ?Olsem wanem nao yumi gat blesing from se yumi gat wan profet? Ol memba oli save serem olsem wanem oli save kasem wan testemoni se Presiden Russel M. Nelson i profet blong Lod, mo hem i Presiden blong Jos blong Jisas Kraes blong Ol Lata-dei Sent.
David A. Bednar, “Hem I No Stap Flas mo Tingting blong Hat blong Hem I Stap Daon,” 30–33
Blong givim insperesen blong statem wan storian raon long mesej blong Elda Bednar, yu save raetem long bod Wanem i fasin blong no stap flas hem i … mo Wanem i no fasin blong no stap flas … Ol memba oli save luklukgud insaed long mesej blong Elda Bednar mo raetem long bod ol sentens we oli faenem se i save endem sentens we i stap antap ia. ?Wanem nao yumi save lanem aot long mesej ia we i save givim insperesen long yumi blong no stap flas tumas? ?Wanem eksampol blong fasin blong no stap flas nao we yu save tingting long hem? ?Olsem wanem yumi save praktisim kaonsel blong Elda Bednar blong no stap flas tumas?
Bonnie L. Oscarson, “Ol Yang Woman Insaed long Wok,” 36–38
Ol kwestin oli wan wei ia nao blong invaetem fasin blong stap tingting hevi. Tingting blong raetem samfala kwestin, long bod, we mesej blong Sista Oscarson i givim ansa long olgeta, olsem: ?Hao nao yumi save yusum ol yang woman insaed long wok blong Lod? Invaetem ol memba blong luklukgud long mesej blong hem blong kasem ol ansa long ol kwestin ia, mo toktok raon long wanem nao oli lanem. ?Wanem blesing i kam taem ol yang woman oli joen long wok blong givhan? Maet ol memba blong klas oli save serem ol eksperiens we oli bin gat taem oli go givhan wetem ol yang woman long saed blong olgeta. Folem ol storian blong yufala, ?wanem nao yu filim insperesen blong mekem?
Dale G. Renlund, “Famli Histri mo Tempol Wok: Siling mo Hiling,” 46–49
Elda Renlund i tokbaot visen blong Esikel abaot wan tempol mo wota i stap ron bigwan aot long tempol ia (Luk long Esikel 47:8–9). Maet wan memba blong kworom o Rilif Sosaeti i save droem wan pikja blong visen ia long bod. ?Olsem wanem nao ol blesing blong tempol mo famli histri wok oli olsem wota insaed long visen blong Esikel? Yu save invaetem ol memba blong klas blong serem ol blesing blong tempol mo famli histri wok we oli bin gat. ?Wanem nao yumi save mekem blong mekem famli histri wok mo tempol wok oli kam pat moa blong evri dei aktiviti blong laef blong yumi?.
D. Todd Christofferson, “Kworom blong Ol Elda,” 55–58
Insaed long kworom blong ol elda, yu save invaetem ol memba blong kworom blong ridim seksen ia blong mesej blong Elda Christofferson we taetol blong hem i: “Stamba Tingting blong Ol Jenis Ia.” ?Olsem wanem nao yumi save meksua se yumi mekem ol stamba tingting ia oli hapen? Long Rilif Sosaeti, yu save askem wan blong talemsot ol jenis insaed long ol kworom blong Melkesedek Prishud we Elda Christofferson i tokbaot. Afta, ol sista oli save faenem ol prinsipol we ol jenis ia oli tekem i kam, we oli save yusum tu insaed long wok blong Rilif Sosaeti. Insaed long kworom o Rilif Sosaeti, ol memba oli save toktok raon long wanem oli lanem aot long stori blong Brata Goates, mo olsem wanem bae oli yusum insaed long wok blong ogleta.
Ronald A. Rasband, “!Luk! !Wan Ami blong Hae King!,” 58–61
Maet yufala i save singsing, lisin, o ridim ol toktok blong hym ia, “!Behold! A Royal Army” (Hymns, no. 251). Maet bae i save givim insperesen blong toktok raon long mesej blong Elda Rasband. ?Olsem wanem nao we prishud kworom mo Rilif Sosaeti oli olsem wan ami blong Hae King? Ol memba oli save lukaotem mo toktok raon long ol “plante blesing” we Elda Rasband i stap tokbaot se bae oli kam from ol jenis ia insaed long ol kworom blong prishud. ?Wanem nao ol nara blesing we yumi bin kasem—o yumi hop blong kasem—from se yumi bin yusum ol jenis ia? ?Olsem wanem Rilif Sosaeti i save kasem ol blesing ia moa, olsem “ol defren kaen presen,” mo “fasin blong tijim tingting” blong ol memba.
Henry B. Eyring, “Givhan wetem Insperesen,” 61–64
Presiden Eyring i tokbaot tufala toktok blong sakramen miting long saed blong givhan we i bin tajem hem. Maet yu save askem haf blong ol memba blong kworom o Rilif Sosaeti blong luklukbak long ol toktok blong boe ia we i gat 14 yia, mo nara haf i luklukbak long stori abaot hom tija. Taem oli stap rid, ol memba oli save tingting abaot samfala advaes we bae oli save givim long wan yang man o yang woman we oli jes givim wok ia long hem blong hem i givhan wetem wan nara sista. ?Olsem wanem nao yumi “save kam blong kasem moa insperesen mo gat moa jareti long … givhan seves blong yumi”?
Dallin H. Oaks, “Ol Paoa blong Prishud,” 65–68
Blong statem storian, yu save raetem ol taetol blong ol fofala seksen blong mesej blong Presiden Oaks antap long bod. Afta, invaetem wanwan memba blong ridim wan seksen wetem ae blong hem nomo, mo afta, i raetem long bod wan sentens nomo we i talemsot stamba blong mesej blong seksen ia. Afta, ol memba oli save serem wanem we oli bin filim insperesen blong mekem folem wanem we oli bin ridim. ?Olsem wanem nao, seves blong yumi olsem ol man we i holem prishud, o olsem ol sista blong Rilif Sosaeti, yumi kam antap long hem taem yumi stap praktisim ol tijing insaed long mesej blong Presiden Oaks?
Russell M. Nelson, “Givhan wetem Paoa mo Atoriti blong God,” 68–75
Presiden Nelson i stap invaetem ol man we oli holem prishud blong oli “girap” mo yusum prishud ia blong blesem ol pikinini blong Papa long Heven. Invaetem ol memba blong kworom o blong Rilif Sosaeti blong yu blong oli luklukgud long ol eksampol we hem i givim, mo toktok raon long hao nao oli helpem yumi blong andastanem olsem wanem oli save yusum prishud blong blesem ol famli blong olgeta mo ol narawan. ?Wanem eksperiens nao yumi save serem taem yumi kasem blesing ia tru long paoa blong prishud? ?Olsem wanem nao yumi save helpem ol narawan mo yumiwan bakegen blong gat fet blong yusum prishud blong God blong “givhan long nem blong Hem”?
Reyna I. Aburto, “We Yumi Wan,” 78–80
Mesej blong Sista Aburto i givim wan janis long kworom blong yu, o long Rilif Sosaeti, blong skelem sapos yes o no, oli save wok wetem yuniti blong mekem wok blong Lod. Blong helpem ol memba blong mekem hemia, yu save soem samfala pikja blong sam monak bataflae, blong visit blong Sevya long Ol Man blong Nifae (Luk long Gospel Art Buk, 82, 83, 84), mo wok blong yumaniterian blong Jos (luk long LDS.org). Ol memba oli save luklukgud insaed long mesej ia mo faenem olsem wanem Sista Aburto i yusum olgeta eksampol ia blong tijim abaot ol stamba tingting mo ol blesing blong stap wok wan, o wok long yuniti. ?Wanem nao yumi save mekem blong wok “we yumi wan o joen tugeta”?
Henry B. Eyring, “Spirit blong Hem I Stap wetem Yufala,” 86–89
Blong mekem se yumi kam antap blong wantem mo gat paoa blong kasem Tabu Spirit, Presiden Eyring i stap serem samfala eksperiens blong hem, mo hem i givim sam daereksen blong folem stret. Afta we oli luklukbak long ol eksperiens ia, ?wanem samfala semmak memori we ol memba blong kworom o blong Rilif Sosaeti blong yu oli save serem, taem we Tabu Spirit i bin tajem hat blong olgeta, o i bin konfemem wan trutok? Maet ol memba oli save listimdaon long bod, rod ia we Presiden Eyring i stap serem blong helpem yumi “openem hat blong yumi blong kasem tijing blong Spirit.” ?Olsem wanem nao we, taem yumi stap folem daereksen blong hem, bae i helpem yumi long laef blong yumi mo insaed long famli blong yumi? ?O insaed long kworom o Rilif Sosaeti blong yumi?
Dallin H. Oaks, “Ol Smol mo Simpol Samting,” 89–92
Mesej blong Presiden Oaks i tekem ol pikja sentens we oli stap tijim olsem wanem ol smol mo simpol samting oli save gat strong paoa blong mekem gud o nogud. Ol pikja sentens ia, i gat ol rus blong ol tri, wan tim blong ol man blong rowing, ol smol string we i mekem wan strong rop, mo wota we i ron sloslo. Ol memba oli save ridim olgeta pikja sentens ia, mo toktok raon long wanem nao oli stap tijim abaot paoa blong mekem ol smol mo simpol samting oltaem. ?Wanem nao oli ol smol mo simpol samting we i tekem paoa blong Tabu Spirit insaed long laef blong yumi? Invaetem ol memba blong tingting hevi long wanem we oli filim blong mekem afta we oli harem kaonsel blong Presiden Oaks.
Russell M. Nelson, “Revelesen blong Jos, Revelesen blong Laef blong Yumi,” 93–96
Long mesej blong hem, Presiden Nelson i plis long yumi blong yumi mas kam antap long “paoa blong yumi long saed blong spirit blong kasem revelesen.” Blong helpem ol memba blong folem daereksen ia, yu save raetem ol kwestin olsem hemia, antap long bod: ?From wanem yumi nidim revelesen? ?Olsem wanem nao yumi save kam antap long paoa blong yumi blong kasem revelesen—tugeta, wanwan mo taem yumi stap kaonsel tugeta? ?Wanem blesing nao Presiden Nelson i promesem sapos yumi lukaot blong kasem revelesen? Seraotem ol memba long ol grup, mo invaetem wanwan grup blong faenem mo serem ol ansa blong wan long ol kwestin ia.
Gerrit W. Gong, “Kraes I Bin Raesap Tudei,” 97–98
?Wanem nao ol memba blong kworom o Rilif Sosaeti blong yu oli lanem aot long mesej blong Elda Gong abaot ol kavenan blong yumi mo Atonmen blong Jisas Kraes? Yu save invaetem ol memba blong luklukgud insaed long mesej ia, mo lukaotem ol blesing we Atonmen blong Sevya mo ol kavenan blong yumi—we tufala i wok tugeta—oli save givim long yumi. Afta, tingting blong askem ol kwestin, olsem blong folemap wanem we oli faenem: ?Olsem wanem ol kavenan blong yumi mo Atonmen oli wok tugeta blong “mekem yumi save mekem samting mo mekem yumi kam tabu”? ?Wanem nao tufala samting ia i helpem yumi blong hang strong long hem, o blong yumi lego?
Ulisses Soares, “Ol Profet Oli Toktok Tru long Paoa blong Tabu Spirit,” 98–99
Mesej blong Elda Soares i save givim insperesen long yumi blong tekem aksen wetem fet taem yumi filim se yumi no inaf blong mekem tingting blong Lod. ?Olsem wanem nao Elda Soares i bin kasem kamfot mo wan stret save taem hem i kasem niufala koling blong hem olsem wan Aposol? ?Wanem nao hem i lanem aot long eksperiens blong hem taem oli singaotem hem olsem wan misin presiden? ?Wanem nao yumi save lanem aot long eksperiens blong hem? Givim ol memba sam taem blong oli save serem eksperiens blong olgeta taem oli filim se oli no save gud long wan samting we Lod i wantem olgeta blong mekem. ?Wanem nao oli mekem blong faenem fet blong muv fored?
Jeffrey R. Holland, “Stap Wetem Olgeta mo Mekem Olgeta Oli Kam Strong Moa,” 101–3
Taem ol memba blong kworom o Rilif Sosaeti blong yu oli lanem abaot ol jenis long “aedia ia blong prishud mo Rilif Sosaeti oli givhan,” ?wanem kwestin nao oli gat? Mesej blong Elda Holland i save givim sam ansa. Ol memba oli save lukaotem ol gospel prinsipol we Elda Holland i stap tijim, we oli fandesen blong olgeta jenis ia. ?Wanem invitesen nao yumi save faenem insaed long mesej blong hem? ?Wanem blesing nao oli promesem? ?Olsem wanem nao ol niufala wei ia blong givhan oli stap helpem yumi blong kam “ol tru disaepol blong Kraes”?
Jean B. Bingham, “Givhan Olsem we Sevya I Stap Mekem,” 104–7
Long mesej blong hem, Sista Bingham i stap invaetem yumi blong askem yumiwan ol kwestin we i save lidim ol givhan wok blong yumi. Ol memba oli save toktok raon long hao ol kwestin ia i save lidim ol wok blong olgeta, mo afta, lukaotem ol ansa blong kwestin blong Sista Bingham: ?So, wok blong givhan i luk olsem wanem? Yu save spendem sam taem blong luklukbak long samfala eksampol blong Sista Bingham abaot ol defren pipol we oli stap givhan mo invaetem ol memba blong serem ol eksampol blong olgeta. ?Wanem nao yumi stap faenem insaed long mesej blong Sista Bingham we i mekem se yumi andastanem moa from wanem mo hao nao bae yumi givhan?
Dieter F. Uchtdorf, “!Yufala I Luk! !Hemia Nao Man Ya!,” 107–10
?Olsem wanem nao yumi save helpem wan blong i andastanem se sakrifaes we i pem praes from ol sin blong yumi, mo Laef Bakegen long Ded blong Jisas Kraes oli ol taem we oli impoten moa long histri blong wol? Invaetem ol memba blong tingting hevi long kwestin ia taem oli stap ridim ol defren pat blong mesej blong Elda Uchtdorf. ?Wanem nao oli faenem we bae i eksplenem from wanem ol taem ia oli impoten long olgeta? Afta we yufala i toktok raon long hemia, ol memba blong klas oli save tokbaot se, long olgeta, wanem nao toktok ia i minim: “luk, hemia nao Man ya.” ?Olsem wanem nao yumi bin lanem blong “luk man ia”?
Quentin L. Cook, “Rere blong Mitim God,” 114–17
Yu save statem toktok long klas abaot mesej blong Elda Cook taem yu invaetem wan memba blong talemsot stori blong taem blong putumbak ol prishud ki insaed long Ketlan Tempol. Folem mesej blong Elda Cook, ?wanem responsabiliti nao Jos i gat we i go wetem olgeta ki ia? ?Olsem wanem ol responsabiliti ia oli kamtru insaed long Jos tedei? Raetem ol toktok ia, fasin blong stap stret mo gud, yuniti, mo ikwol long bod, mo askem ol memba blong serem ol niu tingting we oli kasem abaot olgeta prinsipol ia we i kam long mesej blong Elda Cook. ?Olsem wanem nao ol prinsipol ia oli helpem yumi blong mekem ol tabu responsabiliti blong Jos?