Elda Ulisses Soares

Kworom blong Olgeta Twelef Aposol

Ol profet we oli stap laef, we i tekem tu Presiden Russell M. Nelson, oli wan saen blong lav we God i gat long ol pikinini blong Hem; Elda Ulisses Soares i bin testifae long hemia long fas jeneral konfrens toktok blong hem olsem wan memba blong Kworom blong Olgeta Twelef Aposol.

“?Hemia i no wan blesing blong gat ol profet, ol sia mo ol reveleta long wol ia long ol las dei ia we yumi stap laef long hem, we oli stap luklukgud blong save tingting blong Lod mo folem toktok ia? Hem i gud long tingting blong save se yumi no stap yumiwan long wol, nomata ol jalenj we yumi stap fesem long laef.”

Nomata we mi harem se mi no naf long tabu koling ia olsem wan Aposol, Elda Soares i talem: “ol toktok blong Presiden Nelson, mo ol ae blong lav blong hem taem hem i givim responsabiliti ia long mi, i mekem se mi filim se lav blong Sevya i kavremap mi.”

Wetem sastening blong hem long 31 Maj 2018, Elda Soares i kam fas Aposol blong Jos we i kamaot long Latin Amerika. Bifo long koling blong hem, hem i bin wan memba blong Presidensi blong Olgeta Seventi stat long 6 Jenuware 2013, mo i bin mekem wan spesel wok blong Prisaeding Bisoprik long Sol Lek Siti.

Elda Soares, oli singaotem hem i kam wan Jeneral Atoriti Seventi long 2 Epril 2005. Anda long posisen ia nao hem i bin stap olsem kaonsela long Afrika Saot Is, mo Brasil Saot Eria, mo olsem wan Presiden blong Brasil Eria.

Elda Soares i bin givim seves long plante narafala koling blong Jos. Hem i stap olsem wan fultaem misinari long Brasil Rio de Janeiro Misin, wan presiden blong kworom blong ol elda, kaonsela long wan bisoprik, hae kaonsela, stek eksekutiv sekretari, rijen welfea man, stek presiden mo presiden blong Potugal Porto Misin stat long 2000 kasem 2003.

Wan long ol impoten koling blong hem i kam taem hem i gat 15 yia, taem bisop blong hem i askem hem blong i tijim Sandei Skul klas blong ol yut blong wan sot taem. Blong rere long wan lesen long wei blong kasem wan testemoni, yang Ulisses i disaed blong prea blong kasem wan konfemesen se gospel i tru.

“Taem mi bin nildaon mo askem Lod sapos gospel ia i tru,” hem i tingbaot mo talem: “wan swit filing i kam long hat blong mi, wan smol voes we i konfemem long mi se mi mas gohed blong folem. Hem i strong tumas, mekem se mi neva bin save talem se mi no bin save.”

Long 1985, hem i kasem digri blong hem long saed blong akaonting mo ekonomik long Skul blong Ekonomik Saens long Sao Polo Pontifikol Katolik Yunivesiti. Afta we hem i kasem wan masta long bisnis administresen digri, hem i bin wok olsem wan akaonten mo odita long ol bigfala kampani long Brasil, mo olsem daerekta blong ol afea blong laef insaed long eria ofis blong Jos long Sao Polo.

Ulisses Soares i bon long Sao Polo, Brasil, long 2 Oktoba 1958. Hem i maredem Rosana Fernandes long Oktoba 1982. Long toktok blong hem long jeneral konfrens, Elda Soares i presem waef blong hem from lav mo sapot blong hem.

“Hem i bin wan eksampol blong gud fasin, lav mo gat ful tingting long Lod, hemia long mi mo famli blong mi, wetem ol trifala pikinini mo ol trifala apupikinini. “Mi lavem hem wetem evri pis blong hat blong mi, mo mi talem tangkyu from gudfala tingting mo paoa we hem i gat long mifala.”