Ol Paoa blong Prishud
I Kam long Elda Dallin H. Oaks
Fas Kaonsela long Fas Presidensi
Blong wok bigwan long tabu prishud we yu stap holem, i impoten tumas long wok blong Lod insaed long ol famli mo insaed long ol koling blong yu long Jos.
Ol brata blong mi we mi lavem. Yumi bin harem wan revelesen anaonsmen we i kam long Presiden Russell M. Nelson. Yumi harem plante bigfala eksplenesen we oli kam long Ol Elda ia, Christofferson mo Rasband, mo tu, Presiden Eyring. Wanem we bae i kamaot yet, wetem moa we bae i kam long Presiden Nelson, bambae i talemaot gud wanem we yufala, ol lida blong Lod mo man we i kasem prishud, bambae yufala i mekem naoia long ol responsabiliti blong yufala. Blong help wetem hemia, bambae mi luklukbak long samfala stamba prinsipol we oli rulum prishud ia we yufala i stap holem.
1. Prishud
Melkesedek Prishud i tabu atoriti we God i givim blong mekem wok blong Hem, blong “mekem man i kasem laef we i no save finis” (Moses 1:39). Long 1829, Josef Smit mo Oliva Kaodri, tufala i kasem prishud ia tru long ol Aposol blong Sevya, Pita, Jemes mo Jon (luk long D&C 27:12). Hem i tabu tumas mo i gat paoa we i bitim paoa blong mifala blong save tokbaot.
Ol ki blong prishud oli ol paoa blong lidim wok blong yusum atoriti blong prishud ia. Olsem ia nao, taem ol Aposol oli bin givim Melkesedek Prishud long Josef mo Oliva, oli bin givim tu ol ki blong lidim rod blong fasin blong yusum prishud (luk long D&C 27:12–13). Be oli no bin givim evri ki blong prishud long tetaem ia. Evri ki mo save we i bin nid blong “taem ia we wok blong God i kamtru” (D&C 128:18) God i stap givim “tijing folem tijing” (ves 21). Oli bin givim sam moa ki insaed long Ketlan Tempol, hemia seven yia afta (luk long D&C 110:11–16). Olgeta ki ia, God i bin givim blong lidim atoriti blong prishud long sam moa wok we Hem i bin givim long tetaem ia, olsem baptaes blong olgeta dedman.
Melkesedek Prishud i no wan posisen o wan taetol. Hem i wan tabu paoa, we God i givim wetem tras blong gud blong wok blong God long ol pikinini blong Hem. Yumi mas oltaem tingbaot se olgeta man we oli kasem prishud, oli no “prishud ia.” Hem i no stret blong yusum singaot ia: “ol prishud mo ol woman.” Yumi mas yusum singaot ia: “ol man we oli holem prishud mo ol woman.”
2. Wan Wok blong Givim Seves
Nao. Yumi lukluk long wanem Lod Jisas Kraes i wantem long olgeta ia we oli holem prishud blong Hem—olsem wanem yumi mas tekem ol sol i kam long Hem.
Presiden JosephF. Smith i tijim: “Oli talem tru toktok ia taem oli talem se Jos i oganaes i stret evriwan. Trabol nomo we i stap, i we ol oganaesesen ia, oli no wok fulwan kasem mak we oli putum i stap long olgeta. Taem bae oli wekap gud long evri samting we God i askem olgeta, bambae oli moa fetful blong mekem ol diuti blong olgeta, mo wok blong Lod bae i kam bigwan moa mo i gat moa paoa mo bae i save lidim tingting blong wol.”1
Presiden Smith i givim woning ia tu:
“Ol taetol blong ona we God i givim, we oli kam wetem ol defren ofis mo oda blong Tabu Prishud, oli no blong yusum, o blong stap tekem se ol taetol ia oli kam long man; oli no blong flasem man, o i no blong soem se wan i wan masta, be i wan singaot long wan kwaet seves insaed long wok blong wan Masta ia nomo we yumi stap talemaot se yumi stap wok blong Hem.
“Yumi stap wok blong sevem ol sol, mo yumi mas filim se hemia i bigfala diuti olgeta we God i putum long yumi. From hemia, yumi mas filim blong wantem sakrifaes long evri samting, sapos i nid, from lav blong yumi long God, from wok blong sevem ol man, mo from kingdom blong God bae i win long wol ia.”2
3. Ol Ofis blong Prishud
Insaed long Jos blong Lod, ol ofis blong Melkesedek Prishud oli gat ol defren wok. Doktrin mo Ol Kavenan i stap tokbaot ol hae pris, se oli “stap olsem ol presiden, o wokman ova long ol defren stek we oli stap olbaot long ol narafala ples (D&C 124:134). Hem i tokbaot ol elda se oli “ol man blong wok we bae oli stap oltaem, long jos blong [Lod]” (D&C 124:137 Hemia sam narafala tijing long saed blong ol defren wok ia.
Wan hae pris i mekem wok mo i lidim wok long saed blong ol samting long saed blong spirit (luk long D&C 107:10, 12). Mo tu, olsem we Presiden Joseph F. Smith i tijim: “Folem hamas we oli bin odenem hem wan hae pris, nao hem i mas filim we hem i gat wok ia blong hem i stap olsem wan eksampol long fored blong olgeta olfala wetem ol yangfala, we bae oli wantem mekem olsem hem, mo hem i mas putum hem long wan posisen we hem i stap olsem wan tija blong stret mo gud fasin, i no long prinsipol nomo, be moa nao tru long eksampol—hem i givim long ol yangfalawan ol gud samting we oli kamaot long eksperiens truaot long ol yia, mo olsem ia nao, hemwan i kam wan paoa long medel blong komuniti we hem i stap laef long hem.”3
Wan long ol diuti blong wan elda, Elda Bruce R. McConkie blong Kworom blong Olgeta Twelef Aposol i tijim: “Wan elda i wan man blong wok blong Lod Jisas Kraes. … Hem i kasem wok blong stanap long ples mo long bihaf blong Masta blong Hem blong givhan long ol narafala man blong Hem. Hem i man we i ripresentem o i wok blong Lod.”4
Elda Mconkie i bin toktok from tingting ia, se wan i “wan elda nomo.” “Evri elda insaed long Jos i holem hamas prishud semmak olsem Presiden blong Jos,” hem i talem. “?Wanem nao hem i wan elda? Hem i wan man blong lukaot long sipsip, wan man blong lukaot long sipsip we i stap lukaotem yad blong ol sipsip blong Gudfala Man blong Lukaot long Sipsip.”5
Long impoten wok ia blong givhan insaed long yad blong sipsip blong Gudfala Man blong Lukaot long Sipsip, i no gat samting i defren bitwin ol ofis blong hae pris mo elda insaed long Melkesedek Prishud. Long bigfala seksen 107 blong Doktrin mo Ol Kavenan, Lod i talemaot: “Ol hae pris, we i folem oda blong Melkesedek Prishud, oli gat raet blong mekem ol wok long ofis blong olgeta, anda long daereksen blong presidensi, blong lidim ol samting long saed blong spirit, mo tu, blong lidim ofis blong wan elda, [o ol ofis insaed long Aronik Prishud]” (D&C 107:10; luk tu long ves 12).
Prinsipol we i moa impoten long evri man we i kasem prishud, i prinsipol ia we profet blong Buk blong Momon, Jekob, i tijim. Afta we oli bin konsekretem hem mo brata blong hem, Josef, ol pris mo ol tija blong ol pipol, hem i talem: “Mo mitufala i bin givim ona mo wok strong long ofis blong mitufala i go long Lod, mo mitufala i bin tekem long mitufala stret wok ia, mo tekem ol panis blong ol sin blong ol pipol antap long hed blong mitufala sapos mitufala i no bin tijim gud olgeta long toktok blong God wetem strong tingting oltaem” (Jekob 1:19).
Ol brata. Responsabiliti blong yumi olsem ol man we i kasem prishud, i ol wok we oli series tumas. Ol narafala oganaesesen, oli save glad wetem ol standet blong wok blong wol ia, blong givimaot ol mesej blong olgeta mo blong mekem ol nara wok we oli gat. Be yumi, we yumi stap holem prishud blong God, yumi gat tabu paoa ia we i stap kontrolem get blong go insaed long selestial kingdom blong God. Yumi gat stamba tingting mo responsabiliti we Lod i putumaot klia long revelesen we i stap long fas toktok blong Doktrin mo Ol Kavenan. Yumi, yumi mas talemaot long wol:
“Se evri man i save toktok long nem blong God Lod, we i Sevya blong wol;
“Se fet i save kam antap long wol;
“Se kavenan blong mi we i no gat en i save stanap;
“Se olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.” (D&C 1:20–23).
Blong mekem tabu wok ia i kamtru, yumi mas fetful blong “wok strong” long ol prishud koling mo responsabiliti blong yumi (luk long D&C 84:33). Presiden Harold B. Lee i eksplenem se i minim wanem blong wok strong long prishud: “Taem wan i kam blong kasem prishud, hem i kam wan we i ripresentem o wok blong Lod. Hem i mas tingting long koling blong hem olsem se hem i stap mekem wok we Lod i sendem hem from. Hemia nao mining blong wok strong long prishud o mekem prishud i kam bigwan.”6
From hemia, ol brata, sapos Lod Hemwan bae i askem yu blong helpem wan long ol boe o gel blong Hem—we Hem i bin stap mekem tru long ol wokman blong Hem—?bambae yu go mekem? Mo sapos yu go mekem, ?bae yu mekem samting olsem ripresentativ blong Hem, “we yu stap mekem wok we Hem i sendem yu from,” mo yu stap dipen long help ia we Hem i bin promesem yu?
Presiden Lee i gat wan nara tijing long saed blong wok strong long prishud: “taem yu holem wan glas we i soem bigwan ol samting, mo holem antap long wan samting, glas i mekem samting ia i luk bigwan moa bitim wanem we neked ae blong yu i save luk; hemia glas blong soem bigwan ol samting. Nao, sapos eniwan i soem bigwan prishud blong hem—we i mekem i bigwan moa bitim we wanem oli tingting long hem faswan, mo i mekem se i moa impoten bitim we eniwan i bin tingting long hem bifo—long wei ia nao yu stap ona mo wok strong long prishud blong yu, o mekem prishud ia i kam bigwan moa.”7
Hemia i wan eksampol blong wan we i holem prishud mo i stap ona mo wok strong long prishud responsabiliti blong hem. Mi harem hemia long Elda Jeffrey D. Erekson, kompanion blong mi long wan stek konfrens blong mi long Aedaho. Taem hem i bin wan yang elda we i mared, we i pua tumas mo i filim se hem i no save finisim las yia blong yunivesiti, Jeffrey i disaed blong dropaot long skul mo akseptem wan gudfala wok. Sam dei afta, elda kworom presiden blong hem i go long haos blong hem. “?Yu yu andastanem mining blong ol prishud ki we mi stap holem? Presiden blong kworom blong ol elda i askem. Taem Jeffrey i talem se hem i save, nao presiden i talem long hem se taem hem i harem tingting blong hem blong i dropaot long skul, Lod i tantanem tingting blong hem blong hem i no slip, mo i mas kam givim mesej ia long Jeffrey: “Olsem elda kworom presiden blong yu, mi givim advaes long yu blong yu no lego skul. Hemia i wan mesej blong yu we i kam long Lod.” Jeffrey i stap long skul. Sam yia afta, mi mitim hem taem we hem i wan bisnisman we i gat sakses, mo mi harem hem i talem long wan grup blong ol man we oli holem prishud, “Advaes ia i mekem evri samting i jenis long laef blong mi.”
Wan man we i holem prishud i ona mo wok strong long prishud mo koling blong hem, mo hemia i “jenisim” laef blong wan nara pikinini blong God.
4. Prishud Insaed long Famli
Kasem naoia, mi stap tokbaot ol wok blong prishud insaed long Jos. Naoia, bambae mi tokbaot prishud insaed long famli. Bae mi stat wetem ol ki. Prinsipol ia, se prishud atoriti, bae oli save yusum nomo anda long daereksen blong wan we i holem ol ki blong wok ia, i stamba fandesen insaed long Jos, be hem i no go wetem fasin blong yusum prishud atoriti insaed long famli.8 Wan papa we i holem prishud i prisaed insaed long famli blong hem tru long atoriti blong prishud we hem i stap holem. Hem i no nid blong gat daereksen mo raet blong ol prishud ki blong save givim advaes long ol memba blong famli blong hem, blong holem famli miting, blong givim ol prishud blesing long waef mo pikinini blong hem, o blong givim ol hiling blesing long ol memba blong famli o ol narawan.
Sapos ol papa oli ona mo wok strong long prishud blong olgeta insaed long famli blong olgetawan, bae i muvum misin blong Jos i semmak nomo olsem eni nara samting we oli save mekem. Ol papa we oli kasem Melkesedek Prishud oli mas obei long ol komanmen blong mekem se oli gat paoa blong prishud blong givim ol blesing long ol memba blong famli blong olgeta. Ol papa oli mas gat mo tijim blong gat ol famli rilesensip we i gat lav blong mekem se ol memba blong famli bae oli wantem askem blesing long ol papa blong olgeta. Ol papa mo mama oli mas leftemap tingting ia blong gat moa prishud blesing insaed long famli.
Ol papa, wok olsem ol “ikwol patna” blong ol waef blong yufala, olsem we famli toktok i stap tijim.9 Mo ol papa, taem yu gat spesel janis ia blong yusum paoa mo wok blong prishud atoriti blong yu, yusum wetem “fasin blong winim tingting, fasin blong save wet long taem, kaen fasin mo tingting we i stap daon, mo tru mo stret lav” (D&C 121:41). Hae standet ia blong save yusum prishud atoriti i moa impoten insaed long famli. Presiden Harol B. Lee i bin givim promes ia jes afta we hem i kam Presiden blong Jos: “I no gat wan taem we paoa blong prishud we yu holem i stap, i moa gudwan bitim taem i gat wan trabol insaed long hom, o taem wan i sik bigwan, o taem i gat bigfala desisen blong tekem. Insaed long paoa blong prishud, we i paoa blong God we I Gat Olgeta Paoa, i gat paoa ia blong mekem ol merikel sapos i tingting blong Lod, be blong yumi save yusum prishud ia, yumi mas klin inaf blong save yusum. Sapos yumi no save andastanem prinsipol ia, nao yumi no save kasem ol blesing blong stap holem hae prishud ia.”10
Blong wok bigwan long tabu prishud we yu stap holem, i impoten tumas long wok blong Lod insaed long ol famli mo insaed long ol koling blong yu long Jos.
Mi testifae abaot Hem we prishud ia i blong Hem. Tru long safaring we i pemaot man, safaring mo sakrifaes mo laef bakegen long ded blong Hem, evri man mo woman i sua blong kasem wan bodi we i nomo save ded mo janis ia blong kasem laef we i no save finis. Wanwan long yumi i mas fetful mo i mas wok strong wetem strong tingting blong mekem pat blong yumi long bigfala wok ia blong God, Papa blong yumi we I No Save Finis, long nem blong Jisas Kraes, amen.